“অসমৰ খিলঞ্জীয়াৰ মূৰৰ ওপৰত উঠি কাকো নাচিবলৈ দিয়া নহ’ব,”- এই হুংকাৰ আলফা নেতা জিতেন দত্তৰ ৷ সত্ৰৰ মাটি বেদখল সন্দৰ্ভত বুজ লোৱাৰ উদ্দেশ্যে বৰপেটালৈ অহা আলোচনাপন্থী আলফা নেতা গৰাকীয়ে বৰপেটা সত্ৰ প্ৰাংগনত এই হুংকাৰ দিয়ে ৷
তেওঁ কয় যে, অসমীয়া জাতিটোক সুৰক্ষিত কৰিব লাগিলে অসমৰ সাংস্কৃতিক প্ৰাণকেন্দ্ৰ সত্ৰ, নামঘৰ সমূহ বেদখলৰ পৰা মুক্ত কৰিবই লাগিব ৷ তেওঁ সত্ৰ সমূহৰ মাটি বেদখল সন্দৰ্ভত বুজ লোৱাৰ উদ্দেশ্যে অসমীয়া ডেকাশক্তিক লগত লৈ সত্ৰ নামঘৰ সমূহ পৰিদৰ্শন কৰা বুলি জনায় ৷
তেওঁ লগতে কয়, সত্ৰ নামঘৰ সমূহ পৰিদৰ্শন কৰাৰ পিছতেই সত্ৰৰ ভূমি বেদখলমুক্ত কৰাৰ বাবে চৰকাৰক দাবী জনোৱা হ’ব ৷ চৰকাৰে এই দাবীসমূহ মানি নল’লে অসমৰ ডেকাশক্তিয়ে সত্ৰ নামঘৰ সমূহ বেদখলমুক্ত কৰাৰ বাবে বিকল্প পথ ল’বলৈ বাধ্য হ’ব বুলিও চৰকাৰক সকীয়াই দিয়ে ৷
ইপিনে নাগৰিকত্ব সংশোধনী বিধেয়ক সন্দৰ্ভত সাংবাদিকে সোধা প্ৰশ্নৰ উত্তৰত আলফা নেতা গৰাকীয়ে কয় যে, বিদেশী খেদা আন্দোলনক নেতৃত্ব দিয়া সকলে এতিয়া দিচপুৰত দপদপাই আছে ৷ এইসকল নেতাই সঠিক সময়ত সঠিক সিদ্ধান্ত গ্ৰহণ নকৰিলে অসমত গণ বিদ্ৰোহ আৰম্ভ হ’ব বুলিও চৰকাৰক সকীয়াই দিয়ে৷
আলোচনাপন্থী আলফা নেতা গৰাকীয়ে আজি লগতে পাটবাউসী সত্ৰও পৰিদৰ্শন কৰি সত্ৰখনৰ বেদখল সন্দৰ্ভত বুজ লয় ৷