সমগ্ৰ ৰাজ্যৰ লগতে চৰকাৰী নিৰ্দেশনা অনুযায়ী সোমাবাৰৰ পৰা নগাঁও জিলাৰ ভেৰভেৰিস্থিত নৰসিংহ ক্ষেত্ৰত নিৰ্মীয়মান ১২৬ ফুট উচ্চতাৰ বিশ্বৰ ভিতৰেই সৰ্বোচ্চ লিংগাকাৰ মন্দিৰ ৰূপে পৰিচিত মহামৃত্যুঞ্জয় মন্দিৰো মুকলি হয় ভক্তৰ বাবে।
ক’ৰ’না ভাইৰাছৰ সংক্ৰমণ প্ৰতিৰোধৰ বাবে কেন্দ্ৰ তথা ৰাজ্য চৰকাৰে ঘোষণা কৰা লকডাউনৰ পৰিপ্ৰেক্ষিতত অন্যান্য মঠ-মন্দিৰ-দেৱালয়, মছজিদ, গীৰ্জা আদি বিভিন্ন উপাসনা থলী সমূহৰ লগতে মহামৃত্যুঞ্জয় মন্দিৰৰো প্ৰবেশ দ্বাৰ ভক্ত সকলৰ বাবে বন্ধ কৰি থোৱা হৈছিল।
দীঘলীয়া বিৰতিৰ অন্তত পুনৰ সোমাবাৰে পুৱাৰ ভাগৰে পৰা সকলো ধৰণৰ চৰকাৰী নিৰ্দেশনা মানি নগাঁৱৰ পুৰণিগুদাম ভেৰভেৰীত থকা মহামৃত্যুঞ্জয় মন্দিৰৰ দুৱাৰ ৰাইজৰ বাবে মুকলি কৰি দিছে।
আনহাতে নগাঁও জিলাৰ পুৰণিগুদামৰ ভেৰভেৰী নৰসিংহ ক্ষেত্ৰত ২০১০ চনৰ পৰা নিৰ্মাণ কাৰ্য চলি থকা ১২৬ফুট উচ্চতাৰ বিশ্বৰ ভিতৰতে সৰ্বোচ্চ লিংগাকাৰ মন্দিৰ হিচাপে পৰিচিত মহামৃত্যুঞ্জয় মন্দিৰৰ নিৰ্মাণ কাৰ্য চলিত বৰ্ষতে সম্পন্ন হ’ব বুলি জানিবলৈ দিছে পৰিচালনা কমিটিৰ বিষয়-ববীয়া সকলে।
অৱশ্যে বৰ্তমান অসম চৰকাৰৰ পাঠ্যপুথি প্ৰণয়ন নিগমৰ অধ্যক্ষ জিতু গোস্বামীয়ে মন্দিৰৰ নিৰ্মাণ কাৰ্যত উঠি পৰি লাগি থকাও পৰিলক্ষিত হৈছে।
প্ৰৱেশ আৰু প্ৰস্থানৰ বাবে ৪ চাৰিখনকৈ দুৱাৰ থাকিব লগা বিশ্বৰ ভিতৰতে সৰ্বোচ্চ লিংগাকাৰ মন্দিৰ ভাগৰ ভিতৰত একলগে ৪ হাজাৰ ভক্তই আৱাগমণ কৰাৰ লগতে বহিঃ অংশত মন্দিৰৰ চৌপাশে ১০ হাজাৰ ভক্তই একেলগে পৰিক্ৰমা কৰিব পাৰিব বুলি মন্দিৰ পৰিচালনা সমিতিৰ সম্পাদক প্ৰবীণ গোস্বামীয়ে সংবাদ মাধ্যমক জানিবলৈ দিছে।
আনহাতে মহামৃত্যুঞ্জয় মন্দিৰ নিৰ্মাণ সমিতিৰ নৱ নিযুক্ত অধ্যক্ষ তথা অসমৰ বিত্ত, স্বাস্থ্য আৰু গড়কাপ্তানি বিভাগৰ মন্ত্ৰী ড৹ হিমন্ত বিশ্ব শৰ্মাৰ তৎপৰতাত অহা ডিচেম্বৰ মাহত নৰসিংহ ক্ষেত্ৰত থকা নৱ নিৰ্মিত মহামৃত্যুঞ্জয় মন্দিৰ ভাগ দেশৰ প্ৰধান মন্ত্ৰী নৰেন্দ্ৰ মোদীয়ে উত্তৰ প্ৰদেশৰ মুখ্য মন্ত্ৰী যোগী আদিত্যনাথৰ উপস্থিতিত উদ্বোধন কৰাৰ পৰিকল্পনা পৰিচালনা কমিটিয়ে কৰিছে বুলি জানিব পৰা গৈছে।
তদুপলক্ষে চলিত বৰ্ষৰ ২৯ ডিচেম্বৰৰ পৰা নৱবৰ্ষৰ ৪ জানুৱাৰীলৈকে ১০৮ কুণ্ডৰ শ্ৰী শ্ৰী মহামৃত্যুঞ্জয় যজ্ঞৰে শুভ উদ্বোধন সমাৰোহ অনুষ্ঠিত কৰিছে উদ্যোক্তা মণ্ডলিয়ে।
এতিয়া প্ৰধান মন্ত্ৰী নৰেন্দ্ৰ মোদীৰ লগতে উত্তৰ প্ৰদেশৰ মুখ্য মন্ত্ৰী যোগী আদিত্য নাথৰ মহামৃত্যুঞ্জয় মন্দিৰলৈ আগমনৰ খবৰ পাই বৃহত্তৰ পুৰণিগুদাম অঞ্চলবাসী ৰাইজ উৎফুল্লিত হৈ পৰিছে। যাৰ বাবে এতিয়া মন্দিৰ সমিতিয়ে যুদ্ধকালীন তৎপৰতাৰে মন্দিৰ নিৰ্মাণৰ লগতে অন্যান্য কাম-কাজৰ ব্যাপক প্ৰস্তুতি আৰম্ভ কৰিছে।