উত্তৰ প্ৰদেশৰ কাণপুৰত অসমৰ যুৱক কমৰ উজ জামান ওৰফে কমৰউদ্দিনৰ গ্ৰেপ্তাৰৰ পিছতেই হোজাইত ইতিমধ্যে, আৰক্ষীৰ হাতত আটক হোৱা কমৰউদ্দিনৰে সু-সৰ্ম্পক আৰু জেহাদী সংগঠনটোৰ অসমত শ্লিপাৰ চেল হিচাপে কাম কৰি থকা ধৃত ছাইদুল আলমৰ লংকাৰ ৮ নং উদালীৰ জাঁৰণি গাঁৱৰ বাসগৃহত যোৱা নিশা আৰক্ষীয়ে অভিযান চলাই দুটা মোবাইল ফোন আৰু নগদ ১ লাখ ১৪ হাজাৰ টকা জব্দ কৰে।
তদুপৰি আৰক্ষীয়ে কমৰউদ্দিনৰ যমুনামুখৰ বাসগৃহত অভিযান চলাই তেওঁৰ সৈতে ঘনিষ্ট সৰ্ম্পক থকাৰ সন্দেহত জ্যেষ্ঠ ভাতৃ ছাইফুল ইছলাম ওৰফে লিটনক সোধ-পোছৰ বাবে আটক কৰে।
আনহাতে, ইয়াৰ উপৰি বৰ্ণিহাটত মহানগৰ আৰক্ষীৰ হাতত গ্ৰেপ্তাৰ হোৱা হোজাই যমুনামুখৰ ওমৰ ফাৰুকৰ শিংৰিপাৰাৰ বাসগৃহতো আৰক্ষীয়ে অভিযান চলাইছিল যদিও কোনোধৰণৰ আপত্তিজনক নথি-পত্ৰ লাভ কৰিবলৈ সক্ষম নহ’ল।
হোজাইৰ আৰক্ষী অধীক্ষকে প্ৰকাশ কৰা অনুসৰি, ধৃত ছাইদুল ২০১৫ চনত জেহাদী সংগঠনটোৰ সংৰ্স্পশলৈ আহিছিল। ছাইদুলে দিল্লী ভ্ৰমণলৈ যাওঁতে দক্ষিণ দিল্লীৰ চুন্নী মুছলিম অধ্যুষিত নিজামউদ্দিন মৰ্কজ মছজিদত মৌলবাদী সংগঠনটোৰে যোগাযোগ হৈছিল।
সেই সময়ৰ পৰাই কমৰউদ্দিনৰে শ্বাহনৱাজ আৰু ছাইদুলৰ সঘন যোগাযোগ অব্যাহত আছিল, ২০১৭ চনত তেওঁলোক পুনৰ লগ হৈছিল। ২০১৮ চনৰ এপ্ৰিল মাহত ছাইদুল কাশ্মীৰলৈ গৈ মৰ্কজত থাকি সংগঠনটোৰ আন আন সদস্যৰ সংৰ্স্পশলৈ আহিছিল বুলিও আৰক্ষীয়ে প্ৰকাশ কৰে।
উল্লেখযোগ্য যে ইতিমধ্যে, আৰক্ষীয়ে ধৃত ছাইদুল আৰু ওমৰ ফাৰুকক হোজাইৰ শংকৰদেৱ নগৰ আদালতত হাজিৰ কৰাত আদালতে দুয়োকে ১৪ দিনৰ আৰক্ষীৰ জিম্মালৈ প্ৰেৰণ কৰিছে ৷