অসম-নাগালেণ্ড সীমান্তৰ উৰিয়ামঘাট অঞ্চলত যোৱা ২৯ অক্টোবৰত নগা দুষ্কৃতিকাৰীয়ে আক্ৰমণ চলোৱাৰ অভিযোগক লৈ অঞ্চলটোত জনতাৰ ক্ষোভ ব্যাপক ৰূপত বৃদ্ধি পাইছে। অসম চৰকাৰ আৰু সীমান্তত নিয়োজিত নিৰাপত্তা বাহিনীয়ে পৰিস্থিতি নিয়ন্ত্ৰণ কৰাত উদাসীনতা আৰু পক্ষপাতিত্ব প্ৰদৰ্শন কৰাৰ অভিযোগ উত্থাপন কৰিছে স্থানীয় ৰাইজে।
শেহতীয়া তথ্য অনুসৰি, দুষ্কৃতিকাৰীসকলে সদ্য উচ্ছেদ কৰা অঞ্চলত অসম চৰকাৰে ৰোপণ কৰা হাজাৰ হাজাৰ উৰিয়াম পুলি কাটি পেলায়। উৰিয়ামঘাট সোণাৰিবিল অঞ্চলত বন বিভাগে ৰোপণ কৰা গছ-গছনিও ধ্বংস কৰা বুলি জানিব পৰা গৈছে।
স্থানীয় ৰাইজে অভিযোগ উত্থাপন কৰিছে যে এই ঘটনাৰ সৈতে নাগালেণ্ড প্ৰশাসনৰ বিষয়াসকল প্ৰত্যক্ষভাৱে জড়িত। সীমান্তৱৰ্তী অঞ্চলসমূহৰ জনসাধাৰণৰ জীৱন, মাটি আৰু সম্পত্তি সুৰক্ষিত কৰাত ৰাজ্য প্ৰশাসন ব্যৰ্থ হোৱা বুলি ক্ষোভ প্ৰকাশ কৰিছে স্থানীয় ৰাইজ তথা সংগথন সমূহে।
উল্লেখ্য যে ব্যাপক প্ৰতিবাদ আৰু জনতাৰ ক্ষোভৰ বাবে ৩০ অক্টোবৰত ১৪২ চি আৰ পি এফৰ ছেক্টৰ কমাণ্ডেণ্ট ইউইথুলিউ নিউমাইক বদলি কৰা হয়। এই পদক্ষেপে নিৰাপত্তা বাহিনীৰ ভূমিকাক লৈ উত্থাপিত অভিযোগসমূহক অধিক গুৰুত্ব প্ৰদান কৰিছে।
শনিবাৰে ধনশিৰি মহকুমা ছাত্ৰ সন্থাই (DMSS) সৰুপথাৰত ধৰ্ণা কাৰ্যসূচী ৰূপায়ণ কৰে। আৰু ছাত্ৰ সংগঠনটোৱে সীমান্তবাসীক সুৰক্ষা প্ৰদান কৰাত ৰাজ্য চৰকাৰৰ ব্যৰ্থতাক তীব্ৰ গৰিহণা দিয়ে।
প্ৰতিবাদকাৰীসকলে হাতে হাতে প্লেকাৰ্ড লৈ “অসম–নাগালেণ্ড সীমান্ত সমস্যা স্থায়ীভাৱে সমাধান কৰক” আৰু “অসমৰ সীমান্তবাসীৰ জীৱন আৰু ভূমি ৰক্ষা কৰক” ধ্বনীৰে প্ৰতিবাদ সাব্যস্ত কৰে।
প্ৰতিবাদকাৰী ছাত্ৰ নেতাসকলে আক্ৰমণকাৰীৰ বিৰুদ্ধে কঠোৰ আৰু তাৎক্ষণিক চৰকাৰী ব্যৱস্থা গ্ৰহণৰ দাবী জনায়।
ছাত্ৰ নেতাসকলে ৰাজ্য আৰু কেন্দ্ৰীয় কৰ্তৃপক্ষ উভয়কে আন্তঃৰাজ্যিক সীমান্তত স্থায়ী শান্তি নিশ্চিত কৰিবলৈ আহ্বান জনাই আৰু চৰকাৰৰ এনে উদাসীনতাই অঞ্চলটোত অধিক অশান্তিৰ সৃষ্টি কৰিব পাৰে বুলি সকীয়াই দিয়ে প্ৰতিবাদকাৰীসকলে।
