নাইজেৰিয়াত আইছিছ সন্ত্ৰাসবাদীৰ ঘাটিত একাধিক মাৰাত্মক বিমান আক্ৰমণ চলাইছে আমেৰিকান সেনাই। আমেৰিকাৰ ৰাষ্ট্ৰপতি ড’নাল্ড ট্ৰাম্পে বৃহস্পতিবাৰে নিশা তেওঁৰ ট্ৰুথ ছ’চিয়েল প্লেটফৰ্মত এই খবৰ ঘোষণা কৰে। নাইজেৰিয়াত আইছিছ উগ্ৰপন্থীয়ে খ্ৰীষ্টানসকলক লক্ষ্য কৰি লোৱাৰ অভিযোগ তুলি তাৰ উপযুক্ত প্ৰত্যুত্তৰ দিয়া হৈছে বুলি কয়।
তেওঁৰ ট্ৰুথ ছ’চিয়েল প্লেটফৰ্মত এটা পোষ্টত ৰাষ্ট্ৰপতি ট্ৰাম্পে কয় যে নাইজেৰিয়াত তেওঁৰ নিৰ্দেশ অনুসৰি মাৰাত্মক বিমান আক্ৰমণ চলোৱা হৈছে আৰু উত্তৰ-পশ্চিম নাইজেৰিয়াত সক্ৰিয় আইছিছ সন্ত্ৰাসবাদীক লক্ষ্য কৰি লোৱা হৈছে।
তেওঁ লিখিছে, “আজি নিশা সৰ্বাধিনায়ক হিচাপে মোৰ নিৰ্দেশত আমেৰিকাই উত্তৰ-পশ্চিম নাইজেৰিয়াৰ নিকৃষ্ট আইছিছ সন্ত্ৰাসবাদীসকলৰ বিৰুদ্ধে এক শক্তিশালী আৰু মাৰাত্মক আক্ৰমণ চলাইছে।”
ট্ৰাম্পে দাবী কৰে যে সন্ত্ৰাসবাদীসকলে “নিৰীহ খ্ৰীষ্টানসকলক নিৰ্মমভাৱে হত্যা কৰিছিল, মূলতঃ তেওঁলোকক লক্ষ্য কৰি লৈছিল। এই হিংসা বহু বছৰ, আনকি শতিকা ধৰি দেখা নোপোৱা মাত্ৰাত উপনীত হৈছে।”
ইয়াৰ পূৰ্বেও সন্ত্ৰাসবাদী সংগঠনটোক আক্ৰমণ বন্ধ কৰিবলৈ সকীয়াই দিছিল আমেৰিকাৰ ৰাষ্ট্ৰপতিগৰাকীয়ে। ট্ৰাম্পে লিখিছে, “মই পূৰ্বে এই সন্ত্ৰাসবাদীসকলক সকীয়াই দিছিলো যে যদি তেওঁলোকে খ্ৰীষ্টানক হত্যা কৰা বন্ধ নকৰে তেন্তে তেওঁলোকে যথেষ্ট মূল্য দিব লাগিব – আৰু আজি ৰাতি, সেয়াই হ’ল।”
ৰাষ্ট্ৰপতিগৰাকীৰ মতে, এই অভিযানত আমেৰিকাৰ সেনাই “অসংখ্য নিখুঁত আক্ৰমণ” চলাইছে। পেন্টাগনক ‘ডিপাৰ্টমেন্ট অফ ৱাৰ’ বুলি উল্লেখ কৰি ট্ৰাম্পে কয় যে ‘কেৱল আমেৰিকাৰ সেনাইহে এনে নিখুঁত আক্ৰমণ কৰিবলৈ সক্ষম।’
ট্ৰাম্পে কয় যে এই পদক্ষেপে সন্ত্ৰাসবাদৰ ক্ষেত্ৰত তেওঁৰ আমেৰিকা প্ৰশাসনৰ বৃহত্তৰ স্থিতি প্ৰতিফলিত কৰিছে। আমেৰিকাৰ সেনাবাহিনীক প্ৰশংসা কৰি ছ’চিয়েল মিডিয়াত তেওঁ কয় যে, ‘মোৰ নেতৃত্বত আমাৰ দেশখনে (আমেৰিকাই) উগ্ৰ ইছলামিক সন্ত্ৰাসবাদক মূৰ তুলি উঠিবলৈ নিদিয়ে।
নাইজেৰিয়া বছৰ বছৰ ধৰি আইছিছ আৰু বকো হাৰামকে ধৰি উগ্ৰপন্থী সংগঠনৰ হিংসাত্মক পৰিস্থিতিৰ সন্মুখীন হৈ আহিছে। বিশেষকৈ উত্তৰ আৰু উত্তৰ-পূব অঞ্চলত উগ্ৰপন্থী সংগঠনটো সক্ৰিয় হৈ পৰিছে।
শেহতীয়াকৈ আমেৰিকাই আন্তঃৰাষ্ট্ৰীয় ধৰ্মীয় স্বাধীনতা আইন অনুসৰি নাইজেৰিয়াক “বিশেষ উদ্বেগৰ দেশ” হিচাপে ঘোষণা কৰিছে। নৱেম্বৰ মাহত ট্ৰাম্পে কৈছিল যে খ্ৰীষ্টানসকলৰ ওপৰত নিৰ্যাতন চলোৱাৰ অভিযোগৰ পিছত তেওঁ পেন্টাগনক সম্ভাৱ্য সামৰিক ব্যৱস্থাৰ পৰিকল্পনা আৰম্ভ কৰিবলৈ নিৰ্দেশ দিছিল।
যোৱা কেইটামান সপ্তাহত বিদেশ বিভাগে খ্ৰীষ্টানৰ বিৰুদ্ধে গণহত্যা আৰু হিংসাৰ লগত জড়িত নাইজেৰিয়ান আৰু তেওঁলোকৰ পৰিয়ালৰ সদস্যসকলৰ ওপৰতো ভিছা নিষিদ্ধ কৰাৰ কথা ঘোষণা কৰিছে।
ইপিনে, নাইজেৰিয়াৰ ৰাষ্ট্ৰপতি বোলা টিনুবুৱে বৰদিনৰ দিনা ছ’চিয়েল মিডিয়াত প্ৰকাশ কৰা এক বিবৃতি আৰু চিঠিৰ জৰিয়তে ধৰ্মীয় স্বাধীনতা ৰক্ষা কৰাৰ প্ৰতিশ্ৰুতি দিয়ে। টিনুবুৱে তেওঁৰ বক্তব্যৰ সৈতে সংলগ্ন এখন পত্ৰত কয়, “আপোনালোকৰ ৰাষ্ট্ৰপতি হিচাপে মই নাইজেৰিয়াত ধৰ্মীয় স্বাধীনতা ৰক্ষাৰ বাবে আৰু বিভিন্ন ধৰ্মৰ সকলো লোকক হিংসাৰ পৰা ৰক্ষা কৰিবলৈ মোৰ সামৰ্থ্য অনুসৰি সকলো কৰিবলৈ প্ৰতিশ্ৰুতিবদ্ধ।”
পত্ৰখনত লিখা আছিল, “২০২৩ চনত কাৰ্যভাৰ গ্ৰহণ কৰাৰ পিছৰে পৰা মই নাইজেৰিয়ানসকলক আমাৰ জাতিৰ নিৰাপত্তা, ঐক্য আৰু স্থিতিশীলতা ৰক্ষাৰ বাবে আমাৰ অটল প্ৰতিশ্ৰুতিৰ বিষয়ে অহৰহ আশ্বাস দি আহিছো।”
খ্ৰীষ্টানসকলক পদ্ধতিগতভাৱে নিৰ্যাতন চলোৱাৰ দাবী নাকচ কৰিছে নাইজেৰিয়া চৰকাৰে। ইয়াত যুক্তি দিয়া হৈছে যে সশস্ত্ৰ সংগঠনে মুছলমান আৰু খ্ৰীষ্টান উভয়কে লক্ষ্য কৰি লয় আৰু এনে দাবীয়ে জটিল নিৰাপত্তা পৰিস্থিতি অতি সৰল কৰি তোলে। দেশখনৰ জনসংখ্যা মোটামুটিভাৱে উত্তৰে মুছলমান প্ৰধান আৰু দক্ষিণে খ্ৰীষ্টান প্ৰধান হিচাপে বিভক্ত।
