বুধবাৰে পঞ্জাৱ ভ্ৰমণত নিৰাপত্তা উলংঘন সন্দৰ্ভত প্ৰধানমন্ত্ৰী নৰেন্দ্ৰ মোদীয়ে “কেনেবাকৈ নিজৰ জীৱন ৰক্ষা কৰিছে” বুলি কৰা মন্তব্যৰ প্ৰতিক্ৰিয়া ব্যক্ত কৰিছে কৃষক সংগঠন সমূহৰ সন্মিলিত সংস্থা সংযুক্ত কিষাণ মৰ্চাই।
উল্লেখ্য যে ভাৰতীয় কিষাণ ইউনিয়ন (ক্ৰান্তিকাৰী) নামৰ এটা কৃষক সংগঠনে বুধবাৰে মোদীৰ পঞ্জাৱ ভ্ৰমণৰ সময়ত কৃষকসকলৰ প্ৰতিবাদৰ নেতৃত্ব দিছিল।
প্ৰতিবাদী কৃষকসকলে মোগা-ফিৰোজপুৰ ঘাইপথ অৱৰোধ কৰি প্ৰধানমন্ত্ৰীৰ কনভয় ২০ মিনিটৰ বাবে এখন উৰণীয়া সেঁতুৰ ওপৰত আৱদ্ধ কৰি ৰাখিছিল। ইয়াৰ পৰিণতিত ৰাজনৈতিক সমদল সম্বোধন নকৰাকৈয়ে উভটিব লগা হৈছিল মোদী।
ইয়াৰ পাছতেই বাঠিণ্ডা বিমানবন্দৰত প্ৰধানমন্ত্ৰী মোডীয়ে পঞ্জাৱৰ বিষয়াসকলক লক্ষ্য কৰি কৈছিল যে, “ বাঠিণ্ডা বিমানবন্দৰলৈ জীৱিত ৰূপত উভতি আহিব পাৰিলো বাবে আপোনালোকৰ মুখ্যমন্ত্ৰীক ধন্যবাদ দিয়া বুলি ক’ব।”
মোদীৰ এই মন্তব্যৰ সন্দৰ্ভত প্ৰতিক্ৰিয়া ব্যক্ত কৰি সংযুক্তকিষাণ মৰ্চাই কয়, “এয়া অত্যন্ত দুখৰ বিষয় যে তেওঁৰ ৰেলীৰ বিফলতা ঢাকিবলৈ প্ৰধানমন্ত্ৰীয়ে কেনেবাকৈ তেওঁৰ জীৱন ৰক্ষা কৰাৰ অজুহাত ব্যৱহাৰ কৰি পঞ্জাৱ ৰাজ্য আৰু কৃষক আন্দোলন দুয়োটাকে বদনাম কৰাৰ চেষ্টা কৰিছে।”
“সমগ্ৰ দেশে জানে যে প্ৰকৃতাৰ্থত যদি কাৰোবাৰ জীৱনৰ প্ৰতি ভাবুকি থাকে, তেন্তে সেয়া কেৱল অজয় মিশ্ৰৰ দৰে মন্ত্ৰীৰ পৰা কৃষকসকলৰ বাবেহে। কিষাণ মৰ্চাই আশা কৰে যে দেশৰ প্ৰধানমন্ত্ৰীয়ে তেওঁৰ পদৰ মৰ্যাদাৰ কথা মনত ৰাখি এনে দায়িত্বহীন মন্তব্য নকৰিব।” এছকেএমে বিবৃতিটোত কয়।
কৃষক সংস্থাটোৱে লগতে কয় যে প্ৰকাশিত ভিডিঅ’ৰ পৰা এই কথা স্পষ্ট হৈছে যে প্ৰতিবাদকাৰী কৃষকসকলে প্ৰধানমন্ত্ৰীৰ কনভয়ৰ ফালে যাবলৈ কোনো প্ৰচেষ্টা কৰা নাছিল।
“কেৱল ‘নৰেন্দ্ৰ মোডী জিন্দাবাদ’ শ্ল’গান দিয়া এটা গোটেহে বিজেপিৰ পতাকা হাতত লৈ প্ৰধানমন্ত্ৰীৰ কনভয়ৰ ওচৰত উপস্থিত হৈছিল। সেয়েহে প্ৰধানমন্ত্ৰীৰ জীৱনৰ প্ৰতি ভাবুকিৰ বিষয়টো সম্পূৰ্ণৰূপে এক প্ৰস্তুতিৰ দৰে যেন লাগিছে।” বিজেপিক আক্ৰমণ কৰি এছকেএমে কয়।
স্মৰ্তব্য যে প্ৰধানমন্ত্ৰী মোদীয়ে প্ৰায় দুবছৰৰ পিছত পঞ্জাৱ ভ্ৰমণ কৰিছিল। কৃষকসকলৰ এক বছৰজোৰা কৃষি আইন বিৰোধী তীব্ৰ প্ৰতিবাদৰ পিছত কৃষক আইন বাতিল কৰিলেও আন কিছু বকেয়া দাবী পূৰণৰ বাবে কেন্দ্ৰীয় চৰকাৰক দাবী জনাই আহিছে সংযুক্ত কিষাণ মৰ্চাই। সেইয়ে স্বাভাৱিকতেই মোদীৰ পঞ্জাৱ ভ্ৰমণত প্ৰতিবাদৰ সন্মুখীন হোৱাৰ সম্ভাৱনীয়তা আছিল।