ডিব্ৰুগড় জিলাৰ ৰাজগড়ত NH 52B ক্ষতিগ্ৰস্ত সুৰক্ষা সমিতিৰ যৌথ মঞ্চই আজি উলিওৱা এটা গণতান্ত্ৰিক প্ৰতিবাদক বাধা দি প্ৰতিবাদকাৰীক আটক কৰি থানালৈ লৈ যোৱাত প্ৰতিক্ৰিয়াৰ সৃষ্টি হৈছে।
যৌথ মঞ্চই আজি NH 52B ক্ষতিগ্ৰস্ত সুৰক্ষা সমিতিৰ যৌথ মঞ্চৰ অন্যতম সদস্য তথা চি পি আই (এম এল)ৰ কেন্দ্ৰীয় সমিতিৰ সদস্য বলীন্দ্ৰ শইকীয়াৰ বিৰুদ্ধে উত্থাপিত ভুৱা গোচৰ প্ৰত্যাহাৰৰ দাবীত প্ৰায় তিনি শতাধিক লোকক লৈ প্ৰতিবাদী সমদল উলিয়াইছিল।
সংবাদ মাধ্যমৰ আগত মঞ্চই জানিবলৈ দিয়া মতে, আজিৰ এই গণতান্ত্ৰিক প্ৰতিবাদটোৰ বাবে আগতীয়াকৈ প্ৰশাসনক অৱগতও কৰিছিল।
কিন্তু তাৰ পিছতো আজি আৰক্ষীয়ে প্ৰতিবাদী সমদলটোক আগ বাঢ়িবলৈ নিদি গাড়ীত উঠাই নি ৰাজগড় আৰক্ষী চকীত আবদ্ধ কৰি ৰাখে। আটকাধীন প্ৰতিবাদকাৰীসকলে থানা চৌহদতে এখন প্ৰতিবাদী সভা অনুষ্ঠিত কৰে।
মঞ্চৰ সদস্য বিতোপন বকলিয়ালে আঁত ধৰা প্ৰতিবাদী সভাখনত মঞ্চৰ সদস্য ৰহেশ্বৰ সোণোৱাল, প্ৰমোদ চাংমাই, গনেশ কোঁৱৰ আদিকে ধৰি ভালেকেইজন বক্তাই বক্তব্য প্ৰদান কৰে। গণতান্ত্ৰিক প্ৰতিবাদকাৰীক আটক কৰা ঘটনাক তীব্ৰ ভাষাৰে গৰিহণা দি বিজেপিয়ে গণতন্ত্ৰক হত্যা কৰিছে বুলি অভিহিত কৰে।
আজিৰ ঘটনাই সমগ্ৰ ঘটনাৰ পিছফালে যে বিধায়ক বিমল বড়া জড়িত সেইটো প্ৰমাণ কৰিলে বুলিও বক্তাসকলে মন্তব্য কৰে।
বক্তাসকলে প্ৰশ্ন কৰি কয়, “বিমল বড়াইহে যদি পথৰ সম্প্ৰসাৰণত ক্ষতিগ্ৰস্তৰ প্ৰাপ্য ধন আনিছিল তেন্তে চৰকাৰী মাটিৰ দখলদাৰৰ ফচলৰ ক্ষতিপূৰণৰ লগত অতিৰিক্ত চলেচিয়াম হিচাপে পাব লগীয়া ৪২% ধন অৰ্থাৎ প্ৰায় তিনি কোটি টকা ক’লৈ গল?”
তাৰোপৰি প্ৰতিবাদকাৰীসকলে বলীন্দ্ৰ শইকীয়াৰ বিৰুদ্ধে গোচৰ ৰুজু কৰাৰ মাজেৰে ক্ষতিগ্ৰস্তৰ ন্যায্য প্ৰাপ্য আন্দোলনক ধংস কৰাৰ চক্ৰান্ত চলা বুলি কয়। মঞ্চৰ নেতা তথা সফলতাৰে ক্ষতিগ্ৰস্তসকলক ক্ষতিপূৰণ পোৱাত সহায় কৰা চি পি আই (এম এল)ৰ নেতা বলীন্দ্ৰ শইকীয়াৰ বিৰুদ্ধে ৰুজু হোৱা ভুৱা গোচৰ সোনকালে প্ৰত্যাহাৰ কৰিবলৈ দাবী তোলে প্ৰতিবাদকাৰীসকলে।
প্ৰতিবাদকাৰীসকলে পিছত চক্ৰ বিষয়াৰ যোগেদি ডিব্ৰুগড় জিলা উপায়ুক্ত আৰু আৰক্ষী অধীক্ষক, ডিব্ৰুগড়লৈ পৃথকে পৃথকে স্মাৰকপত্ৰ প্ৰদান কৰে।
NH 52B ক্ষতিগ্ৰস্ত সুৰক্ষা সমিতিৰ যৌথ মঞ্চই জনোৱা মতে, ডিব্ৰুগড় জিলাত নিৰ্মাণ কৰিবলৈ লোৱা NH 52B-ৰ বাবে ডিব্ৰুগড় জিলাত সৰ্বমূঠ ৫৭খন ৰাজহ গাঁৱৰ ১৭০০-তকৈ অধিক পৰিয়ালৰ পৰা ২০০০ বিঘাতকৈ অধিক মাটি অধিগ্ৰহণ কৰা হৈছে।
এই অধিকৃত ভূমিৰ প্ৰায় ৫৫০ বিঘা চৰকাৰী মাটি। কিন্তু অধিগ্ৰহণ কৰা ভূমিৰ ক্ষতিপূৰণ বিঘাই প্ৰতি প্ৰদান কৰা হৈছিল ১৭ হাজাৰ টকাৰ পৰা ১ লাখ টকা মাত্ৰ।
