অসমৰ শিক্ষাৰ প্ৰাণকেন্দ্ৰ গুৱাহাটী বিশ্ববিদ্যালয়ত ছাত্ৰ-ছাত্ৰী আৰু যুৱ প্ৰজন্মৰ কিতাপ পঢ়াৰ আগ্ৰহ বৃদ্ধি কৰাৰ লক্ষ্যৰে মঙলবাৰৰ পৰা আৰম্ভ হৈছে বিশ্ববিদ্যালয় সাহিত্য উৎসৱ।
তিনিদিনীয়া সাহিত্য উৎসৱখনি স্নাতকোত্তৰ ছাত্ৰ সন্থাৰ উদ্যোগত শ্বহীদ বেদী বাকৰিত অনুষ্ঠিত কৰা হৈছে।
সাহিত্য উৎসবৰ লগত সংগতি ৰাখি গ্ৰন্থমেলাৰো আয়োজন কৰিছে উদ্যোক্তা সমিতিয়ে। বিশ্ববিদ্যালয়ৰ উপাচাৰ্য্য ড0 মৃদুল হাজিৰকাই গ্ৰন্থমেলাৰ দ্বাৰ উন্মোচন কৰে। আনহাতে, বিশ্ববিদ্যালয়ৰ ছাত্ৰ-ছাত্ৰীৰ সৃষ্টিৰাজিৰে অনুষ্ঠিত কৰা প্ৰদৰ্শনীখনে সকলোৰে দৃষ্টি আকৰ্ষণ কৰিছে।
সংবাদিক নিতুমণি শইকীয়াই উদ্বোধনী অনুষ্ঠানত অংশলৈ স্নাতকোত্তৰ ছাত্ৰ সন্থাৰ এনে পদক্ষেপে বিশ্ববিদ্যালয়ৰ ছাত্ৰ সমাজৰ উত্তোৰণত গুৰুত্বপূৰ্ণ ভূমিকা পালন কৰিব বুলি উল্লেখ কৰি সস্তীয়া সাহিত্য চৰ্চা কৰি সাহিত্যিক হোৱাৰ বাসনা ত্যাগ কৰি অধ্যায়ন মুখি হৈ অসমীয়া সাহিত্যলৈ বৰঙণি যোগোৱাৰ বাবে আহ্বান জনায়।
সাহিত্য উৎসৱত গল্প, কবিতা লিখাৰ উপৰিও পোষ্টাৰ মেকিং, মুখা প্ৰস্তত কৰা আদি বিভিন্ন প্ৰতিযোগিতা অনুষ্ঠিত কৰা হ’ব বুলি স্নাতকোত্তৰ ছাত্ৰ সন্থাৰ সাধাৰণ সম্পাদক নয়ন জ্যোতি গগৈয়ে জানিব দিয়ে। বিশ্ববিদ্যালয়ৰ ছাত্ৰ-ছাত্ৰীৰ লগতে দাঁতি কাষৰীয়া অঞ্চলৰ সাহিত্য অনুৰাগী সকলেও সাহিত্য উৎসৱলৈ এপাক আহি মনে বিছৰা কিতাপখনৰ সুবাস বিছাৰিছে।
