প্রস্তাৱিত ‘চেটেলাইট টাউনশ্বীপ’ বাতিল কৰাৰ দাবীত আৰু ‘কাৰ্বি গ’- বেক’ শ্লোগান দিয়াৰ বিৰুদ্ধে কালি ৰাভা হাছঙৰ বৰদুৱাৰ বাগানত প্রতিবাদ সাব্যস্ত কৰা হয়। প্রতিবাদী সভাৰ আৰম্ভণিতে অকাল মৃত্যুক সাৱটি লোৱা পৰ্বতজোৰাৰ আদানী তাপ বিদ্যুৎ প্রকল্প বিৰোধী আন্দোলনৰ নেত্রী বিনোটা ব্ৰহ্ম, খেৰনীৰ ঘটনাত নিহত হোৱা এনুছ টিমুং আৰু সুৰজ দে’ৰ প্রতি শ্রদ্ধাঞ্জলি জ্ঞাপন কৰি ১ মিনিট মৌন প্রাৰ্থনা কৰা হয়।
সভাত আগন্তুক বিধানসভা নির্বাচনৰ আগত চেটেলাইট টাউনশ্বীপ প্রকল্প লিখিত ভাৱে বাতিল কৰা আৰু মাটিৰ পট্টা দিবলৈ চৰকাৰলৈ দাবী জনোৱা হয়। বিজেপি চৰকাৰৰ দিনত জনজাতীয় মানুহক সকলো ফালৰ পৰা দুৰ্বল কৰিবলৈ কৰা চেষ্টাক সমূহীয়া ধিক্কাৰ জনোৱা হয়। লগতে ১০৮ মৃত্যুঞ্জয় কৰ্মচাৰীৰ আন্দোলনৰ প্ৰতি সংহতি প্রদান কৰা হয়।
সভাখনত গুৱাহাটী উচ্চ ন্যায়ালয়ৰ অধিবক্তা শান্তনু বৰঠাকুৰ, কৃষ্ণ গগৈ, কাজিৰঙা ভূমি আৰু মানৱ অধিকাৰ সুৰক্ষা সমিতিৰ প্রণৱ দলে, কৃষক সভাৰ জয়ন্ত গগৈ আৰু ভূমি অধিকাৰ যৌথ সংগ্রাম সমিতিৰ সুব্রত তালুকদাৰ উপস্থিত থাকে। লগতে বৰদুৱাৰ বাগান ভূমি পট্টন দাবী সমিতিৰ গোবিন্দ ৰাভা, পক্ষীৰাজ ৰাভা, গজেন চন্দ্র ৰাভা আদি নেতৃবৃন্দ উপস্থিত থাকে।
