অসম বিশ্ববিদ্যালয়ত অসমীয়া ছাত্ৰ-ছাত্ৰীক অধ্যয়ন কৰিবলৈ নিদিয়াৰ হুংকাৰ দিয়া বৰাকৰ বিতৰ্কিত অধিবক্ত তথা প্ৰাক্তন ছাত্ৰনেতা প্ৰদীপ দত্তৰয়ে এইবাৰ উভতি ধৰিলে অসম সাহিত্য সভাৰ সভাপতিক।
অসম সাহিত্য সভাৰ সভাপতি পৰমানন্দ ৰাজবংশীয়ে শিল্পী দিৱসৰ দিনা শিলচৰত অসম বিশ্ববিদ্যালয় প্ৰতিষ্ঠা সন্দৰ্ভত কৰা মন্তব্যক তীব্ৰ সমালোচনা কৰিছে দত্তৰয়ে।
উল্লেখযোগ্য যে দুদিনমান পূৰ্বে জাতিধ্বংসী নাগৰিকত্ব সংশোধনী বিধেয়কখনৰ বিৰুদ্ধে প্ৰতিবাদ কৰা বাবেই অসম বিশ্ববিদ্যালয়ত অসমীয়া ছাত্ৰ-ছাত্ৰীক অধ্যয়ন কৰিবলৈ নিদিয়াৰ হুংকাৰ দিছিল বিতৰ্কিত নেতাজনে।
সেই ঘটনাৰ পিছতে বিজেপিৰ পৰা বহিষ্কৃত হৈছিল দত্তৰয়। তাৰ পিছতো নিজৰ মুখ বন্ধ কৰা নাই বাঙালী উগ্ৰ জাতীয়তাবাদী নেতাজনে।
১৯ জানুৱাৰিত নিজা বাসগৃহত সংবাদ মাধ্যমক সম্বোধন কৰি দত্তৰয়ে কয়, “পৰমানন্দ ৰাজবংশীয়ে কৰা মন্তব্য অপ্ৰাসংগিক, অসম বিশ্ববিদ্যালয়ৰ প্ৰতিষ্ঠাৰ ক্ষেত্ৰত অসম সাহিত্য সভাৰ কোনো ধৰণৰ অবদান নাই”।
তেওঁ “অসম সাহিত্য সভাই বিশ্ববিদ্যালয়খন স্থাপনৰ বিৰোধিতাহে কৰিছিল” বুলিও মন্তব্য কৰে।
“পৰমানন্দ ৰাজবংশীয়ে অসম বিশ্ববিদ্যালয়ত বৰাক উপত্যকাৰ খিলঞ্জীয়া মানুহৰ কথা কওঁতে মণিপুৰী, ৰাজবংশী, খাচি আৰু ডিমাচাসকলৰ কথাহে উল্লেখ কৰে। কিন্তু হিন্দুৱেই হওক অথবা মুচলমানেই হওক, বাঙালীসকলৰ কথা উল্লেখ নকৰিলে, অতীতত এই অঞ্চলটো চিলেট জিলাৰ অংশ হিচাপে থকা সত্ত্বেও”। প্ৰদীপ দত্ত ৰয়ে কয়।
ইয়াক তেওঁ ৰাজবংশীৰ ডাঙৰ ভুল আৰু বুৰঞ্জীৰ জ্ঞানৰ অভাৱ বুলি অভিহিত কৰে।
প্ৰদীপ দত্তৰয়ে নৰ্থ-ইষ্ট নাওক কয় যে গুৱাহাটীত পঢ়ি থকা সময়ত তেওঁ শিক্ষা প্ৰতিষ্ঠানবোৰত আছু আৰু গণ সংগ্ৰাম পৰিষদৰ বাঙালী বিদ্বেষ নিজ চকুৰে দেখিছিল।
“আমি বিশ্ববিদ্যালয়খন প্ৰতিষ্ঠাৰ বাবে ১৯৮৩ৰ পৰা ১৯৯৩লৈ যুঁজিছিলো, যাৰ বাবেই এই বিশ্ববিদ্যালয়খনৰ ক্ষেত্ৰত আমি কিছু আৱেগিক।” দত্তৰয়ে কয়।
তেওঁ ব্ৰহ্মপুত্ৰ উপত্যকাৰ ছাত্ৰ-ছাত্ৰী সকলকো সদায় আদৰণি জনাবলৈ সাজু আছে বুলি জানিবলৈ দিয়ে। বৰ্তমান বিশ্ববিদ্যালয়খনত ৩০০-তকৈ অধিক অসমীয়া ছাত্ৰ-ছাত্ৰী থকাৰ কথাটো আৰু লগতে বিশ্ববিদ্যালয় ছাত্ৰ একতা সভাৰ সভাপতি অভিনন্দন মহন্ত অসমীয়া ল’ৰা বুলি উনুকিয়াই দিয়ে।