নৰ্থ লখিমপুৰ বিশ্ববিদ্যালয়ৰ আলোচনা গৃহত ১১ ছেপ্টেম্বৰত এক গাম্ভীৰ্যপূৰ্ণ অনুষ্ঠানত ‘প্ৰজেক্ট শ্ৰীমন্ত শংকৰদেৱ’ শীৰ্ষক এটি নতুন দৃশ্য-শ্ৰাব্য গীত আনুষ্ঠানিকভাৱে মুকলি কৰা হয়। বিশ্ববিদ্যালয়খনৰ ৰাজনীতি বিজ্ঞান বিভাগৰ স্নাতক তৃতীয় ষাণ্মাসিকৰ ছাত্ৰ অমৃত প্ৰতীম বাইলুংৰ কণ্ঠত বাণীবদ্ধ কৰা আৰু ক্লিপছ প্ৰডাকচনৰ প্ৰযোজনাত নিৰ্মিত এই গীতটো উন্মোচন কৰে লখিমপুৰৰ প্ৰথিতযশা চিত্ৰশিল্পী পৰেশ ভূঞা আৰু নৰ্থ লখিমপুৰ বিশ্ববিদ্যালয়ৰ পঞ্জীয়ক ড° বিমান চন্দ্ৰ চেতিয়াই। শতাধিক ছাত্ৰ-ছাত্ৰীৰ উপস্থিতিত গীতটো মুকলি কৰি ড° চেতিয়াই মন্তব্য কৰে যে এই প্ৰয়াসে শ্ৰীমন্ত শংকৰদেৱৰ মহান দৰ্শন আৰু চিন্তাধাৰা জনসাধাৰণৰ মাজলৈ লৈ যোৱাত গুৰুত্বপূৰ্ণ ভূমিকা গ্ৰহণ কৰিব।
উক্ত উন্মোচনী সভাখনত ‘অসমীয়া গীত আৰু ফিউজন’ শীৰ্ষক এক মনোগ্ৰাহী বক্তৃতা প্ৰদান কৰে নৰ্থ লখিমপুৰ বিশ্ববিদ্যালয়ৰ অসমীয়া বিভাগৰ অধ্যাপক ড° হেমন্ত শৰ্মাই। অনুষ্ঠানটোত উপস্থিত থাকি গীতটোৰ শলাগ লয় বিশ্ববিদ্যালয়খনৰ অধ্যাপক ড° দিগন্ত হাতীবৰুৱা, ড° বৰ্ণালী বৰা, ড° চুচেংফা গগৈ, ড° স্বপ্নালী চেতিয়া, নিজৰা গগৈ আৰু লখিমপুৰৰ বিশিষ্ট সংগীত সাধক মৃদুপৱন বৰুৱাই। টমক ৰঞ্জন দত্তই আঁত ধৰা এই অনুষ্ঠানৰ শেষৰ ফালে ক্লিপছ প্ৰডাকচনৰ প্ৰথম প্ৰতিষ্ঠা দিৱসো উদযাপন কৰা হয়।
এই বিশেষ অনুষ্ঠানটোত ক্লিপছ প্ৰডাকচনৰ তৰফৰ পৰা স্বত্বাধিকাৰী চিন্ময় কাশ্যপ শৰ্মা আৰু নিকু দুৱৰা উপস্থিত থাকে। লগতে প্ৰযোজনা সংস্থাটোৰ সদস্য তথা গীতটোৰ নিৰ্মাণৰ সৈতে জড়িত ধ্ৰুৱ গোস্বামী, দীপৰাজ দলে, বিপ্লৱ নেওগ, হৃদি তামুলী, দৰ্শনা গগৈ, আকাংক্ষা মাধৱ তামুলী আৰু জিন্তু তামুলীকে ধৰি আন বহুকেইগৰাকী ব্যক্তি উপস্থিত আছিল।
