ৰাজকন্যা বৰুৱাৰ ‘ড্ৰিংক এণ্ড হিট’ ঘটনাই লৈছে নতুন মূৰ। এইবাৰ আৰক্ষীৰ ৰোষত পৰিছে ৰাজকন্যা বৰুৱাৰ উদ্ধাৰকাৰীৰ ৰূপত অৱতীৰ্ণ হ’বলৈ যোৱা বিখ্যাত চিকিৎসক নৱনীল বৰুৱা আৰু GNRC হাস্পতাল কৰ্তৃপক্ষ।
ৰাজকন্যা বৰুৱা গোচৰৰ তদন্ত কৰি থকা গুৱাহাটী আৰক্ষীয়ে জিএনআৰচি চিকিৎসালয় কৰ্তৃপক্ষ আৰু চিকিৎসালয়ৰ জ্যেষ্ঠ চিকিৎসক ডাঃ নৱনীল বৰুৱালৈ ৰাজকন্যা বৰুৱাক অসুস্থ বুলি চিকিৎসালয়ত ভৰ্তি কৰাৰ বাবে জাননী প্ৰদান কৰিছে।
গুৱাহাটী চিকিৎসা মহাবিদ্যালয়ৰ ছয়জন জ্যেষ্ঠ চিকিৎসকক লৈ গঠিত চিকিৎসা পৰিষদে মডেলগৰাকীৰ স্বাস্থ্য পৰীক্ষা কৰিবলৈ জিএনআৰচি পৰিদৰ্শন কৰাৰ পিছত আৰু তেওঁ সম্পূৰ্ণ সুস্থ বুলি প্ৰমাণ কৰাৰ পিছত গ্ৰেপ্তাৰ কৰা হৈছিল ৰাজকন্যা বৰুৱাক।
বিভিন্ন পক্ষই অভিযোগ কৰে যে জিএনআৰচি কৰ্তৃপক্ষ আৰু ডাঃ বৰুৱাই ৰাজকন্যা বৰুৱাক চিকিৎসালয়ত ভৰ্তি কৰি গ্ৰেপ্তাৰৰ পৰা সুৰক্ষিত কৰিবলৈ চেষ্টা কৰিছিল।
সেইবাবে তেওঁলোকো তদন্তৰ আওতালে আহিব লাগে বুলি দাবী উত্থাপন হৈছিল।
উল্লেখ্য যে সুৰামত্ত মডেল ৰাজকন্যা বৰুৱাৰ বাহনৰ খুন্দাত আহত হৈছিল ৯ জন শ্ৰমিক। তাৰে এজনে হেৰুৱাব লগীয়া হৈছিল দুয়োখন ভৰি।
পোন প্ৰথমে আৰক্ষীৰ আপোচৰ বাবে ৰাজকন্যা বৰুৱাই জামিন লাভ কৰিছিল যদিও মুখ্যমন্ত্ৰীৰ হস্তক্ষেপত পুনৰ গ্ৰেপ্তাৰ হয় মডেলগৰাকী।
