আজি ৰাতিপুৱাৰে পৰা অনুষ্ঠিত হোৱা বিটিচি নিৰ্বাচনৰ ভোট গণনাত বিটিচিৰ জনসাধাৰণে পৰিৱৰ্তন বিচাৰি নতুন ৰাজনৈতিক শক্তিক বিকল্প হিচাপে বিচৰাটো পৰিলক্ষিত হৈছে।
বিটিচি নিৰ্বাচনৰ ৪০ খন আসনৰ ভোট গণনাত বৰ্তমানলৈ প্ৰমোদ বড়ো নেতৃত্বাধীন য়ুপিপিএলে ২৪ খন আসনত, হাগ্ৰামা মহিলাৰী নেতৃত্বাধীন বিপিএফ দলে ৮ খন আসনত, বিজেপিয়ে ৬ খন আসনত, কংগ্ৰেছ দলে এখন আৰু অন্যান্য দলে এখন আসনত আগবাঢ়ি আছে।
চিৰাং জিলাত য়ুপিপিএলে সাতখন আসনৰ ভিতৰত ছয়খন আসনতে অগ্ৰগতি লাভ কৰি আছে।
কোকৰাঝাৰৰ ১২ খন আসনৰ ভিতৰত য়ুপিপিএলে ছয়খনত, বিপিএফে চাৰিখনত, বিজেপি আৰু কংগ্ৰেছে এখনকৈ আসনত আগবাঢ়ি আছে।
আনহাতে, বাক্সাৰ ১১ খন আসনৰ ভিতৰত য়ুপিপিএলে ৭ খনত, বিজেপিয়ে ২ খনত, বিপিএফ আৰু অন্যান্যই এখনত আগবাঢ়ি আছে।
ওডালগুৰি জিলাৰ ১০ খন আসনৰ ভিতৰত য়ুপিপিএলে ৬ খনত, বিপিএফে এখনত আৰু বিজেপিয়ে তিনিখনত আগবাঢ়ি আছে।
বিটিআৰৰ চাৰিখন জিলা ক্ৰমে কোকৰাঝাৰ, চিৰাং, বাক্সা আৰু ওডালগুৰিৰ মুঠ ১০ টা ভোট গণনা কেন্দ্ৰত ৰাতিপুৱা ৮ বজাৰ পৰা ভোট গণনা প্ৰক্ৰিয়া আৰম্ভ হৈছে।
বৰ্তমানলৈ বিপিএফ প্ৰধান হাগ্ৰামা মহিলাৰী আৰু য়ুপিপিএল প্ৰধান প্ৰমোদ বড়োই নিজ সমষ্টিত আগবাঢ়ি আছে।
বিটিচি নিৰ্বাচনত ৪০ সমষ্টিত প্ৰতিদ্বন্দ্বিতা আগবঢ়োৱা মুঠ ২৪১ গৰাকী প্ৰাৰ্থীৰ ৰাজনৈতিক ভবিষ্যত আজি নিৰ্ণয় হ’ব।
বিটিচিত ৭ ডিচেম্বৰত প্ৰথম পৰ্যায়ৰ আৰু ১০ ডিচেম্বৰত দ্বিতীয় পৰ্যায়ৰ ভোটদান অনুষ্ঠিত হৈছিল।
