অসমৰ শৈক্ষিক তথা বিজ্ঞান জগতৰ বাবে এক ঐতিহাসিক সাফল্য কঢ়িয়াই আনিছে জাগীৰোড মহাবিদ্যালয়ৰ পদাৰ্থ বিজ্ঞান বিভাগৰ সহকাৰী অধ্যাপক ড৹ প্ৰাঞ্জল শৰ্মাই। অধ্যাপগৰাকীলৈ আগবঢ়োৱা হৈছে বিশ্বৰ অন্যতম সন্মানীয় বৈজ্ঞানিক স্বীকৃতি ‘ব্ৰেকথ্ৰু পুৰস্কাৰ-২০২৫’ (Breakthrough Prize 2025)। ছুইজাৰলেণ্ডৰ জেনেভাস্থিত বিশ্ববিখ্যাত গৱেষণা কেন্দ্ৰ ‘চিইআৰএন’ (CERN)-ৰ আন্তঃৰাষ্ট্ৰীয় পৰীক্ষাগাৰ ‘এএলআইচিই’ (ALICE)-ত আগবঢ়োৱা অনবদ্য অৱদানৰ বাবে তেওঁক মৌলিক পদাৰ্থ বিজ্ঞানৰ এই বিশ্বমানৰ পুৰস্কাৰ প্ৰদান কৰা হৈছে।
বিশ্বজুৰি মৌলিক গৱেষণাৰ ক্ষেত্ৰত অসাধাৰণ অৱদান আগবঢ়োৱা বিজ্ঞানীসকলক প্ৰদান কৰা এই পুৰস্কাৰত মাননি হিচাপে আগবঢ়োৱা হৈছে মুঠ ৩০ লাখ আমেৰিকান ডলাৰ। উল্লেখযোগ্য যে, এই সন্মানীয় বঁটা চিইআৰএন-ৰ বিভিন্ন গৱেষণা প্ৰকল্পৰ সৈতে জড়িত বিশ্বৰ প্ৰায় ১৩,০০০ গৱেষক বিজ্ঞানীৰ মাজত বিতৰণ কৰা হৈছে। ড৹ শৰ্মা গুৱাহাটী বিশ্ববিদ্যালয়ৰ অধ্যাপক ড৹ বুদ্ধদেব ভট্টাচাৰ্যৰ নেতৃত্বত গঠিত ‘এএলআইচিই-জিইউ’ (ALICE-GU) বিজ্ঞানী দলটোৰ এজন সক্ৰিয় সদস্য। তেওঁলোকে মূলত অতি কম দূৰত্বৰ আৰু চৰম পৰিস্থিতিত থকা পদাৰ্থৰ অৱস্থাৰ ওপৰত দীৰ্ঘদিন ধৰি গৱেষণা চলাই আহিছে।
প্ৰকাশিত তথ্য অনুসৰি ড৹ প্ৰাঞ্জল শৰ্মা জড়িত হৈ থকা এই গৱেষণাৰ মূল লক্ষ্য হ’ল বিশ্বব্ৰহ্মাণ্ডৰ মৌলিক কণিকা আৰু শক্তিৰ পাৰস্পৰিক সম্পৰ্ক বৰ্ণনা কৰা ‘ষ্টেণ্ডাৰ্ড মডেল’ তত্ত্বৰ বিশ্লেষণ। ষ্টেণ্ডাৰ্ড মডেলৰ অন্তৰ্ভুক্ত ‘কিউচিডি’ তত্ত্ব অনুসৰি, সাধাৰণ অৱস্থাত পদাৰ্থৰ মূল উপাদান কোৱাৰ্ক আৰু গ্লুৱনবোৰ ‘এইচএডিআৰঅএন’ (HADRON)-ৰ ভিতৰত আবদ্ধ হৈ থাকে। কিন্তু প্ৰায় ১৩.৭ নিযুত বছৰৰ পূৰ্বে বিগ-বেং বা মহাপ বিস্ফোৰণৰ মাত্ৰ কেইমাইক্ৰ’ ছেকেণ্ড পাছত যি চৰম পৰিৱেশ বিৰাজমান আছিল, তেনে এক অৱস্থা পৰীক্ষাগাৰত কৃত্ৰিমভাৱে সৃষ্টি কৰি পদাৰ্থৰ আচৰণ পৰীক্ষা কৰা হৈছে। পোহৰৰ বেগত গতি কৰা দুটা বিপৰীত দিশৰ নিউক্লিয়াছৰ মাজত সংঘৰ্ষ কৰাই ‘চিইআৰএন’ৰ এই বিশেষ গৱেষণা প্ৰকল্পটো সম্পাদন কৰা হৈছে।
ড৹ শৰ্মাৰ এই অভাবনীয় সাফল্যত উৎফুল্লিত হৈ মহাবিদ্যালয়খনৰ অধ্যক্ষই প্ৰকাশ কৰে যে, এই বিশেষ সন্মান কেৱল জাগীৰোড মহাবিদ্যালয় বা অসমৰ বাবেই নহয়, বৰঞ্চ সমগ্ৰ দেশৰ বাবে এক অতুলনীয় গৌৰৱৰ বিষয়। তেওঁ লগতে আশা প্ৰকাশ কৰে যে ড৹ শৰ্মাৰ এই সফলতাই অনাগত প্ৰজন্মৰ শিক্ষাৰ্থীসকলক বিজ্ঞান আৰু গৱেষণাৰ দিশত আগবাঢ়ি যাবলৈ এক নতুন গতি প্ৰদান কৰিব।বৰ্তমান ড৹ প্ৰাঞ্জল শৰ্মাৰ এই কৃতিত্বক লৈ সমগ্ৰ ৰাজ্যতে উল্লাসৰ পৰিৱেশ বিৰাজ কৰিছে। বিভিন্ন দল-সংগঠনৰ লগতে শৈক্ষিক মহলে তেওঁক অভিনন্দন জ্ঞাপন কৰিছে। বিশ্বমানৰ গৱেষণাৰ সৈতে অসমৰ উচ্চ শিক্ষাৰ্থী আৰু শিক্ষকসকলৰ এনে নিবিড় সম্পৰ্কই আগন্তুক দিনত ৰাজ্যখনত বিজ্ঞান চৰ্চাৰ এক সুকীয়া পৰিৱেশ গঢ়ি তুলিব বুলি আশা কৰা হৈছে।
