বিশ্বত ত্ৰাসৰ সৃষ্টি কৰা ক’ৰ’না ভাইৰাছ প্ৰতিৰোধৰ ক্ষেত্ৰত চিকিৎসক আৰু স্বাস্থ্য কৰ্মীসকলৰ লগতে আৰক্ষীৰ লোকসকলে প্ৰশংসনীয় ভূমিকা পালন কৰি আহিছে।
নিজৰ পৰিয়াল আৰু আত্মীয় স্বজনৰ পৰা আঁতৰত থাকি ৰাইজক সুৰক্ষা দিয়াৰ কামত নিয়োজিত এনে কিছু আৰক্ষীৰ লোকক আজি বৰপেটা চহৰত ফুলাম গামোচাৰে বিহুৰ শুভেচ্ছা জনোৱা হয়।
বৰপেটা চহৰৰ ছয়টা স্থানত কৰ্তব্যত নিয়োজিত প্ৰায় ১৮ গৰাকী আৰক্ষী বিষয়া আৰু জোৱানক বৰপেটা জিলা ডিজিটেল সাংবাদিক সন্থাই সম্বৰ্ধনা জনায়।
ক’ৰ’না প্ৰতিৰোধৰ বাবে বিহুৰ দিনটোতো পৰিয়াল আৰু আত্মীয় স্বজনৰ পৰা নিলগত থাকি সেৱা আগবঢ়াই অহা আৰক্ষী বিষয়া আৰু জোৱানসকলক উৎসাহ দিয়াৰ উদ্দেশ্যে এই কাৰ্যসূচী গ্ৰহণ কৰা বুলি সন্থাটোৱে জানিবলৈ দিয়ে।
উক্ত কাৰ্যসূচীত বৰপেটা জিলা ডিজিটেল সাংবাদিক সন্থাৰ কাৰ্যকৰী সভাপতি পুলেন্দ্ৰ দাস, জুলফিকাৰ আলী আহমেদ, চফিক আহমেদ, মফিদুল হকৰ লগতে সমাজকৰ্মী বলভদ্ৰ দাস উপস্থিত থাকে।