দেশজুৰি চাঞ্চল্যৰ সৃষ্টি কৰা নিট পৰীক্ষাৰ প্ৰশ্নকাকত ফাদিলৰ ঘটনাক লৈ আজি ১৬ মে’ তাৰিখে গুৱাহাটীত এক উত্তাল প্ৰতিবাদী কাৰ্যসূচী ৰূপায়ণ কৰা হয়। ভাৰতৰ ছাত্ৰ ফেডাৰেচন চমুকৈ এছ এফ আইৰ উদ্যোগত গুৱাহাটীৰ নেহৰু পাৰ্কৰ সন্মুখত এই প্ৰতিবাদ সাব্যস্ত কৰা হয়। কিন্তু শিক্ষাৰ্থীসকলৰ এই শান্তিপূৰ্ণ আৰু গণতান্ত্ৰিক সমদলটোক আৰক্ষী বাহিনীয়ে বলপ্ৰয়োগ কৰি নিৰ্দয়ভাৱে বাধা প্ৰদান কৰে।
প্ৰতিবাদকাৰী ছাত্ৰ সংগঠনটোৱে অভিযোগ কৰে যে ২০১৮ চনৰ পৰাই এন টি এ চমুকৈ নেচনেল টেষ্টিং এজেন্সীৰ জৰিয়তে অনুষ্ঠিত হোৱা পৰীক্ষাসমূহত ব্যাপক খেলিমেলি হৈ আহিছে। এইবাৰ নিট পৰীক্ষাৰ ক্ষেত্ৰতো একেই ঘটনা ঘটিল আৰু লাখ লাখ মেধাৱী ছাত্ৰ-ছাত্ৰীৰ ভৱিষ্যত অন্ধকাৰৰ মাজলৈ ঠেলি দি পৰিকল্পিতভাৱে প্ৰশ্নকাকত ফাদিল কৰা হ’ল। এছ এফ আইৰ মতে, এই সমগ্ৰ কেলেংকাৰীৰ লগত শাসকীয় বিজেপি দলৰ বহু নেতা আৰু পালিনেতা প্ৰত্যক্ষভাৱে জড়িত হৈ আছে, যিয়ে নিজৰ ৰাজনৈতিক আৰু আৰ্থিক স্বাৰ্থৰ বাবে দৰিদ্ৰ আৰু মধ্যবিত্ত পৰিয়ালৰ শিক্ষাৰ্থীসকলৰ সপোন ধ্বংস কৰিছে।
এই প্ৰতিবাদৰ জৰিয়তে এছ এফ আইয়ে চৰকাৰৰ ওচৰত মূলতঃ তিনিটা দাবী উত্থাপন কৰিছে। প্ৰথমতে, ৰাজ্যসমূহৰ পৰা শিক্ষাৰ অধিকাৰ কাঢ়ি নি শিক্ষাৰ কেন্দ্ৰীয়কৰণ কৰাৰ উদ্দেশ্যে গঠন কৰা এন টি এ শীঘ্ৰে বাতিল কৰিব লাগে। দ্বিতীয়তে, এই বিফলতাৰ নৈতিক দায়িত্ব স্বীকাৰ কৰি কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে অনতিবিলম্বে নিজৰ পদৰ পৰা পদত্যাগ কৰিব লাগে। ইয়াৰ লগতে, নিটৰ প্ৰশ্নকাকত ফাদিলৰ ঘটনাৰ এক উচ্চস্তৰীয় তদন্ত কৰি ইয়াৰ সৈতে জড়িত থকা সকলো বিজেপি নেতা, পালিনেতা আৰু পৰীক্ষা মাফিয়াক কঠোৰ শাস্তি প্ৰদান কৰাৰো দাবী জনোৱা হৈছে।
অশেষ কষ্ট, ত্যাগ আৰু ধন ব্যয় কৰি পৰীক্ষাৰ বাবে সাজু হোৱা ছাত্ৰ-ছাত্ৰীসকল এনে চৰকাৰী কেলেংকাৰীৰ বাবে তীব্ৰ মানসিক চাপ আৰু হতাশাৰ বলি হ’বলগীয়া হৈছে বুলি সংগঠনটোৱে ক্ষোভ প্ৰকাশ কৰে। এছ এফ আইৰ অসম ৰাজ্যিক সমিতিৰ সভাপতি দেৱান ইপ্টিকাৰ হুছেইন আৰু সম্পাদক ৰাজদ্বীপ মহন্তই স্পষ্ট কৰি দিয়ে যে চৰকাৰে আৰক্ষীৰ ভয় দেখুৱাই শিক্ষাৰ্থীৰ মাত দবাই ৰাখিব নোৱাৰে। চৰকাৰৰ এই ছাত্ৰ-বিৰোধী নীতি কোনো কাৰণতে সহ্য কৰা নহ’ব আৰু ছাত্ৰ-ছাত্ৰীৰ ন্যায্য দাবীসমূহ পূৰণ নোহোৱালৈকে তেওঁলোকৰ এই সংগ্ৰাম অব্যাহত থাকিব বুলি সংগঠনটোৱে চৰকাৰক সকীয়াই দিয়ে।
