ব্ৰিটেইনৰ ৰাজনীতি এতিয়া এক ডাঙৰ পৰিৱৰ্তনৰ দিশে গতি কৰিছে বুলি সৰ্বত্ৰে চৰ্চা চলিছে। দেশখনৰ প্ৰধানমন্ত্ৰী কীৰ ষ্টাৰমাৰে অতি সোনকালে নিজৰ পদৰ পৰা পদত্যাগ কৰাৰ সম্ভাৱনা আছে। ব্ৰিটেইনৰ এটা আগশাৰীৰ সংবাদ প্ৰতিষ্ঠানৰ প্ৰতিবেদন অনুসৰি তেওঁ অহা সোমবাৰে নিজৰ পদ এৰিব পাৰে আৰু পৰৱৰ্তী নেতা বাচনি কৰাৰ বাবে সময়সীমা ঘোষণা কৰিব পাৰে। প্ৰতিবেদনত দাবী কৰা হৈছে যে যোৱা ৪৮ ঘণ্টাৰ ভিতৰত তেওঁ চৰকাৰৰ জ্যেষ্ঠ মন্ত্ৰী, ৰাজনৈতিক উপদেষ্টা আৰু দলীয় সতীৰ্থসকলৰ সৈতে এই সন্দৰ্ভত গুৰুত্বপূৰ্ণ আলোচনাত মিলিত হৈছে। ইয়াৰ পিছতে তেওঁ এই সিদ্ধান্তত উপনীত হৈছে যে বৰ্তমানৰ পৰিস্থিতিত তেওঁৰ বাবে এই দায়িত্বত থকাটো আৰু সম্ভৱ নহয়।
উল্লেখ্য যে কীৰ ষ্টাৰমাৰে ৫ জুলাই ২০২৪ তাৰিখে ব্ৰিটেইনৰ প্ৰধানমন্ত্ৰী হিচাপে শপত গ্ৰহণ কৰিছিল। যদিহে তেওঁ অহা সোমবাৰে পদত্যাগ কৰে তেন্তে তেওঁৰ এই কাৰ্যকাল মাত্ৰ ২৩ মাহৰ হ’ব। বৰ্তমান তেওঁ নিজৰ চৰকাৰী গ্ৰাম্য বাসভৱনত পত্নীৰ সৈতে এই সন্দৰ্ভত শেষ আলোচনা চলাই থকা বুলি জানিব পৰা গৈছে। দলীয় জ্যেষ্ঠ নেতাসকলে আশা কৰিছে যে সোমবাৰৰ ভিতৰত তেওঁৰ ভৱিষ্যতক লৈ এটা স্পষ্ট ঘোষণা পোহৰলৈ আহিব। অৱশ্যে প্ৰধানমন্ত্ৰীৰ কাৰ্যালয়ৰ তৰফৰ পৰা এতিয়ালৈকে এই বিষয়ত কোনো আনুষ্ঠানিক মোহৰ মৰা হোৱা নাই। আনহাতে চৰকাৰী এক সূত্ৰই প্ৰকাশ কৰিছে যে প্ৰধানমন্ত্ৰীগৰাকীয়ে বৰ্তমান নিজৰ কামত সম্পূৰ্ণ মনোযোগ দি আছে আৰু তেওঁ পদ এৰিবলৈ বিচৰা নাই।
প্ৰধানমন্ত্ৰীগৰাকীয়ে পদত্যাগ কৰিলে সেয়া ব্ৰিটেইনৰ শাসকীয় দলটোৰ বাবে এক ডাঙৰ ৰাজনৈতিক আঘাত হ’ব পাৰে। ইয়াৰ ফলত দলটোত এক হঠাত নেতৃত্বৰ সংকট দেখা দিব পাৰে। ব্ৰিটেইনৰ সাংবিধানিক নিয়ম অনুসৰি নতুন এজন প্ৰধানমন্ত্ৰী নিৰ্বাচিত নোহোৱালৈকে কীৰ ষ্টাৰমাৰে তত্ত্বাৱধায়ক প্ৰধানমন্ত্ৰী হিচাপে দেশৰ দৈনিক কাম-কাজ চলাই থাকিব পাৰিব যাতে চৰকাৰী কাৰ্যত কোনো ব্যাঘাত নজন্মে। সোমবাৰে দলৰ কাৰ্যনিৰ্বাহক সমিতিয়ে এক জৰুৰী বৈঠক অনুষ্ঠিত কৰি নতুন নেতা নিৰ্বাচনৰ নিয়ম আৰু ভোটগ্ৰহণৰ দিন ধাৰ্য কৰাৰ সম্ভাৱনা আছে। ৰাজনৈতিক বিশেষজ্ঞসকলৰ মতে দেশত যাতে অৰ্থনৈতিক আৰু ৰাজনৈতিক অস্থিৰতাৰ সৃষ্টি নহয়, তাৰ বাবে দলে অতি সোনকালে নতুন নেতা বাচনি কৰিব বিচাৰিব।
কীৰ ষ্টাৰমাৰৰ পদত্যাগৰ পিছত ব্ৰিটেইনৰ পৰৱৰ্তী প্ৰধানমন্ত্ৰী কোন হ’ব তাক লৈও চৰ্চা আৰম্ভ হৈছে। এই দৌৰত এণ্ডী বাৰ্নহাম নামৰ এজন জ্যেষ্ঠ নেতা আটাইতকৈ আগত থকা বুলি জানিব পৰা গৈছে। তেওঁ শেহতীয়াকৈ উপ-নিৰ্বাচনত বিৰোধী দলৰ প্ৰাৰ্থীক পৰাস্ত কৰি সংসদলৈ ঘূৰি আহিছে। যাৰ বাবে দলৰ ভিতৰত তেওঁৰ গুৰুত্ব বহুত বৃদ্ধি পাইছে আৰু তেওঁকেই পৰৱৰ্তী প্ৰধানমন্ত্ৰী হিচাপে প্ৰক্ষেপ কৰাৰ সম্ভাৱনা প্ৰকট হৈ পৰিছে।
