আগন্তুক লোকসভা নিৰ্বাচনৰ প্ৰচাৰৰ বাবে ৪ জানুৱাৰিত শিলচৰলৈ আহিব প্ৰধান মন্ত্ৰী নৰেন্দ্ৰ মোদী। উক্ত দিনা শিলচৰত হ’ব লগীয়া এক জনসমাৱেশক সম্বোধন কৰি মোদীয়ে অসমত লোকসভাৰ নিৰ্বাচনী প্ৰচাৰ আৰম্ভ কৰিব।
আজি গুৱাহাটীত অনুষ্ঠিত এক সংবাদমেলত এই কথা সদৰী কৰি ৰাজ্যিক বিজেপিৰ সভাপতি ৰঞ্জিত দাসে কয় যে লোকসভা নিৰ্বাচনত বিজেপিয়ে অসমত ১৪খন আসনৰ কমেও ১১খনত জয়লাভ কৰিব বুলি আশাবাদী।
প্ৰধান মন্ত্ৰীয়ে নিৰ্বাচনী প্ৰচাৰ চলাব লগীয়া প্ৰথম পৰ্যায়ৰ স্থানসমূহৰ ভিতৰত অসমৰ শিলচৰ অন্যতম বুলি জানিবলৈ দি দাসে কয় উত্তৰ-পূবৰ ৮খন ৰাজ্যৰ মুঠ ২৫খন লোকসভা আসনৰ অন্তত ২১খনত জয়লাভৰ বাবে দলটোৱে ইতিমধ্য ‘মিছন ২১’ আৰম্ভ কৰিছে।
নিৰ্বচনৰ প্ৰস্তুতিৰ বাবে দলটোৱে এই পৰ্যন্ত ৰাজ্যখনৰ কেইটামান সমষ্টিত ১.৮০ লাখ ‘পৃষ্ঠ প্ৰমুখ’ নিয়োগ কৰিছে বুলি উল্লেখ কৰি কয় যে অহা ১৫ জানুৱাৰিলৈকে ইয়াৰ সংখ্যা ৩.৩০লাখলৈ বৃদ্ধি কৰা হ’ব বুলি জনায়।
আনহাতে অগপৰ সৈতে মিত্ৰতা সম্পৰ্কত সাংবাদিকে সোধা এক প্ৰশ্নৰ উত্তৰত দাসে অজ্ঞতা প্ৰকাশ কৰি বিষয়টো কেন্দ্ৰীয় নেতৃত্বলৈ ঠেলি দিয়ে। অগপৰ সৈতে ‘পঞ্চায়ত নিৰ্বাচনত হোৱা তিক্ত সম্পৰ্কৰ বিষয়ে আমি কেন্দ্ৰীয় নেতৃত্বক অৱগত কৰিছো। অৱশ্যে যিহেতু ২০১৬ৰ নিৰ্বাচনত অগপৰ সৈতে মিত্ৰতাৰ ক্ষেত্ৰত কেন্দ্ৰীয় নেতৃত্বই সিদ্ধান্ত লৈছিল, সেয়ে এই ক্ষেত্ৰটো কেন্দ্ৰীয় নেতৃত্বই সিদ্ধান্ত ল’ব’, তেওঁ কয়।
