গোলাঘাট নিৰ্বাচন জিলাত বৃহস্পতিবাৰৰ পৰা বিশেষভাৱে সক্ষম, ৮০ বছৰ বয়সৰ উৰ্ধৰ ভোটদাতা আৰু অত্যাৱশ্যকীয় সেৱাৰ সৈতে জড়িত ভোটদাতাৰ প’ষ্টেল বেলটযোগে ভোটগ্ৰহণ আৰম্ভ হৈছে।
গোলাঘাট নিৰ্বাচন জিলাৰ অন্তৰ্গত ৯৬ নং খুমটাই সমষ্টিত আজি ভোটগ্ৰহণকাৰী দলে ঘৰে ঘৰে গৈ বিশেষভাৱে সক্ষম আৰু ৮০ বছৰ বয়সৰ উৰ্ধৰ ভোটদাতাৰ প’ষ্টেল বেলটসমূহ সংগ্ৰহ কৰে।
সমষ্টিটোত ৪৪১ গৰাকী ৮০ উৰ্ধৰ আৰু ৯৮ গৰাকী বিশেষভাৱে সক্ষম ভোটদাতাৰ নাম প’ষ্টেল বেলটৰ বাবে বৈধ পোৱা গৈছিল।
পুৱা ৮ বজাৰ পৰা সন্ধিয়া ৬ বজালৈ ভোটগ্ৰহণ সম্পন্ন হয়। প্ৰতিটো ভোটগ্ৰহণকাৰী দলত এজন চুপাৰভাইজৰ, এজন চেক্টৰ বিষয়া, এজন মাইক্ৰ’ অৱজাৰ্ভাৰ, ভিডিঅ’গ্ৰাফাৰ আৰু আৰক্ষীৰ লোক নিয়োগ কৰা হয়।
উল্লেখযোগ্য যে গোলাঘাট নিৰ্বাচন জিলাত প’ষ্টেল বেলটযোগে ১,৪৬৫ গৰাকী বিশেষভাৱে সক্ষম আৰু ৮০ বছৰ বয়সৰ উৰ্ধৰ ভোটদাতাই ভোটদান কৰিব পাৰিব।
একেদৰে শুকুৰবাৰেও গোলাঘাট সমষ্টিত ভোটগ্ৰহণ আৰম্ভ হৈছে। উল্লেখ্য যে, আজি ভোটগ্ৰহণ সম্পূৰ্ণ নহ’লে ২০ মাৰ্চতো প’ষ্টেল বেলট সংগ্ৰহ কৰা হ’ব।
দুয়োটা সমষ্টিত ৮০ বছৰ বয়সৰ উৰ্ধৰ ১,১৩৯ গৰাকী আৰু বিশেষভাৱে সক্ষম ৩২৬ গৰাকী ভোটদাতাৰ নাম প’ষ্টেল বেলটযোগে ভোটদানৰ বাবে বৈধ পোৱা গৈছে।
গোলাঘাট সমষ্টিত আবেদন কৰা ৬৯৮ গৰাকী ৮০ উৰ্ধৰ ভোটদাতা আৰু ২২৮ গৰাকী বিশেষভাৱে সক্ষম ভোটদাতাই প’ষ্টেল বেলটযোগে ভোট দিব পাৰিব।
ইফালে গোলাঘাট নিৰ্বাচন জিলাৰ অধীনৰ ৯৫ নং গোলাঘাট আৰু ৯৬ নং খুমটাই বিধানসভা সমষ্টিৰ অত্যাৱশ্যকীয় সেৱাৰ সৈতে জড়িত ভোটদাতাসকলৰ বাবেও আজিৰে পৰা প’ষ্টেল বেলটযোগে ভোটগ্ৰহণ আৰম্ভ হৈছে।
নিৰ্বাচন আয়োগে ইতিমধ্যে ১১টা সেৱাক অত্যাৱশ্যকীয় সেৱা হিচাপে নিৰ্ধাৰণ কৰিছে।
গোলাঘাট নিৰ্বাচন জিলাৰ প’ষ্টেল বেলটযোগে ভোটদানৰ বাবে আবেদন কৰা ভোটদাতাসকলে আজি আৰু ২০ মাৰ্চত পুৱা ১০ বজাৰ পৰা বিয়লি ৫ বজালৈ জিলা উপায়ুক্তৰ কাৰ্যালয়ত স্থাপন কৰা প’ষ্টেল বেলট কেন্দ্ৰত আহি ভোটদান কৰিব পাৰিব।
