দেশ মহামাৰীৰ কৱলত।জনজীৱন স্তব্ধ।তাৰ মাজতে টীয়কৰ অন্যতম অগ্ৰণী সাহিত্য চৰ্চাৰ অনুষ্ঠান শিকলিয়ে মহামাৰীৰ এই মহাত্ৰাসৰ মাজতে সাহিত্য চৰ্চা যাতে অব্যাহত ৰাখিব পাৰে তাৰ প্ৰতি লক্ষ্য ৰাখি আজি সন্ধিয়া অনুষ্ঠানটোৱে এখনি কাব্যালোচনী ‘শিকলি’ শুভ উন্মোচন কৰে।
যোৰহাট জিলাৰ কবি সন্মিলনৰ সভাপতি অজিত বৰদলৈয়ে টীয়কৰ কেইবাগৰাকীও বিশিষ্ট ব্যক্তিৰ উপস্থিতিত আনুষ্ঠানিকভাৱে এই ছমহীয়া কাব্যালোচনীখন উন্মোচন কৰে।
লগতে টীয়কৰ দৰে এক মফচলীয় অঞ্চলৰ পৰা এইদৰে কাব্যালোচনী প্ৰকাশ কৰি অনাগত দিনত বৃহত্তৰ অঞ্চলৰ লগতে সমগ্ৰ অসমৰ সাহিত্য চৰ্চাত জড়িত ন ন প্ৰতিভাসমূহক এক নতুন চিনাকি প্ৰদান কৰিব বুলি আশা প্ৰকাশ কৰে সকলোৱে।
উল্লেখযোগ্য যে শিকলি পৰিয়ালৰ হৈ মুখ্য সম্পাদক অৰূপজ্যোতি হাজৰিকা,সম্পাদক হেমন্ত গগৈ,সহযোগী সম্পাদক দেৱজিত হাজৰিকাকে প্ৰমুখ্য কৰি কেইবাজনো উদ্যমী যুৱকৰ সহযোগিতাত সম্পূৰ্ণ কভিড প্ৰট’কল অৱলম্বন কৰি অনুষ্ঠানটো সম্পন্ন কৰা হয়।
বসন্ত সংখ্যাৰ শিকলিত অসমৰ কেইবাগৰাকীও বিশিষ্ট কবিৰ কবিতাৰে এখন সৰ্বাংগ সুন্দৰ কাব্যালোচনী কাব্যপ্ৰেমীৰ হাতত তুলি ধৰিবলৈ চেষ্টা কৰাৰ লগতে এই কাব্যালোচনীয়ে অসমৰ সাহিত্য জগতত সামান্য পৰিমাণে হ’লেও অৰিহণা যোগাবলৈ সক্ষম হ’ব বুলি উদ্যোক্তাসকলে আশা প্ৰকাশ কৰিছে।
