দক্ষিণ গাৰো পাহাৰৰ চক’পট অঞ্চলৰ নাগৰিক সমাজৰ লগতে কেইবাটাও সংগঠনে এলাকটোত কয়লা খননৰ বিৰুদ্ধে তীব্ৰ প্ৰতিবাদ জনাইছে। ১৮ অক্টবৰত যৌথ পৰিদৰ্শনত পৰিৱেশৰ ভয়াৱহ ক্ষতি পোহৰলৈ অহাৰ পিছত গাৰো ষ্টুডেণ্টছ ইউনিয়ন (জিএছইউ), আচিক হোলিষ্টিক এৱেকেনিং মুভমেণ্ট (এএইচএএম), চক’পট এৰিয়া ৱিজিলেন্স কমিটী (চিএভিচি), গাৰো ষ্টেট মুভমেণ্ট কমিটী (জিএছএমচি), আচিক কনচাচ ইন্টিগ্ৰেটেড ক্ৰিমা (এচআইকে), ফেডাৰেচন অৱ খাচী জয়ন্তিয়া আৰু গাৰো পিপল (এফকে জে জি পি) আৰু আচিক য়ুথ ৱেলফেয়াৰ অৰ্গানাইজেচন (এয়ুডব্লিউও)ৰ দৰে সংগঠনে খনন শীঘ্ৰে বন্ধ কৰাৰ দাবী জনাইছে। তেওঁলোকে কয় যে এই খননে কাষৰীয়া নদী আৰু নোক্ৰেক বায়’স্ফিয়াৰ ৰিজাৰ্ভৰ প্ৰতি গুৰুতৰ ভাবুকি সৃষ্টি কৰিব পাৰে।
সংগঠনসমূহে উল্লেখ কৰিছে যে পৰিদৰ্শনত পোহৰলৈ অহা তথ্য অনুসৰি খনন চলি থকা অঞ্চলটো ৰোম্পা, ৰংডিক, খাকিজা আৰু ৰংমাৰ দৰে গুৰুত্বপূৰ্ণ নদীৰ ওচৰত অৱস্থিত, যিবোৰ দৈনন্দিন জীৱন নিৰ্বাহৰ বাবে অতি গুৰুত্বপূৰ্ণ। ইতিমধ্যে নদীসমূহত খননৰ ঋণাত্মক প্ৰভাৱ দৃশ্যমান হৈছে। যদি খনন অব্যাহত ৰাখা হয় তেন্তে নদীৰ প্ৰাকৃতিক প্ৰবাহক প্ৰভাৱিত কৰাৰ লগতে চিৰদিনৰ বাবে নদীৰ পানী কলুষিত হৈ পৰিব। যিয়ে জৈৱ প্ৰকৃতি আৰু মানৱ জীৱনক বিপন্ন কৰিব। তেওঁলোকে অতিৰিক্তভাৱে নোক্ৰেক ৰিজাৰ্ভৰ ওচৰত খননৰ ফলত ঘন বনাঞ্চল ধ্বংস, মাটিৰ খহনীয়া, বাসস্থান হেৰুৱা আৰু বিপন্ন প্ৰজাতি যেনে হুলক গিবন, হিমালয়ৰ ক’লা ভালুক আৰু বিৰল পক্ষীপ্ৰজাতিৰ বাবে প্ৰাণঘাতী হ’ব পাৰে বুলি সতৰ্ক কৰি দিছে।
জিএছইউৰ সাধাৰণ সম্পাদক স্পেন্সৰ মাৰাকে কয় যে এই পৰিৱেশ সংবেদনশীল অঞ্চলত অনিয়ন্ত্ৰিত খননে মাটিৰ খহনীয়া, বাসস্থান ধ্বংস আৰু উপনদী শুকাই যোৱাৰ ফলত মাছ ধৰা, খেতি, পৰ্যটন উদ্যোগ সৈতে জড়িত স্থানীয়লকৰ জীৱিকা বিপন্ন হৈ উঠিব পাৰে। আবং চিগাট, ৰেডিংছনি, ৱাৰী চোৰা আৰু টেংটে ৰংগ্ৰেপৰ দৰে সুন্দৰ প্ৰাকৃতিক স্থানসমূহৰ সৌন্দৰ্য্য ধ্বংস হ’লে পৰ্যটকক নিৰুৎসাহিত কৰিব যাৰফলত স্থানীয় সম্প্ৰদায়ে অৰ্থনৈতিক সুযোগ হেৰুৱাব। ই কেৱল প্ৰকৃতিক বিপন্ন কৰাই নহয়, গাৰো সম্প্ৰদায়ৰ সাংস্কৃতিক আৰু অৰ্থনৈতিক অস্তিত্বকো ক্ষতি কৰিব বুলি তেওঁ মত প্ৰকাশ কৰে।
উদ্বেগ প্ৰকাশ কৰি চিএছঅ’ সংগঠনসমূহে টুৰাৰ সাংসদ ছালেং এ চাংমা আৰু বিজেপিৰ এমডিচি বাৰ্নাৰ্ড মাৰাকৰ পূৰ্বৰ বক্তব্য উদ্ধৃতি দি কয় যে কয়লা খননৰ নামত ইউৰেনিয়াম অনুসন্ধান চলাই থকা সন্দেহ দৃঢ় হৈ পৰিছে। তেওঁলোকে সকীয়াই দি কয় যে ইউৰেনিয়ামৰ সন্ধানত চলা এই খননে মাটি, পানী আৰু বায়ু ভয়ংকৰভাবে দূষিত কৰিব পাৰে, যাৰ ফলত বহু প্ৰজন্ম ধৰি মানৱ সংকটৰ সন্মুখীন হ’ব। সংশ্লিষ্ট গোটসমূহে ৰাজ্য চৰকাৰ, বন বিভাগ আৰু দূষণ নিয়ন্ত্ৰণ ব’ৰ্ডক তৎক্ষণাত এই কার্যকলাপৰ বিষয়ে জনতাক স্পষ্ট ব্যাখ্যা দিবলৈ আহ্বান জনায়। লগতে অবৈধ অনুজ্ঞাপত্ৰ বাতিল কৰি স্থিতিশীল তথা বহনক্ষম উন্নয়নক অগ্ৰাধিকাৰ দিয়াৰ আহ্বান জনায়। ইয়াৰ উপৰিও, দাবী উপেক্ষা কৰিলে গণআন্দোলন গঢ়ি তোলাৰ লগতে আইনী পথ অবলম্বন কৰিবলৈ বাধ্য হ’ব বুলি সকীয়াই দিয়ে।
