আমেৰিকাত কাম কৰিবলৈ যোৱা ভাৰতীয়কে ধৰি অন্যান্য বিদেশী নাগৰিকৰ বাবে এক অতি বেয়া খবৰ আহি পৰিছে। আমেৰিকাত এইচ-১বি ভিছা কাৰ্যসূচী সম্পূৰ্ণৰূপে তিনি বছৰৰ বাবে স্থগিত ৰখাৰ এক প্ৰস্তাৱ দিয়া হৈছে। ইয়াৰ বাবে দেশখনত এখন নতুন বিধেয়ক উত্থাপন কৰা হৈছে। যদিহে এই বিধেয়কখন গৃহীত হৈ আইনত পৰিণত হয়, তেন্তে কেৱল ভিছা স্থগিত ৰখাই নহয়, সমগ্ৰ ভিছা প্ৰক্ৰিয়াটোতেই এক ডাঙৰ পৰিৱৰ্তন ঘটিব। ইয়াৰ ফলত বৰ্তমান তাত কাম কৰি থকা ভাৰতীয়সকলৰ লগতে আন বিদেশী কৰ্মীসকল ডাঙৰ অসুবিধাত পৰাৰ সম্ভাৱনা আছে।
জানিব পৰা মতে, ৰিপাব্লিকান দলৰ ফালৰ পৰা এই বিধেয়কখন অনা হৈছে। তেওঁলোকে দাবী কৰিছে যে এইচ-১বি ভিছাৰ বাবে আমেৰিকাৰ নিজা নাগৰিকসকলৰ বহুত লোকচান হৈছে। তেওঁলোকৰ মতে, ভাৰতীয়কে ধৰি বাহিৰৰ পৰা যোৱা লোকসকলে আমেৰিকানসকলৰ চাকৰি কাঢ়ি লৈছে। সেয়েহে, এই ব্যৱস্থাটো সম্পূৰ্ণৰূপে সলনি কৰাৰ বাবে ইয়াক লগে লগে স্থগিত ৰখাৰ দাবী জনোৱা হৈছে। এই নতুন বিধেয়কখনৰ নাম দিয়া হৈছে ২০২৬ চনৰ এইচ-১বি ভিছা অপব্যৱহাৰ সমাপ্তকৰণ আইন। বৰ্তমানৰ নিয়ম অনুসৰি, এই ভিছা প্ৰথমে তিনি বছৰৰ বাবে দিয়া হয় আৰু পিছলৈ আৰু তিনি বছৰ বঢ়াই মুঠ ছবছৰ কৰিব পাৰি। এই সময়ছোৱাত তেওঁলোকে স্থায়ীভাৱে থাকিবলৈ গ্ৰীণ কাৰ্ডৰ বাবেও আবেদন কৰিব পাৰে।
এই নতুন বিধেয়কখনত ভিছাৰ নিয়মবোৰ বহুখিনি সলনি কৰাৰ কথা কোৱা হৈছে। যদি এই আইনখন বলৱৎ হয়, তেন্তে বছৰেকীয়া এইচ-১বি ভিছাৰ সংখ্যা ৬৫ হাজাৰৰ পৰা কমাই ২৫ হাজাৰ কৰা হ’ব। ইয়াৰ লগতে বৰ্তমানৰ লটাৰী ব্যৱস্থাটো আঁতৰাই দৰমহাৰ ওপৰত ভিত্তি কৰি মানুহ বাছনি কৰা হ’ব, য’ত নূন্যতম দৰমহা বছৰি দুই লাখ ডলাৰ হ’ব লাগিব। আনহাতে, বিদেশী লোকক চাকৰি দিয়াৰ আগতে কোম্পানীবোৰে প্ৰমাণ কৰিব লাগিব যে তেওঁলোকে সেই পদৰ বাবে কোনো যোগ্য আমেৰিকান নাগৰিক বিচাৰি পোৱা নাই। লগতে তেওঁলোকে কোনো আমেৰিকান কৰ্মচাৰীক কামৰ পৰা উলিয়াই দিয়া নাই বুলিও প্ৰমাণ দিব লাগিব। ইয়াৰ উপৰিও, এই ভিছা থকা লোকসকলে একেলগে এটাতকৈ বেছি চাকৰি কৰিব নোৱাৰিব।
