নৰেন্দ্ৰ মোদীয়ে দেশত নহয়, বিদেশত থাকিহে আৰাম অনুভৱ কৰে। প্ৰধানমন্ত্ৰী হোৱাৰ আৰম্ভণিৰে পৰাই তেওঁ বিৰোধীৰ পৰা এনে কটাক্ষ শুনিবলগীয়া হৈছে।
অৱশ্যে তাৰবাবে মোডীৰ বিশ্ব ভ্ৰমণ বন্ধ নহ’ল। কোভিডৰ পিছত তেওঁ নতুন উদ্যমেৰে বিভিন্ন দেশ ভ্ৰমণ কৰিবলৈ আৰম্ভ কৰে। ইয়াৰ উপৰিও তেওঁ এনে দেশ ভ্ৰমণ কৰিছে য’ত ভাৰতৰ কোনো প্ৰধানমন্ত্ৰীয়ে ইয়াৰ পূৰ্বে ভৰি থোৱা নাই। আৰু সেই ভ্ৰমণৰ বাবে কোটি কোটি টকা খৰচ কৰা হৈছে।
বৃহস্পতিবাৰে সৰ্বভাৰতীয় সংবাদ মাধ্যমে চৰকাৰী পৰিসংখ্যাৰ উদ্ধৃতি দি এই সন্দৰ্ভত বিতৰ্কৰ সূচনা কৰে। তেওঁলোকে প্ৰকাশ কৰা বাতৰিত কোৱা হৈছে যে ২০২১ চনৰ পৰা ২০২৫ চনলৈকে প্ৰধানমন্ত্ৰীৰ ভ্ৰমণৰ বাবে চৰকাৰী কোষাগাৰৰ পৰা ব্যয় হৈছে ৪৬২ কোটি। অৰ্থাৎ প্ৰতি বছৰে ১১৫ কোটিৰো অধিক খৰচ হৈছে। সাধাৰণ মানুহৰ কৰৰ ধনেৰে প্ৰধানমন্ত্ৰীৰ ভ্ৰমণৰ ইমান বৃহৎ ব্যয়ক লৈ প্ৰশ্ন উত্থাপন হ’বলৈ আৰম্ভ কৰিছে।
যোৱা চাৰি বছৰত উত্তৰৰ পৰা দক্ষিণ গোলাৰ্ধলৈকে ৪৩খন দেশত মোডীৰ ভ্ৰমণগাথা বিয়পি পৰিছে। তেওঁ সুদূৰ কানাডাৰ পৰা অষ্ট্ৰেলিয়ালৈকে সকলোতে ভ্ৰমণ কৰিছে। ইয়াৰ উপৰিও তেওঁ মৰিচাছ, নামিবিয়া, ক্ৰ’ৱেচিয়া, ট্ৰিনিদাদ আৰু ট’বাগো ভ্ৰমণ কৰিছে।
প্ৰধানমন্ত্ৰীয়ে কেইবাখনো দেশ এবাৰতকৈ অধিক ভ্ৰমণ কৰিছে। যেনে আমেৰিকা, সংযুক্ত আৰব আমিৰশ্বাহী আৰু জাপান। তেওঁ এই তিনিখন দেশ চাৰিবাৰকৈ ভ্ৰমণ কৰিছে। ইয়াৰ পিছত ফ্ৰান্স। তেওঁ তিনিবাৰকৈ ইমানুৱেল মেক্ৰনৰ দেশ ভ্ৰমণ কৰিছে। তেওঁ ব্ৰিটেইন, দক্ষিণ আফ্ৰিকা, ৰাছিয়া আৰু ব্ৰাজিল দুবাৰকৈ ভ্ৰমণ কৰিছে।
তথ্য অনুসৰি তেওঁ এবাৰৰ ভ্ৰমণত ফ্ৰান্সলৈ গৈ সৰ্বাধিক খৰচ কৰিছে। যোৱা বছৰৰ ফেব্ৰুৱাৰী মাহত পেৰিছলৈ গৈছিল প্ৰধানমন্ত্ৰীগৰাকী। তাত তেওঁ ২৫.৫ কোটি টকা খৰছ কৰিছিল। তালিকাত দ্বিতীয় স্থানত আছে আমেৰিকা ভ্ৰমণ। ২০২৩ চনৰ জুন মাহত তেওঁ ‘বন্ধু’ ট্ৰাম্পৰ দেশ ভ্ৰমণ কৰিছিল। সেই সময়ত ভাৰত শুল্কক লৈ আমেৰিকাৰ ক্ষোভত পৰা নাছিল। সেই ৱাশ্বিংটন ভ্ৰমণৰ খৰচ আছিল ২২.৮ কোটি টকা। এই ভ্ৰমণৰ সময়ত মোদীয়ে আমেৰিকাৰ কংগ্ৰেছৰ যৌথ অধিৱেশনত ভাষণ দিয়ে। আমেৰিকাই আয়োজন কৰিছিল নৈশ আহাৰ। সেইবাৰ প্ৰধানমন্ত্ৰীয়ে আমেৰিকাৰ মাটিত আন্তৰ্জাতিক যোগ দিৱস উদযাপন কৰে।
তৃতীয় সৰ্বাধিক খৰচ আমেৰিকাতে আছিল। নৰেন্দ্ৰ মোদীয়ে ২০২১ চনত কোৱাড ছামিটত অংশ লৈছিল। তেওঁ ৰাষ্ট্ৰসংঘৰ সাধাৰণ পৰিষদতো ভাষণ দিছিল। সেই ভ্ৰমণৰ সময়ত তেওঁ বিশ্বৰ নেতা আৰু কৰ্পৰেট চিইঅ’সকলৰ সৈতে সাক্ষাৎ কৰে। সেই ভ্ৰমণত মুঠ ব্যয় হৈছিল ১৯৬ কোটি টকা।
ব্যয়ৰ ক্ষেত্ৰত প্ৰধানমন্ত্ৰীৰ আমেৰিকা ভ্ৰমণ আছিল আটাইতকৈ ব্যয়বহুল। চাৰিটাকৈ দেশখন ভ্ৰমণত তেওঁ ৭৪৪ কোটি টকা ব্যয় কৰিছিল। অৰ্থাৎ চাৰি বছৰত মুঠ ব্যয়ৰ ১৬ শতাংশ। ইয়াৰ পিছতে আছে জাপান আৰু ফ্ৰান্স।
