মাৰ্কিন যুক্তৰাষ্ট্ৰৰ কেপিটেল বিল্ডিং আক্ৰমণৰ ঘটনাক বিদায়ী ৰাষ্ট্ৰপতি ড’নাল্ড ট্ৰাম্পে উচতনি দিছিল!
বুধবাৰে এই অভিযোগ উত্থাপন কৰি মাৰ্কিন কংগ্ৰেছৰ নিম্ন সদন হাউজ অৱ ৰিপ্ৰজেন্টেটিভে বিদায়ী ৰাষ্ট্ৰপতি ড’নাল্ড ট্ৰাম্পৰ বিৰুদ্ধে মহাভিযোগ আনিছে।
মহাভিযোগ উত্থাপন কৰি হাউজ অৱ ৰিপ্ৰজেন্টেটিভত অনুষ্ঠিত ভোটগ্ৰহণত ট্ৰাম্পৰ বিপক্ষে ২৩২ টা আৰু সপক্ষে ১৯৭ টা ভোট পৰিছে।
উল্লেখ্য যে মাৰ্কিন কেপিটেল বিল্ডিঙত ট্ৰাম্পৰ সমৰ্থকৰ দ্বাৰা হোৱা আক্ৰমণৰ ঘটনাত চাৰি গৰাকী লোকৰ প্ৰাণহানি হৈছিল।
সমগ্ৰ বিশ্ব সম্প্ৰদায়ে ট্ৰাম্পৰ ভূমিকাক সমালোচনা কৰা দেখা গৈছিল।
ইফালে হাউজ অৱ ৰিপ্ৰজেন্টেটিভত ট্ৰাম্পৰ বিৰুদ্ধে ভোট পৰিলেও চিনেটত ট্ৰাম্প ৰক্ষা পৰিব পাৰে বুলি ৰাজনৈতিক বিশ্লেষকসকলে মত প্ৰকাশ কৰিছে। কাৰণ চিনেটত ট্ৰাম্পৰ ৰিপাব্লিকান দলৰ সংখ্যাগৰিষ্ঠ।
স্মৰ্তব্য যে ২০১৯ বৰ্ষতো ট্ৰাম্পে ৰাষ্ট্ৰপতি হিচাপে ক্ষমতা অপব্যৱহাৰ কৰাৰ মহাভিযোগ উত্থাপন কৰা হৈছিল। সেইবাৰো হাউজ অৱ ৰিপ্ৰজেন্টেটিভত ট্ৰাম্পৰ বিপক্ষে ভোট পৰিলেও চিনেটে ট্ৰাম্পক ৰক্ষা কৰিছিল।
আনহাতে আমেৰিকা যুক্তৰাষ্ট্ৰৰ ইতিহাসত এটা কাৰ্যকালতে এজন ৰাষ্ট্ৰপতি হিচাপে দুবাৰকৈ মহাভিযোগৰ সন্মুখীন হোৱা একমাত্ৰ ৰাষ্ট্ৰপতিজনেই হ’ল ড’নাল্ড ট্ৰাম্প।
