একেধাৰে সুৰকাৰ, গীতিকাৰ, কবি, অভিনেতা তথা খেলুৱৈ কলাগুৰু বিষ্ণুপ্ৰসাদ ৰাভাৰ আজি ৫১ সংখ্যক মৃত্যু বাৰ্ষিকী। সেই উপলক্ষে ৰাজ্যৰ ভিন্ন প্ৰান্তত উদযাপন কৰা হৈছে ৰাভা দিৱস। এনে ক্ষণতে বিষ্ণুৰাভাৰ পুত্ৰ হেমৰাজ ৰাভাই বিষ্ণুৰাভাৰ তেজপুৰৰ গৃহটো সংৰক্ষণৰ বিষয়টো অপ্ৰাসংগিক বুলি উল্লেখ কৰে।
আজিৰ ৰাভা দিৱসৰ এই বিশেষ দিনটোত নৰ্থ ইষ্ট নাওৰ সাংবাদিকে বিষ্ণুৰাভাৰ পুত্ৰৰ সৈতে যোগাযোগ কৰিছিল আৰু কলাগুৰুৰ তেজপুৰৰ গৃহ সংৰক্ষণৰ প্ৰসংগটো উত্থাপন কৰিছিল। তেনে সময়তে বিষ্ণুৰাভাৰ পৰিয়ালে তেওঁৰ গৃহটো সংৰক্ষণ বা মেৰামতি কৰিবলৈ অনিচ্ছুক বুলিও মন্তব্য কৰে।
তেওঁ কয়, ‘’পৰিয়ালৰ ফালৰ পৰা বিষ্ণুৰাভাৰ গৃহটো মেৰামতি কৰিব লাগে বা সংৰক্ষণ কৰিব লাগে বুলি জনোৱা হোৱা নাই। সেইটো আচলতে বিষ্ণুৰাভাৰ গৃহ নহয়, তেওঁৰ ককায়েক গোলাপ ৰাভাৰ গৃহ আছিল। ১৯৮৩ চনত হিতেশ্বৰ শইকীয়া মুখ্য মন্ত্ৰী হৈ থকাৰ সময়ত বিষ্ণুৰাভাৰ পত্নী মোহিনী ৰাভাই সেই সময়ৰ চৰকাৰৰ পৰা আৰ্থিক সাহায্য বিচাৰিছিল। কিন্তু হিতেশ্বৰ শইকীয়াই আৰ্থিক সাহায্য প্ৰদান নকৰিলে।‘’
ইপিনে, বিষ্ণুৰাভাৰ স্মৃতি সজীৱ কৰি ৰাখিবলৈ তেওঁৰ নামত চৰকাৰী পক্ষ অথবা অন্যান্য কোনো জাতীয় সংগঠনে গুৰুত্ব আৰোপ কৰা নাই বুলিও অভিযোগ কৰে পুত্ৰ হেমৰাজ ৰাভাই।
‘’বিষ্ণু ৰাভাৰ ঘৰেই হওঁক বা কৰ্মৰাজিয়েই হওঁক, চৰকাৰ কিয় জাতীয় সংগঠনসমূহেও একো নকয়। বিষ্ণুৰাভাৰ গৃহটো সংৰক্ষণৰ কথা নাহেই, বিষ্ণু ৰাভাৰ সংগ্ৰহালয় নিৰ্মাণ কৰিবলৈ সদৌ অসম ছাত্ৰ সন্থাই আজিলৈকে মাত মতা নাই। কিন্তু ভূপেন হাজৰিকাৰ সমাধি ক্ষেত্ৰৰ নামত চৰকাৰৰ পৰা ১৮ কোটি টকা দাবী কৰি আদায় কৰিলে,’‘-এইদৰে কয় ৰাভাই।
তাৎপয্যপূৰ্ণভাৱে, কোনো লোকে বিষ্ণুৰাভাৰ গৃহ সংৰক্ষণৰ নামত তেওঁৰ পৰিয়ালকেইটাক তেজপুৰৰ পৰা উচ্ছেদ কৰিবলৈহে ষড়যন্ত্ৰত লিপ্ত হোৱা বুলি তেওঁ গুৰুতৰ অভিযোগ তোলে।
তেওঁ কয়, ‘‘কিছুসংখ্যক ব্যক্তিয়ে বিষ্ণৰাভাৰ পৰিয়ালক তেজপুৰ টাউনৰ পৰা উচ্ছেদ কৰিবলৈ বিষ্ণুৰাভাৰ ঘৰটোৰ কথা সংবাদ মাধ্যম আৰু ছ’চিয়েল মিডিয়াত লিখে। অসমৰ জনমানসত বিষ্ণুৰাভাৰ কোনো চিন-চাব নাথাকক তাৰ বাবে চৰকাৰৰ দ্বাৰা পৰিচালিত মিডিয়াই গৃহটোৰ সংৰক্ষণৰ কথা কৈ থাকে।‘‘
ইপিনে, তেওঁৰ এক মন্তব্যৰ পৰা স্পষ্ট হৈ পৰে যে কলাগুৰু বিষ্ণুৰাভাৰ প্ৰতি প্ৰত্যেকখন চৰকাৰে অৱজ্ঞা কৰি আহিছে।
‘’বিষ্ণুৰাভাৰ মৃত্যুৰ পাছত তেওঁৰ পত্নী মোহিনী ৰাভাই মাত্ৰ ২০০ টকা পেন্সন পাইছিল, সেই সময়তে জয়ন্ত হাজৰিকাৰ পত্নীয়ে ১৫০০ টকা পেন্সন পাইছিল। জয়ন্ত হাজৰিকাতকৈ বিষ্ণু ৰাভা কি সৰু আছিল নেকি,‘’-পুত্ৰ ৰাভাই এইদৰে কয়।
প্ৰসংগক্ৰমে উল্লেখ কৰিব পাৰি যে, যোৱা ১৪ মে’ৰ দিনা হেমৰাজ ৰাভাই তেওঁৰ ফেইচবুকৰ জৰিয়তে বিষ্ণুৰাভাৰ গৃহ সংৰক্ষণৰ বিষয় সন্দৰ্ভত তেওঁৰ মতামত প্ৰকাশ কৰিছিল। উক্ত দিনটোতে বিৰোধী দলপতি দেবব্ৰত শইকীয়াই কলাগুৰু বিষ্ণুপ্ৰসাদ ৰাভাৰ তেজপুৰৰ বাসগৃহটো সংৰক্ষণ কৰিবলৈ অনুৰোধ জনাই চিঠি লিখিছিল। সেই প্ৰসংগ উত্থাপন কৰি তেওঁ পূৰ্বৰ তথা বৰ্তমানৰ কংগ্ৰেছ নেতৃত্বৰ মাজত এক তুলনা কৰিছিল। লগতে বিৰোধী দলপতি দেবব্ৰত শইকীয়াই মুখ্য মন্ত্ৰীলৈ বিষ্ণুপ্ৰসাদ ৰাভাৰ গৃহ সংৰক্ষণ বিচাৰি চিঠি লিখাটোৱে তেওঁ তথা তেওঁৰ পৰিয়ালক হতভম্ব কৰা বুলি উল্লেখ কৰিছিল।
‘’তাহানিৰ মুখ্য মন্ত্ৰী বিমলা প্ৰসাদ চলিহাদেৱে বিষ্ণু ৰাভাৰ গৃহ ঋণ পৰিশোধ কৰি গ’ল আৰু আজিৰ দেবব্ৰত শইকীয়াই বিষ্ণু ৰাভাৰ পৰিয়ালক উচ্ছেদ কৰাৰ কথা ভাবিছে। কিমান পাৰ্থক্য আজিৰ আৰু তাহানিৰ কংগ্ৰেছৰ মাজত,’’‘-ফেইচবুক পোষ্টটোৰ শেষৰ ফালে এইদৰে লিখিছিল ৰাভাই।
