কাৰাটে খেলত দুটাকৈ সোণৰ পদক অৰ্জন কৰা ৰাঁচীৰ বিমলা মুণ্ডাই জীৱিকাৰ তাড়নাত হাড়িয়া (দেশীয় মদ) বিক্ৰী কৰা ঘটনা পোহৰলৈ অহাৰ পিছতে দেশজুৰি তীব্ৰ প্ৰতিক্ৰিয়াৰ সৃষ্টি হৈছে।
এই খবৰ ছ’চিয়েল মিডিয়াত ভাইৰেল হোৱাৰ পিছতে ৰাজ্যখনৰ মুখ্য মন্ত্ৰী হেমন্ত ছোৰেণে টুইটাৰৰ জৰিয়তে বিমলা মুণ্ডাক সকলো প্ৰকাৰৰ সহায় আগবঢ়োৱাৰ কথা প্ৰকাশ কৰে।
টুইটটোত মুখ্য মন্ত্ৰী গৰাকীয়ে ৰাঁচীৰ উপায়ুক্ত আৰু ক্ৰীড়া সচিবক নিৰ্দেশ দি বিমলাক সহায় কৰিবলৈ কয়।
মুখ্য মন্ত্ৰীয়ে সংবাদ মাধ্যমক জানিবলৈ দি কয় যে অতি শীঘ্ৰে ৰাজ্যত নতুন ক্ৰীড়া নীতি বলবৎ হ’ব আৰু ইয়াৰ জৰিয়তে কেলুৱৈ সকলৰ ভৱিষ্যত সুৰক্ষিত হ’ব।
তেওঁ লগতে কয় যে ৰাজ্য চৰকাৰে এই সন্দৰ্ভত এটা প’ৰ্টেল তৈয়াৰ কৰি আছে ইয়াৰ জৰিয়তে খেলুৱৈসকলে নিজৰ নিজৰ অভিযোগ সমূহ দাখিল কৰিব পাৰিব।
কাৰাটেৰ ব্লেক বেল্ট বিমলা মুণ্ডা কানকেৰ পত্থলগোন্দাৰ নিবাসী। তেওঁ নেশ্যনেল চেম্পিয়নশ্বিপত দুটাকৈ স্বৰ্ণ পদক অৰ্জন কৰি ৰাজ্যবাসীক গৌৰৱান্বিত কৰিছিল।
২০০৮ চনত প্ৰথমবাৰৰ বাবে জিলা পৰ্যায়ৰ এখন টুৰ্ণামেণ্টত স্বৰ্ণ পদক অৰ্জন কৰিছিল আৰু দ্বিতীয়বাৰৰ বাবে ২০০৯ চনত উৰিষ্যাত স্বৰ্ণ পদক লাভ কৰে।
উল্লেখ্য যে তেওঁ বিভিন্ন প্ৰতিযোগিতাত ব্যাপক সফলতা অৰ্জন কৰাৰ পিছতো স্থায়ীভাৱে সংস্থাপন লাভ নকৰিলে।
আৰ্থিকভাৱে দুৰ্বল পৰিয়ালটোৰ উপাৰ্জনৰ পথ বন্ধ হৈ পৰাত উপায়হীন হৈ বিমলাই ঘৰ চলাবলৈ হাড়িয়া বিক্ৰী কৰা আৰম্ভ কৰে।
বিমলাই ক্ৰীড়া স্কলাৰশ্বিপ নাইবা সংস্থাপন লাভ কৰিব বুলি আশা কৰি আছিল যদিও একো নহ’ল। এই সন্দৰ্ভত তেওঁ কয় যে কেৱল কাৰাটে খেলুৱৈয়ে নহয় আন আন খেলুৱৈসকলকো চৰকাৰে গুৰুত্ব প্ৰদান নকৰে।
