জুবিন গাৰ্গৰ আকস্মিক তথা ৰহস্যজনক মৃত্যুৰ ঘটনাই ৰাজ্যবাসীক এতিয়াও শোকস্তব্ধ কৰি ৰাখিছে। ৰাজ্যজুৰি এই ঘটনাৰ সঠিক তদন্তৰ দাবী উঠিছে। একে সময়তে ঘটনাৰ তদন্তত চৰকাৰৰ ভূমিকাক লৈয়ো উঠিছে সন্দেহৰ আঙুলি। এনে পৰিস্থিতিত ৰাজ্যৰ শেহতীয়া পৰিস্থিতি অতি স্পৰ্শকাতৰ হৈ পৰিছে। এনে পৰিস্থিতিত জুবিন গাৰ্গৰ ৰহস্যজনক মৃত্যুৰ সঠিক তদন্ত হ’ব নে সেই লৈ শংকিত হৈ পৰিছে সচেতন মহল।
ছিংগাপুৰত অনুষ্ঠিত নৰ্থ-ইষ্ট ইণ্ডিয়া ফেষ্টিভেলত অংশগ্ৰহণ কৰিবলৈ যোৱা জুবিন গাৰ্গৰ এই মৃত্যুৰ ৰহস্য ফদিল কৰা আৰু দোষীসকলক শাস্তি দিয়াৰ দাবীত সৰৱ হৈ পৰিছে অনুৰাগীসকল। কি বিৰোধী কি শাসক দল সকলোৱে নিজ স্বাৰ্থ পৰিহাৰ কৰি সঠিক তদন্তত সহযোগিতা কৰাৰ বিপৰিতে নিকৃষ্ট ৰাজনীতিত নামি পৰিছে। খোদ মুখ্যমন্ত্ৰীয়ে ঘটনা সন্দৰ্ভত অতি তৰল মন্তব্য কৰা পৰিলক্ষিত হৈছে। নিজৰ দাবদ্ধতা দেখুৱাবলৈ গৈ মুখ্যমন্ত্ৰী হিমন্ত বিশ্ব শৰ্মাই কংগ্ৰেছসহ আঞ্চলিক দলসমূহক ঘটনাটোক লৈ ৰাজনীতি কৰাৰ অভিযোগ উত্থাপন কৰিছে।
মুখ্যমন্ত্ৰীৰ এই অভিযোগৰ পাছত বিৰোধী দলৰ দলপতি দেৱব্ৰত শইকীয়াই প্ৰত্যুত্তৰত, মুখ্যমন্ত্ৰীৰ সমালোচনা কৰি কয়, “মুখ্যমন্ত্ৰীয়ে জুবিন গাৰ্গৰ মৃত্যুক লৈ কংগ্ৰেছ দলে ৰাজনীতি কৰা বুলি ক’ব বিচাৰে। কিন্তু মুখ্যমন্ত্ৰীয়ে হে জুবিন গাৰ্গৰ পাৰ্থিৱ শৰীৰ দিল্লী পোৱাৰ দিনাই ৰাজনীতি আৰম্ভ কৰিছিল। একমাত্র ৰাজনীতি কৰিবলৈ মুখ্যমন্ত্ৰীয়ে বড়ো গামোছাখন জুবিনক দিল্লীলৈ অনি শ্ৰদ্ধাঞ্জলি হিচাপে আগবঢ়াইছিল।”
শইকীয়াই আৰু কয়, “মোৰ কোনো জনগোষ্ঠীৰ প্ৰতি অসন্মান নাই। আমাৰ অসমত ৪০-৫০টা জনগোষ্ঠী আছে, প্ৰত্যেকৰে নিজৰ স্বাভিমান আছে। আজি ৬টা জনগোষ্ঠীয়ে আন্দোলন কৰি আছে, তেখেতসকলৰ গামোছাখনতো নিদিলে। কাৰণ ২২ তাৰিখে বড়োলেণ্ডৰ ভোটদানৰ দিন আছিল। বড়োলেণ্ডৰ মানুহক আকৰ্ষিত কৰিবলৈ বড়ো গামোছাখন জুবিন গাৰ্গৰ পাৰ্থিৱ শৰীৰত দিল্লীত শ্ৰদ্ধাঞ্জলি হিচাপে আগবঢ়াইছিল।” মুখ্যমন্ত্ৰীক প্ৰশ্ন কৰি শইকীয়াই কয়, “গতিকে তেওঁ আনক ৰাজনীতি কৰা বুলি কোৱাৰ আগতেই নিজে কেনেকৈ ৰাজনীতি কৰিছে সেয়া নিজে চাব লাগে। জুবিন গাৰ্গৰ মৃত্যুক লৈ আমি ৰাজনীতি কৰা নাই। অসমৰ ৰাইজে জানিব বিচাৰে যে জুবিন গাৰ্গৰ মৃত্যু কেনেকৈ হ’ল আৰু কোনে ষড়যন্ত্ৰ কৰিলে?”
