হোজাই সমষ্টিৰ বিতৰ্কিত বিধায়ক শিলাদিত্য দেবে ধাৰাবাহিকভাৱে কৰি অহা মুছলমান বিদ্বেষী মন্তব্যই এইবাৰ বিপাঙত পেলাইছে বিজেপিৰ ৰাজ্যিক সংখ্যালঘু মৰ্চাক। এই কথা জানিবলৈ দিয়ে বিজেপিৰ সংখ্যালঘু মৰ্চাৰ ৰাষ্ট্ৰীয় কাৰ্যনিৰ্বাহক তথা বিজেপিৰ ৰাজ্যিক মুখপাত্ৰ মুমিনুল আৱালে।
উল্লেখযোগ্য যে মঙলবাৰে দিচপুৰ লাষ্টগেটস্থিত গড়কপ্তানি বিভাগৰ সংৰক্ষণ কেন্দ্ৰত অনুষ্ঠিত সংখ্যালঘু মৰ্চাৰ ৰাজ্যিক কাৰ্য্যনিৰ্বাহক সভাত নিজৰ ভাষণত মুখপাত্ৰ গৰাকীয়ে শিলাদিত্য দেবৰ বিতৰ্কিত মন্তব্যৰ প্ৰসংগতো উত্থাপন কৰে।
ভাষণ প্ৰসংগত মুমিনুল আৱালে শিলাদিত্য দেবৰ মন্তব্যই সংখ্যালঘু মৰ্চাৰ মাজত এক বিভেদ সৃষ্টি কৰিছে তথা অসন্তুষ্টি ব্যক্ত কৰা বুলি সদৰী কৰে।
তেওঁ লগতে শিলাদিত্য দেৱক সকীয়নি দি কয় ‘শিলাদিত্য দেৱে বিভিন্নসময়ত সংখ্যালঘুৰ বিপক্ষে মন্তব্য দাঙি ধৰে। শিলাদিত্য দেবে বাংলাদেশী মুছলমানৰ বিৰুদ্ধে মাত মাতে যদিও এটা কথা ঠিক যে সঁচা কথা ক’লেও যি টি মঞ্চত যি টি কথা ক’ব নালাগে।’ লগতে তেওঁৰ মন্তব্যই যাতে সমাজত বিশৃংখলতা নানে তাৰ বাবেও মুখপাত্ৰ গৰাকীয়ে শিলাদিত্য দেবলৈ আহ্বান জনায়।
আনহাতে একেখন সভাতে ভাষণ প্ৰদান কৰি ৰাজ্যিক বিজেপিৰ উপ-সভাপতি তৌফিক ৰহমানেও নিজৰ ভাষণ প্ৰসংগত শিলাদিত্য দেবৰ মন্তৱ্যৰ বিৰোধিতা কৰে।
তেওঁ কয় ‘তেওঁ এগৰাকী সাধাৰণ বিধায়ক। বিধায়ক হিচাপে সাধাৰণ মানুহে জিকাইছে, তেওঁক দলে বিধায়ক বনাইছে, গতিকে দলৰ ঊৰ্ধ্বত গৈ তেওঁ ইমানখিনি কথা ক’ব নোৱাৰে।
তাৰোপৰি উপসভাপতি গৰাকীয়ে শিলাদিত্য দেবৰ বিতৰ্কিত মন্তব্যৰ ওপৰত কয় যে, ‘দুই এজন বিকৃত মস্তিষ্কৰ মানুহে এইদৰে মন্তব্য কৰি থাকিলেও তেওঁলোকৰ কথালৈ আওকাণ কৰি থাকিব লাগে, বিশেষ গুৰুত্ব দিব নালাগে।‘
মনকৰিব লগীয়া যে বিতৰ্কিত তথা প্ৰৰোচনামূলক মন্তব্য কৰা বুলি অভিযোগ তুলি ইতিমধ্যে আলফা নেতা জীতেন দত্ত আৰু মৃণাল হাজৰিকাক গ্ৰেপ্তাৰ কৰি জে’ললৈ প্ৰেৰণ কৰা হ’ল। কিন্তু ইয়াৰ বিপৰীতে বৰ্তমানলৈকে বিজেপিৰ বিতৰ্কিত বিধায়ক গৰাকীক গ্ৰেপ্তাৰ নকৰাটোৱে বিজেপি দলৰ স্বৈৰাচাৰিতা প্ৰকাশ পাইছে।
