বোকাখাত বিধানসভা সমষ্টিৰ দক্ষিণ কাজিৰঙা গাঁও পঞ্চায়তৰ মুড়া বস্তি ৷ জাতি মাটি ভেটিৰ কথা কৈ দেশৰ লগতে পঞ্চায়তখনো দখল কৰা ভাৰতীয় জনতা পাৰ্টিৰ দলীয় পৃষ্ঠপোষকতাতেই দক্ষিণ কাজিৰঙা গাঁও পঞ্চায়তত চলিছে অবাধ লুণ্ঠন ৰাজ৷
প্ৰধানমন্ত্ৰী আৱাস যোজনাৰ নামত উপকৃত হোৱাতকৈ সৰ্বস্ৰান্তহে হ’ব লগা হৈছে দৰিদ্ৰ হিতাধিতাৰী৷ প্ৰধানমন্ত্ৰী আৱাস যোজনাৰ নামত অনুমোদিত ধনৰ উপৰিও হিতাধিকাৰীয়ে ঘৰ বনোৱা ঠিকাদাৰক দিব লগা হৈছে নিজৰ গাঁঠিৰ ধন৷
দক্ষিণ কাজিৰঙা গাঁও পঞ্চায়তৰ কলাখোৱা মুড়া বস্তিৰ প্ৰধানমন্ত্ৰী আৱাস যোজনাৰ হিতাধিকাৰী বিচু মুণ্ডাই চৰকাৰৰ পৰা লাভ কৰিছিল এই যোজনাৰ এটা ঘৰ৷
বিচু মুণ্ডাৰ গৃহ নিৰ্মাণৰ দায়ীত্ব লৈছিল জনৈক তামুলী নামৰ এজন ঠিকাদাৰে৷ বিচু মুণ্ডাৰ পৰা গৃহ নিৰ্মাণৰ নামত আৱণ্টিত ১.৩০ লাখ টকা ঠিকাদাৰে লৈ যোৱাৰ পাচতো আজি পৰ্যন্ত সম্পুৰ্ণ নহ’ল বিচু মুণ্ডাৰ প্ৰাধানমন্ত্ৰী আৱাস যোজনাৰ ঘৰ৷
এতিয়া ঘৰ নিৰ্মাণৰ বাকী থকা কামৰ বাবে ঠিকাদাৰে হিতাধিকাৰী বিচু মুণ্ডাৰ পৰা অতিৰিক্ত ১৮ হাজাৰ টকা দাবীহে কৰিছে বুলি জনাইছে বিচু মুণ্ডাই৷
১.৩০ লাখ টকা ঠিকাদাৰক আদায় দিয়াৰ পাছত এতিয়া অতিৰিক্ত ১৮ হেজাৰ টকা ঠিকাদাৰক দিব লগীয়া হোৱাত হাবাথুৰি খাইছে বিচু মুণ্ডাই৷
অকল বিচু মুণ্ডাই নহয় মুড়া বস্তিৰ প্ৰধানমন্ত্ৰীৰ আৱাস যোজনাৰ বহু ঘৰ নিৰ্মাণ কৰাৰ কাম কৰিছে এইজন ঠিকাদাৰে৷
ঠিকাদাৰে নিৰ্মাণ কৰিবলৈ লোৱা ভুৱন মুণ্ডা, তনুৰাম মুণ্ডা, অজিত মুণ্ডাৰ দৰে দৰিদ্ৰ হিতাধিকাৰীৰ ঘৰ আজিও অসম্পুৰ্ণ হৈ পৰি ৰৈছে৷
মন কৰিবলগীয়া যে এইসমূহ ঘৰ ইতিমধ্যে নিৰ্মাণ সম্পুৰ্ণ হোৱা বুলি বিভাগীয় তথ্যত দেখুৱা হৈছে৷
একেদৰে এই অঞ্চলৰে ২০১৭ – ১৮ বৰ্ষ কালত অনুমোদিত পোনা মুণ্ডাৰ প্ৰধান মন্ত্ৰী আৱাস যোজনাৰ ঘৰ আজিও অসম্পুৰ্ণ হৈয়ে পৰি আছে৷
জাতি মাটি ভেটিৰ কথাকৈ পঞ্চায়ত দখল কৰা ৰাজনৈতিক দলৰ দালাল ৰূপী ঠিকাদাৰৰ কৱলৰ পৰা হিতাধিকাৰীক উদ্ধাৰ কৰিব পাৰিবনে গোলাঘাট পশ্চিম খণ্ড উন্নয়ন বিষয়া দিলীপ চৰকাৰে!
এই ঘটনাৰ সম্পৰ্কত বোকাখাতৰ মহকুমাধিপতি আৰু গোলাঘাট জিলাৰ উপায়ুক্তক এক উচিত তদন্তৰ নিৰ্দেশ দিবৰ বাবেও দাবী কৰিছে স্থানীয় জনসাধাৰণে।
