দক্ষিণ-পূব এছিয়াৰ দেশ ফিলিপাইনছত এক ভয়াৱহ ভূমিকম্পই জোকাৰি গৈছে। সোমবাৰে পুৱা অনুভূত হোৱা ভূমিকম্পৰ তীব্ৰতা ৰিখটাৰ স্কেলত আছিল ৮.২। কঁপনিৰ তীব্ৰতা ইমানেই প্ৰবল আছিল যে বহু ঘৰ ভাঙি পৰিছে। ইতিমধ্যে এই ঘটনাত এজনৰ মৃত্যুৰ খবৰ পোৱা গৈছে। আন বহু লোক আহত হৈছে। তদুপৰি এই বৃহৎ ভূমিকম্পৰ বাবে ছুনামীৰ সতৰ্কতা জাৰি কৰা হৈছে।
জানিব পৰা মতে, ভূমিকম্পৰ কেন্দ্ৰবিন্দু ফিলিপাইনছৰ মিন্দানাও দ্বীপৰ ওচৰত আছিল। এই প্ৰবল ভূমিকম্পৰ লগে লগে ফিলিপাইনছ, ইণ্ডোনেছিয়া, জাপানকে ধৰি এছিয়াৰ উপকূলীয় অঞ্চলত প্ৰবল ছুনামী সতৰ্কতা জাৰি কৰা হৈছে।
ইউনাইটেড ষ্টেটছ জিঅ’লজিকেল চাৰ্ভে (USGS) আৰু জাৰ্মান ৰিচাৰ্চ চেণ্টাৰ ফৰ জিঅ’ছায়েন্সেছ (GFZ)ৰ এক প্ৰতিবেদন অনুসৰি স্থানীয় সময় পুৱা ৭.৪০ বজাত প্ৰথমটো ভূমিকম্প অনুভুত হয়। চুবুৰীয়া ইণ্ডোনেছিয়াৰ উত্তৰ চুলাওৱেছি আৰু উত্তৰ মালুকু প্ৰদেশতো কম্পন অনুভৱ কৰা হৈছিল। এই বৃহৎ ভূমিকম্পৰ পিছত ফিলিপাইনছ চৰকাৰে নিজৰ নাগৰিকৰ বাবে সতৰ্কবাণী জাৰি কৰিছে।
দেশৰ দক্ষিণ উপকূলীয় অঞ্চলত বসবাস কৰা নাগৰিকসকলক উপকূলৰ পৰা আঁতৰত নিৰাপদ স্থানলৈ যাবলৈ কোৱা হৈছে। চৰকাৰে বাসিন্দাসকলক শীঘ্ৰে ওখ ঠাইত আশ্ৰয় ল’বলৈ কৈছে। এই ভূমিকম্পৰ ফলত ফিলিপাইনছৰ উপকূলীয় অঞ্চলত ৩ মিটাৰ পৰ্যন্ত ওখ ছুনামী ঢৌৰ সৃষ্টি হ’ব পাৰে বুলি আশংকা কৰা হৈছে। ইণ্ডোনেছিয়া, মালয়েছিয়া, টাইৱান, গুৱাম, পাপুয়া নিউগিনি আৰু পশ্চিম প্ৰশান্ত মহাসাগৰীয় অঞ্চলৰ কেইবাখনো দেশতো ছুনামীৰ ঢৌয়ে আঘাত হানিব বুলি আশংকা কৰা হৈছে।
দেওবাৰে নিশা ভূটানতো এক বৃহৎ ভূমিকম্পৰ জোকাৰণি অনুভুত হয়। ৰিখটাৰ স্কেলত এই ভূমিকম্পৰ প্ৰাবল্য আছিল ৫.৮। ভূমিকম্পৰ কেন্দ্ৰবিন্দু আছিল ৰাজধানী থিম্ফু। যিহেতু ভূমিকম্পৰ কেন্দ্ৰবিন্দু ভূটানৰ সীমান্তৱৰ্তী অঞ্চলত আছিল, সেয়েহে ভাৰত, চীন, বাংলাদেশ আৰু নেপালৰ কেইবাটাও অঞ্চলত এই কম্পন অনুভৱ কৰা হৈছিল। অসমৰ লগতে উত্তৰ বংগ আৰু মেঘালয়ৰ কিছু অঞ্চলতো কম্পন অনুভূত হয়।
