কেন্দ্ৰীয় চৰকাৰৰ শ্ৰমিক-কৃষক বিৰোধী নীতি পৰিবৰ্তনৰ দাবীত আজি চি আই টি ইউ, নিখিল ভাৰত কৃষক সভা আৰু সদৌ ভাৰত কৃষি শ্ৰমিক ইউনিয়নৰ যৌথ উদ্যোগত অনুষ্ঠিত মহাবিক্ষোভ কাৰ্যসূচীৰ সমৰ্থনত আৰু ঔষধৰ মূল্য, বিদ্যুৎ মাচুল, টোল কৰৰ উপৰিও পৌৰ কৰ বৃদ্ধিৰ প্ৰতিবাদত কলগাছিয়াত প্ৰতিবাদী সমদল আৰু পথসভা অনুষ্ঠিত হয়।
চি আই টি ইউ, নিখিল ভাৰত কৃষক সভা আৰু ভাৰতৰ গণতান্ত্ৰিক যুৱ ফেডাৰেচনৰ যৌথ উদ্যোগত আজি দিনৰ ১২:৩০ বজাত সংগঠন তিনিটাৰ অৰ্ধশতাধিক সদস্য সমৰ্থকে কলগাছিয়া চাৰি আলিৰ পৰা হাতে হাতে বেনাৰ, পতাকালৈ সমদল কৰি প্ৰতিবাদ সাব্যস্ত কৰে।
প্ৰতিবাদী লোকসকলে অত্যাৱশ্যকীয় সামগ্ৰীৰ আকাশলংঘী মূল্যবৃদ্ধি ৰোধ কৰিবলৈ চৰকাৰক দাবী জনোৱাৰ লগতে ধাৰাবাহিক মূল্যবৃদ্ধি ৰোধ কৰাত ব্যৰ্থ হোৱাৰ অভিযোগত বিজেপি চৰকাৰক নিন্দা কৰে। তদুপৰি সৰ্বস্তৰৰ নিবনুৱাক কৰ্মসংস্থাপন দিয়াৰ দাবী তুলি কৃষকৰ উৎপাদিত ফচলৰ নূন্যতম সমৰ্থন মূল্য নিৰ্দ্ধাৰণ কৰি আইনগত স্বীকৃতি দিবলৈও দাবী জনায়।
সমদলত ভাগ লোৱা কৃষক-শ্ৰমিক সকলে পুঁজিপতিৰ স্বাৰ্থত প্ৰস্তুত কৰা শ্ৰম কোড চাৰিখন অতি শীঘ্ৰে বাতিল কৰা, শ্ৰমিকৰ নূন্যতম মজুৰি মাহিলি ২৬০০০ টকা ধাৰ্য কৰা, ঠিকা শ্ৰমিকৰ কৰ্ম সুৰক্ষিত কৰা, সমান কামৰ বাবে সমান মজুৰি আদায় দিয়া, ৰন্ধন কৰ্মী, আশা কৰ্মী, অংগনাবাড়ী কৰ্মী সকলক মাননীৰ সলনি মজুৰি প্ৰদান কৰিবলৈ দাবী জনায়।
তদুপৰি বিকল্প ব্যৱস্থা অবিহনে সকলো ধৰণৰ উচ্ছেদ বন্ধ কৰা, উচ্ছেদিত পৰিয়াল সমূহৰ পুনৰ সংস্থাপনৰ ব্যৱস্থা কৰা, নতুন পেঞ্চন আচঁনি বন্ধ কৰি পুৰণি পেঞ্চন নীতি বাহাল ৰখা, দেশৰ ৰাজহুৱা সম্পদ বিক্ৰী কৰাৰ প্ৰকল্প এন এম পি শীঘ্ৰে বন্ধ কৰা, নামৰূপ সাৰ কাৰখানা, শুৱালকুছিৰ বস্ত্ৰ শিল্প পুনৰজ্জীৱিত কৰাৰ দাবীৰে কলগাছিয়া পাটবজাৰ-ষ্টেট বেংকহৈ পুনৰ চাৰি আলিত উপস্থিত হৈ প্ৰতিবাদী সমদল সমাপ্ত কৰে।
উল্লেখ্য যে প্ৰতিবাদী সমদল চলি থকা অৱস্থাত তিনিটাকৈ প্ৰতিবাদী পথসভা অনুষ্ঠিত হয়। এই পথসভা সমূহত বক্তব্য ৰাখে বৃহত্তৰ কলগাছিয়া অঞ্চলৰ প্ৰবীণ বাওঁপন্থী নেতা আব্দুল আজিজ আৰু ডি ওৱাই এফ আইৰ অসম ৰাজ্যিক কমিটিৰ সভাপতি ৰুস্তম আলীয়ে।
বক্তাদ্বয়ে নৰেন্দ্ৰ মোদী নেতৃত্বাধীন বিজেপি চৰকাৰৰ শ্ৰমিক-কৃষক বিৰোধী নীতিৰ ক্ষুৰধাৰ সমালোচনা কৰাৰ লগতে এপ্ৰিলৰ পৰা কাৰ্যকৰী হোৱাকৈ ৩৮৪ বিধ নিত্যপ্ৰয়োজনীয় ঔষধৰ মূল্য, বিদ্যুৎ মাচুল, টোল কৰ আৰু পৌৰ কৰ বৃদ্ধিৰ সিদ্ধান্ত অতিশীঘ্ৰে প্ৰত্যাহাৰ কৰিবলৈ দাবী জনায়। উক্ত প্ৰতিবাদী কাৰ্যসূচীত বয়োজেষ্ঠ কৃষক নেতা মইনুল হক আৰু চি আই টি ইউৰ বৰপেটা জিলা কমিটিৰ সদস্য নিলীমা খাতুনেও উপস্থিত থাকে।
