বঢ়মপুৰৰ পৰা প্ৰাক্তন মুখ্যমন্ত্ৰী প্ৰফুল্ল কুমাৰ মহন্তই প্ৰতিদ্বন্দ্বিতা কৰিবই। ইতিমধ্যে মহন্তৰ হৈ তেওঁৰ সমৰ্থকসকলে মনোনয়ন পত্ৰ সংগ্ৰহ কৰিছে।
ইপিনে, অসম গণ পৰিষদ প্ৰগতিশীলৰ নেতা প্ৰণৱ গোস্বামীৰ নেতৃত্বত যোৱা এটা দলে আজি বিয়লি ভাগত প্ৰাক্তন মুখ্যমন্ত্ৰীগৰাকীক সাক্ষাৎ কৰে।
সুত্ৰ অনুসৰি মহন্ত অসম গণ পৰিষদ প্ৰগতিশীলৰ প্ৰাৰ্থী হোৱাটো একপ্ৰকাৰ নিশ্চিত হৈছে।
তদুপৰি, কা বিৰোধী শক্তি হিচাপে কংগ্ৰেছ মহাজোঁটৰ সৈতে মহাজোঁটত চামিল হ’ব অসম গণ পৰিষদ প্ৰগতিশীল। এই কথা সংবাদ মাধ্যমৰ আগত ঘোষণা কৰিছে প্ৰণৱ গোস্বামীয়ে।
ইপিনে, কা বিৰোধী শক্তিৰ ভোট বিভাজন বিচৰা নাই অসম গণ পৰিষদ প্ৰগতিশীলে। ইয়াৰ লগতে কা বিৰোধী শক্তিৰ সৈতে প্ৰফুল্ল কুমাৰ মহন্ত আছে বুলি তেওঁ নিজে কালি সংবাদ মাধ্যমৰ আগত স্পষ্ট কৰি দিছে।
এই কথাৰ পৰা স্পষ্ট হৈ পৰিছে মহন্ত কংগ্ৰেছ মহাজোঁটৰ প্ৰাৰ্থী হোৱাটো এক প্ৰকাৰ নিশ্চিত।
ইপিনে, প্ৰদেশ কংগ্ৰেছৰ সভাপতি ৰিপুন বৰা আৰু সাংসদ প্ৰদ্যুত বৰদলৈয়ে মহন্তৰ সৈতে ফোনযোগে মহাজোঁটত অন্তৰ্ভুক্ত হোৱা-নোহোৱা সন্দৰ্ভত আলোচনা হোৱা বুলি সংবাদ মাধ্যমৰ আগত স্পষ্ট হৈ পৰিছে।
এই চৰ্চা চলি থকাৰ মাজতে কংগ্ৰেছলৈ নামি আহিছে আন এক বিপদ। সমষ্টিটোৰ পৰা কংগ্ৰেছৰ প্ৰাৰ্থিত্ব প্ৰত্যাশী আছিল সুৰেশ বৰা।
বৰাই ইতিমধ্যে কংগ্ৰেছৰ হৈ সমষ্টিটোৰ বিভিন্ন প্ৰান্তত গৈ প্ৰচাৰ চলাই আছে।
২০১৬ বৰ্ষৰ বিধান সভা নিৰ্বাচনত মাত্ৰ ৫১৬৯ টা ভোটত বিজেপি মিত্ৰজোঁটৰ প্ৰাৰ্থী প্ৰফুল্ল কুমাৰ মহন্তৰ হাতত পৰাজিত হৈছিল সুৰেশ বৰা।
কিন্তু এইবাৰ বিজেপিয়ে সমষ্টিটোত প্ৰাৰ্থী হিচাপে প্ৰক্ষেপ কৰিছে জিতু গোস্বামীক। জিতু গোস্বামীৰো ভেটি সমষ্টিটোত নথকা নহয়।
এনেক্ষেত্ৰত যদি কংগ্ৰেছৰ প্ৰাৰ্থিত্ব প্ৰত্যাশী সুৰেশ বৰাক সমষ্টিটোত টিকট প্ৰদান নকৰে তেন্তে ‘চিপৰাং’ ৰাজনীতিৰ সৃষ্টি হৈ ভোট বিভাজন হোৱাটো এক প্ৰকাৰৰ নিশ্চিত। সুত্ৰ অনুসৰি মহন্তই বঢ়মপুৰৰ পৰা মিত্ৰজোঁটৰ হৈ টিকট লাভ কৰিব বুলি চৰ্চা চলাৰ সময়তে হতাশ হৈ পৰিছে সুৰেশ বৰা।
ইয়াক লৈ এতিয়া সমষ্টিটোৰ ক্ষেত্ৰত একপ্ৰকাৰ বিপাঙত পৰিছে প্ৰদেশ কংগ্ৰেছৰ নেতৃত্ব। তাৰ মাজতে দিল্লীলৈ প্ৰদেশ কংগ্ৰেছে প্ৰাৰ্থীৰ তালিকা প্ৰেৰণ কৰিছে বুলি জানিব পৰা গৈছে।
আনহাতে, প্ৰফুল্ল কুমাৰ মহন্ত এক সংগ্ৰামী সত্তা বুলি দাবী কৰে পত্নী পদ্মশ্ৰী জয়শ্ৰী গোস্বামীয়ে।
তেওঁ আৰু কয় ‘তেওঁ সদায় বঢ়মপুৰবাসী ৰাইজৰ লগত থাকিব। অসমীয়া জাতীয় জীৱনৰ প্ৰতি তেওঁৰ চেতনা-দায়িত্ববোধ কেতিয়াও এৰাব নোৱাৰে।
ইপিনে, কা বিৰোধী স্থিতিত থকা কেইবাটাও ৰাজনৈতিক দলে মহাজোঁট গঠন কৰিছে বুলি উল্লেখ কৰি গোস্বামীয়ে কয় ‘তেওঁলোকৰ চিন্তা-চৰ্চা অসমৰ জাতীয় চিন্তাৰ হকে গৈছে, বিপক্ষে নহয়। মহন্তৰ সৈতে তেওঁলোকৰ স্থিতিৰ সহমত আছে বা মিলিছে গতিকে অসমৰ ৰাইজেও সকলো একেলগে থকাটো বিচাৰিছে। মহাজোঁটৰ সৈতে পৰিস্থিতি সাপেক্ষে তেওঁ চামিল হ’ব।‘
