প্ৰধানমন্ত্ৰী নৰেন্দ্ৰ মোদীৰ নাৰী সন্মানৰ কথিত নীতিৰ ওপৰত এতিয়া প্ৰশ্ন উত্থাপন হৈছে। বিহাৰত ৰাহুল গান্ধীৰ ভোটাৰ অধিকাৰ যাত্ৰাত এজন লোকে মোদীৰ প্ৰয়াত মাতৃক অপমান কৰাৰ অভিযোগ উঠাৰ পিছতে বিজেপিয়ে কংগ্ৰেছ আৰু আৰজেডিৰ বিৰুদ্ধে প্ৰতিবাদ সাব্যস্ত কৰিছে। কিন্তু বিৰোধীয়ে এই অভিযোগক ভুৱা নেৰেটিভ বুলি দাবী কৰি মোদীৰ অতীতৰ মন্তব্যসমূহক সোঁৱৰাই কয় যে আনৰ মাতৃক অপমান কৰাতো শুদ্ধ, কিন্তু নিজৰ মাতৃক অপমান কৰাতো দোষ এই নীতিকে সাৰোগত কৰি আহিছে নেকি মোদীয়ে, বুলি প্ৰশ্ন উত্থাপন কৰিছে বিৰোধী নেতাসকলে।
অভিযোগ অনুসৰি, বিহাৰত এজন লোকে মোদীৰ মাতৃৰ প্ৰতি আপত্তিজনক মন্তব্য কৰিছিল, যাৰ পিছতে তেওঁক আৰক্ষীয়ে গ্ৰেপ্তাৰ কৰিছে। কিন্তু ৰাহুল গান্ধী আৰু তেজস্বী যাদৱ এই ঘটনাত উপস্থিত নথকাৰ পাছতো বিজেপিয়ে এই অপমানক ৰাহুল গান্ধী আৰু তেজস্বী যাদৱৰ সৈতে জড়িত কৰি ভুৱা নেৰেটিভ সৃষ্টি কৰিছে বুলি অভিযোগ উঠিছে। প্ৰধানমন্ত্ৰী মোদীয়ে এক ভাৰ্চুৱেল ভাষণত কয় যে নাৰীৰ প্ৰতি এই ঘৃণা আৰু অৱজ্ঞাৰ ৰাজনীতি ৰোধ কৰাটো প্ৰয়োজনীয়। তেওঁ আৰজেডি আৰু কংগ্ৰেছক মাতৃ-ভগ্নীৰ ওচৰত ক্ষমা খুজিবলৈ হাবান কৰিছে। কিন্তু বিৰোধীয়ে মোদীৰ অতীতৰ মন্তব্যসমূহক সোঁৱৰাই দি কয় যে ইন্দিৰা গান্ধী, ছোনিয়া গান্ধী আৰু মমতা বেনাৰ্জীক অপমান কৰা মোদীয়ে এতিয়া নাৰী সন্মানৰ কথা কেনেকৈ কয়?
আৰজেডিৰ নেত্ৰী ৰোহিনী আচাৰ্য্যই কয় যে মোদীয়ে ছোনিয়া গান্ধী আৰু অন্য নাৰী নেত্ৰীসকলক অপমান কৰিছিল আৰু কেতিয়াও ক্ষমা খোজা নাই। একেদৰে টিএমচিৰ সাংসদ মহুৱা মৈত্ৰই মোদীক কটাক্ষ কৰি কয় যে যিজনে মমতা বেনাৰ্জীক ‘দিদি অ’ দিদি’ বুলি তাচ্ছিল্য কৰিছিল আৰু ছোনিয়া গান্ধীক ‘বিধৱা’ বুলি তাচ্ছিল্য কাৰিছিল, তেওঁ এতিয়া নাৰী সন্মানৰ শিক্ষা দিয়ে। এই ঘটনাই ৰাজনৈতিক মহলত তীব্ৰ বিতৰ্কৰ সৃষ্টি কৰিছে আৰু মোদীৰ নাৰী সন্মানৰ দুমুখীয়া চৰিত্ৰক পোহৰলৈ আনিছে। বিৰোধীয়ে এই নিকৃষ্ট ৰাজনীতিৰ বিৰুদ্ধে প্ৰতিবাদ অব্যাহত ৰাখিব বুলি ঘোষণা কৰিছে।
