নাগৰিকত্ব সংশোধনী বিধেয়কক লৈ ৰাজ্যজুৰি প্ৰতিবাদ তীব্ৰতৰ হোৱাৰ সময়তে সাম্প্ৰদায়িক মন্তব্যৰে বিভাজন সৃষ্টি কৰিব খোজা বৰাকৰ প্ৰাক্তন ছাত্ৰ নেতা তথা বিজেপি নেতা প্ৰদীপ দত্ত ৰয়ক অৱশেষত বিজেপিৰ পৰা বহিস্কৃত কৰা হ’ল। ১৩ জানুৱাৰিত বিজেপিৰ ৰাজ্যিক সভাপতি ৰণজিৎ দাসে বিজেপি নেতাজনক দলটোৰ প্ৰাথমিক সদস্য পদৰ পৰা বৰ্খাস্ত কৰে।
‘দলৰ নীতি আৰু স্থিতিৰ বিৰূদ্ধে অৱস্থান গ্ৰহণ কৰা আৰু দলীয় অনুশাসন ভংগ কৰাৰ অভিযোগত’ বিতৰ্কিত নেতাজনক দলৰ পৰা বৰ্খাস্ত কৰা বুলি ৰাজ্যিক বিজেপিৰ সাধাৰণ সম্পাদক দিলীপ শইকীয়াৰ স্বাক্ষৰিত পত্ৰৰ জৰিয়তে জানিবলৈ দিয়ে।
উল্লেখ্য যে, নাগৰিকত্ব সংশোধনী বিধেয়কৰ বিৰূদ্ধে অসম বিশ্ববিদ্যালয়ত অধ্যয়নৰত একাংশ অসমীয়া ছাত্ৰ-ছাত্ৰীয়ে ৯ জানুৱাৰীত মমবাতি জ্বলাই প্ৰতিবাদ সাব্যস্ত কৰিছিল। ইয়াৰ পাছতেই প্ৰদীপ দত্ত ৰয়ে বিশ্ববিদ্যালয়ত অধ্যয়নৰত অসমীয়া ছাত্ৰ-ছাত্ৰীসকলৰ বিৰূদ্ধে সৰৱ হৈ পৰাৰ উপৰি এক প্ৰকাৰ ছাত্ৰ-ছাত্ৰীসকলক ভাবুকি প্ৰদান কৰিছিল।
তেওঁৰ এই মন্তব্যৰ বাবে সমগ্ৰ ৰাজ্যতে খিলঞ্জীয়া অসমীয়াৰ ক্ষোভ দুগুণে বৃদ্ধি পোৱাৰ লগতে ঠায়ে ঠায়ে তেওঁৰ বিৰুদ্ধে এজাহাৰ দাখিল হোৱাত স্বাভাৱিকতে বিজেপি নেতৃত্ব অশ্বস্তিত পৰা পৰিলক্ষিত হৈছিল।
তেওঁ বিধেয়কৰ বিৰোধিতা কৰা ছাত্ৰ-ছাত্ৰী সকলক ‘বৰাক উপত্যকা বিদ্বেষী আখ্যা দিয়াৰ লগতে ভৱিষ্যতে বিশ্ববিদ্যালয়খনত অসমীয়া ছাত্ৰ-ছাত্ৰীক নামভৰ্তি কৰিব নোৱাৰাৰ ৱ্যৱস্থা কৰিব বুলিও ভাবুকি প্ৰদান কৰিছিল।
উল্লেখ্য যে, এই মন্তব্যৰ উপৰি তেওঁ সময়ে সময়ে পৃথক বৰাকৰ দাবী উত্থাপন কৰাৰ লগতে কেতবোৰ বিতৰ্কিত মন্তব্যৰে বৰাক-ব্ৰহ্মপুত্ৰৰ মাজত বিভাজনৰ সৃষ্টি কৰিব খোজা পৰিলক্ষিত হয়।
