ধুবুৰী জিলাৰ গৌৰীপুৰ নগৰ সমিতিৰ বিৰুদ্ধে ই-ৰিক্সা চালকৰ পৰা অবৈধভাৱে ধন সংগ্ৰহ কৰাৰ অভিযোগ উত্থাপিত হৈছে। পৰিবহন বিভাগক নেওচি সমিতিয়ে অবৈধভাৱে ই-ৰিক্সা পঞ্জীয়নৰ নামত ১৫০০ টকা কৈ বলপূৰ্বক আদায় কৰাৰ অভিযোগৰ পিছত শুকুৰবাৰে আছুৱে এক প্ৰতিবাদী কাৰ্যসূচী ৰূপায়ন কৰে।
বৰ্তমান বিজেপিৰ দখলত থকা গৌৰীপুৰ নগৰ সমিতিৰ সভানেত্ৰী জিমলী দত্তৰ নেতৃত্বত ই-ৰিক্সা চালক সকলৰ পৰা পাৰ্কিং নোহোৱাকৈয়ে প্ৰতিদিনে পাৰ্কিঙৰ নামত ১০ টকাকৈ সমিতিয়ে অবৈধভাবে আদায় কৰি আহিছে।
আনহাতে, প্ৰায় ৫০০ জন ই-ৰিক্সা চালকৰ পৰা অকৰ্তৃত্বশীলভাৱে পঞ্জীয়নৰ নামত ১৫০০ টকাকৈ সংগ্ৰহ কৰা বুলি প্ৰতিবাদকাৰীসকলে অভিযোগ উত্থাপন কৰিছে। ইপিনে ধুবুৰী জিলা পৰিবহন বিভাগে এই পঞ্জীয়নক অবৈধ বুলি ঘোষণা কৰাত ই-ৰিক্সা চালক সকল বিপাঙত পৰিছে।
ভুক্তভোগীসকলে নগৰ সমিতিখনক এই সন্দৰ্ভত বাৰে বাৰে অভিযোগ দি অহাৰ পিছতো কোনো সমিধান নোপোৱাৰ বাবে শুকুৰবাৰে আছুৰ সহযোগত ই-ৰিক্সা চালকসকলে ৰাজপথত প্ৰতিবাদ সাৱ্যস্ত কৰে।
নগৰ সমিতিখনৰ কৰ সংগ্ৰহৰ নামত এইদৰে হাৰাশাস্তিৰ সন্মুখীন হোৱা ই-ৰিক্সা চালকসকলে শীঘ্ৰেই এই সন্দৰ্ভত উপযুক্ত ব্যৱস্থা গ্ৰহণ নকৰিলে ভৱিষ্যতে গণতান্ত্ৰিকভাৱে ব্যাপক প্ৰতিবাদ সাব্যস্ত কৰিব বুলি সকীয়াই দিয়ে।
আনহাতে, ৰাজ্যখনৰ কেইবা ঠাইতো পৰিবহন বিভাগে শুকুৰবাৰে পঞ্জীয়নবিহীন তথা নথিপত্ৰ নোহোৱা ই-ৰিক্সাৰ বিৰুদ্ধে এলানি অভিযান আৰম্ভ কৰিছে। শুকুৰবাৰে বোকাখাতত শতাধিক এনেকুৱা উপযুক্ত নথি পত্ৰবিহীন ই-ৰিক্সা জব্দ কৰা হয়।
