এন আৰ চি উন্নীতকৰণৰ বিষয়ক লৈ মুখ খুলিলে প্ৰধানমন্ত্ৰী নৰেন্দ্ৰ মোডীয়ে। এন আৰ চি উন্নীতকৰণক লৈ ৰাইজক আতংকিত নহ’বলৈ আহ্বান জনাইছে প্ৰধানমন্ত্ৰী মোডীয়ে। এন আৰ চিৰ চূড়ান্ত খচৰাত ৪০ লাখ লোকৰ নাম বাদ পৰাৰ পিছত দেশৰ ৰাজনীতি উত্তপ্ত হৈ পৰাৰ সময়তে প্ৰধানমন্ত্ৰী মোডীয়ে এন আৰ চিক লৈ কোনো ভাৰতীয় নাগৰিকে ভয় খোৱাৰ প্ৰয়োজন নাই বুলি আশ্বাস প্ৰদান কৰিছে।
এন আৰ চিৰ পিছত কোনো ভাৰতীয় নাগৰিকে দেশ এৰি যাব নালাগে বুলি উল্লেখ কৰি প্ৰধানমন্ত্ৰী মোডীয়ে ব্যক্ত কৰে যে এন আৰ চি উন্নীতকৰণৰ কাম উচ্চতম ন্যায়ালয়ৰ এক সুনিৰ্দিষ্ট প্ৰক্ৰিয়াৰে চলিছে। খচৰাত বাদ পৰা লোকসকলে যাতে তেওঁলোকৰ নাম এন আৰ চিত অন্তৰ্বুক্ত কৰিব পাৰে তাৰ বাবে সকলো সুবিধা প্ৰদান কৰা হ’ব। সকলো বৈধ নাগৰিকৰে নাম এন আৰ চিত অন্তৰ্ভুক্ত হ’ব বুলিও তেওঁ সদৰী কৰে।
সংবাদ সংস্থা এ এন আইক দিয়া এটা সাক্ষাৎকাৰত প্ৰধানমন্ত্ৰী মোডীয়ে এন আৰ চিক লৈ নিজৰ অবিমত ব্যক্ত কৰাৰ লগতে এন আৰ চিৰ বিৰোধিতা কৰা পশ্চিমবংগৰ মুখ্যমন্ত্ৰী মমতা বেনাৰ্জীকো তীব্ৰভাৱে সমালোচনা কৰে। এন আৰ চিক লৈ দেশত গৃহযুদ্ধ আৰু ৰক্তপাত হ’ব বুলি কৰা মমতাৰ মন্তব্য সন্দৰ্ভত প্ৰধানমন্ত্ৰী মোডীয়ে কটাক্ষ কৰে যে যিসকলে আত্মবিশ্বাস হেৰুৱাইছে, যাৰ জনপ্ৰিয়তা হ্ৰাস পোৱাৰ ভয় হৈছে, যিসকলৰ ৰাষ্ট্ৰৰ ওপৰত বিশ্বাস নাই তেওঁলোকেহে গৃহযুদ্ধ, ৰক্তপাত তথা দেশক বিভাজনৰ কথা ক’ব পাৰে।
এন আৰ চিক লৈ বিৰোধী দলসমূহে ৰাজনীতি কৰা কাৰ্যক দুৰ্ভাগ্যজনক আখ্যা দি প্ৰধানমন্ত্ৰী মোডীয়ে কয় যে এন আৰ চি জনসাধাৰণৰ সুৰক্ষাৰ বাবেহে, ৰাজনীতিৰ বাবে নহয়। ইয়াক লৈ কোনোবাই ৰাজনীতি কৰাটো দুৰ্ভাগ্যজনক।
সুদীৰ্ঘ দিন শাসনত থকা কংগ্ৰেছ দলে অসম চুক্তি ৰূপায়নৰ ক্ষেত্ৰত কোনো পদক্ষেপ গ্ৰহণ নকৰিলে বুলি উল্লেখ কৰাৰ লগতে প্ৰধানমন্ত্ৰী মোডীয়ে আঙুলিয়াই দিয়ে অসম চুক্তি স্বাক্ষৰ কৰিছিল তদানীত্বন কংগ্ৰেছৰ প্ৰধানমন্ত্ৰী ৰাজীৱ গান্ধীয়ে। কিন্তু পৰৱৰ্তী সময়ত কংগ্ৰেছে চুক্তি ৰূপায়ন কৰাতকৈ অধিক ভোটৰ ৰাজনীতিহে কৰিলে। যাৰ বাবে বিগত তিনি দশকে এন আৰ চি উন্নীতকৰণ নহ’ল।
কংগ্ৰেছৰ লগতে তৃণমূল কংগ্ৰেছৰ নেত্ৰী মমতা বেনাৰ্জীয়েও বিদেশীক লৈ ভোটৰ ৰাজনীতি কৰা বুলি অভিযোগ তুলি প্ৰধানমন্ত্ৰী মোডীয়ে কয় যে ২০০৫ চনত এইগৰাকী মমতা বেনাৰ্জীয়েই সংসদত অবৈধ বিদেশী বহিস্কাৰৰ দাবী উত্থাপন কৰিছিল। তেতিয়া তেওঁ পশ্চিমবংগৰ বাবে অবৈধ বিদেশী এক দুৰ্যোগ বুলি কৈছিল। এতিয়া ক্ষমতালৈ অহাৰ পিছত তেওঁ বিদেশীৰ পক্ষ লৈছে।
উল্লেখযোগ্য এন আৰ চিক লৈ দেশৰ ৰাজনীতি উত্তপ্ত হৈ থকাৰ সময়ত প্ৰধানমন্ত্ৰী নীৰৱ হৈ থকা বুলি বিৰোধী পক্ষই অভিযোগ কৰি আহিছিল। এতিয়া প্ৰধানমন্ত্ৰী মোডীয়ে এন আৰ চি সম্পৰ্কত নিজৰ বক্তব্য দাঙি ধৰাৰ পিছত বিৰোধীসকলে কি প্রতিক্ৰিয়া প্ৰকাশ কৰে সেয়া লক্ষণীয় হ’ব।