আগন্তুক লোকসভা নিৰ্বাচনত কাক সমৰ্থন দিয়া হ’ব, নতুবা কাক সমৰ্থন দিলে জনগোষ্ঠীটোৰ সমস্যা সমাধান হ’ব সেই ৰণনীতি তথা চূড়ান্ত সিদ্ধান্ত লোৱাৰ বাবে সদৌ অসম কোচ ৰাজবংশী সন্মিলনীৰ কৰ্ণধাৰ সমিতিয়ে দায়িত্ব ঠেলি দিয়ে সন্মিলনী জিলা সমিতি সমূহক। অৱশ্যে সন্মিলনীৰ জিলা সমিতিসমূহে সমষ্টি ভিত্তিক নিৰ্বাচনী সিদ্ধান্ত গ্ৰহণ কৰাৰ পূৰ্বে কেন্দ্ৰীয় সমিতিৰ সাধাৰণ সম্পাদক হিমু ৰাজবংশী আৰু ভাৰপ্ৰাপ্ত সভাপতি সুনীল কুমাৰ বৰ্মণৰ সৈতে আলোচনা কৰি এই সম্পৰ্কত অনুমতি ল’ব লাগিব বুলি উল্লেখ কৰা হয়।
আনহাতে, কেন্দ্ৰীয় সাধাৰণ সম্পাদক আৰু ভাৰপ্ৰাপ্ত সভাপতিগৰাকীৰ অনুমতি অবিহনে জিলা সমিতিসমূহে নিজাববীয়াকৈ নিৰ্বাচনী সম্পৰ্কত কোনো সিদ্ধান্ত গ্ৰহণ কৰিব নোৱাৰিব। তদুপৰি কোকৰাঝাৰ লোকসভা সমষ্টি সম্পৰ্কত সিদ্ধান্ত গ্ৰহণ কৰাৰ বাবে কৰ্ণধাৰ সমিতিয়ে সন্মিলনীৰ কেন্দ্ৰীয় কাৰ্য্যনিৰ্বাহ সভাক দায়িত্ব অৰ্পন কৰে।
কেন্দ্ৰীয় কাৰ্য্যনিৰ্বাহকে কোকৰাঝাৰ লোকসভা সমষ্টিৰ ওপৰত নিৰ্বাচনী সিদ্ধান্ত গ্ৰহণ কৰি জিলা সমিতিলৈ নিৰ্দেশনা জাৰি কৰিব। সোমবাৰে নিশা গুৱাহাটীৰ কেন্দ্ৰীয় কাৰ্য্যালায়ত অনু্ষ্ঠিত আৰু জনগোষ্ঠীটোৰ দল-সংগঠনৰ মাজত বিভেদ অনাৰ গভীৰ ৰাজনৈতিক ষড়যন্ত্ৰত লিপ্ত হোৱা বাবে গোলকগঞ্জ আৰু বঙাইগাঁও বিধানসভা সমষ্টিৰ দুই বিধায়ক অশ্বিনী ৰায় সৰকাৰ আৰু ফণীভূষণ চৌধুৰীক তীব্ৰ ভাষাৰে গৰিহণা দিয়ে।
গোলকগঞ্জ সমষ্টিৰ বিজেপি বিধায়ক অশ্বিনী ৰায় সৰকাৰ আৰু বঙাইগাঁও সমষ্টিৰ অগপ বিধায়ক ফণী ভূষণ চৌধুৰীয়ে নিজৰ ৰাজনৈতিক লাভালাভৰ স্বাৰ্থত বিগত দিনসমূহত জনগোষ্ঠীয় সমস্যা সমাধানৰ সলনি মৌনব্ৰত পালন ৰি অহাৰ অন্তত শেহতীয়াভাৱে ভোটৰ লালসাত উক্ত দুই বিধায়কে কোচ-ৰাজবংশী দল সংগঠনৰ মাজত বিভেদৰ বীজ সিঁচি জনগোষ্ঠীয় ভোটাৰ ৰাইজক বিভ্ৰান্তিৰ মুখলৈ ঠেলি দিছে।
এক বিবৃতিত সন্মিলনীৰ সাধাৰণ সম্পাদক হিমু ৰাজবংশী আৰু প্ৰচাৰ সম্পাদক কুমাৰ দিলীপ নাৰায়ণ দেৱে কয় যে, জনগোষ্ঠীয় ৰাইজক প্ৰতাৰণা কৰা উক্ত দুই বিধায়কক উচিত প্ৰত্যুত্তৰ দিয়াৰ বাবে ২০০২১ত অনু্ষ্ঠিত হ’বলগীয়া বিধানসভা নিৰ্বাচনত সন্মিলনীৰ উদ্যোগত গোলকগঞ্জ, বঙাইগাঁৱকে ধৰি অন্যান্য সমষ্টিত নিৰ্দলীয় প্ৰাৰ্থীক প্ৰক্ষেপ কৰা হ’ব।
