দুদিনপূৰ্বে শিৱসাগৰৰ অমায়িক যুৱক তপন শইকীয়াৰ দুয়োটা কিডনী বিকল হোৱাৰ এক বাতৰি প্ৰকাশ পাইছিল ‘নৰ্থ-ইষ্ট নাও’ত। উন্নত চিকিৎসাৰ বাবে অসমৰ বাহিৰলৈ নিবলৈ অসমৰ্থ তপনৰ পৰিয়াল। তপনৰ পৰিয়ালক আৰ্থিক সাহায্য প্ৰদান কৰিবলৈ ওলাই আহিছিল বীৰ লাচিত সেনা শিৱসাগৰ জিলা সমিতি, জুবিন ফেন ক্লাৱ, বন্ধুবৰ্গ তথা শিৱসাগৰবাসী ৰাইজ।
বীৰ লাচিত সেনাৰ সভাপতি চিতু বৰুৱাৰ নেতৃত্বত শুকুৰবাৰ আৰু শনিবাৰে জয়সাগৰ তিনি আলিৰ পৰা সমগ্ৰ শিৱসাগৰ চহৰ পদযাত্ৰা কৰি পথচাৰী তথা ব্যৱসায়ী প্ৰতিষ্ঠানৰ পৰা তপনৰ বাবে আৰ্থিক সাহায্য বিচাৰে। প্ৰায় ৩০ কিলোমিটাৰ পথ পদ যাত্ৰা কৰি সংগঠনকেইটাৰ শতাধিক সদস্য-সদস্যাই প্ৰায় এক লক্ষাধিক টকা সংগ্ৰহ কৰিবলৈ সক্ষম হয়। তপনৰ বাবে জাতি-ধৰ্ম নিৰ্বিশেষে প্ৰতিজন শিৱসাগৰীয়াই নিজৰ সাধ্যানুসাৰে আৰ্থিক সাহায্য আগবঢ়ায়।
আজি পুৱা বীৰ লাচিত সেনা আৰু জুবিন ফেন ক্লাৱৰ সদস্যই তপন শইকীয়াৰ ঘৰলৈ গৈ তপনৰ পিতৃ অৱসৰপ্ৰাপ্ত শিক্ষক অমূল্য শইকীয়া আৰু তপনৰ মাতৃৰ হাতত নগদ ৮১,০০১.০০ টকা প্ৰদান কৰে। আনহাতে অনলাইন যোগে প্ৰায় ছাব্বিশ হাজাৰ টকা সংগ্ৰহ হোৱা বুলিও জানিবলৈ দিয়ে।
বীৰ লাচিত সেনা, জুবিন ফেন ক্লাৱ আৰু বন্ধুবৰ্গৰ অনুৰোধত শিৱসাগৰবাসী ৰাইজে তপনৰ বাবে যি মৰম আৰু আৰ্শীবাদ আগবঢ়ালে তাৰ বাবে তপনৰ পিতৃ-মাতৃয়ে সকলোকে কৃতজ্ঞতা প্ৰকাশ কৰে।
লগতে পঢ়ক : মানুহে মানুহৰ বাবে|| ৰুগীয়া যুৱকৰ সাহায্যাৰ্থে শিৱসাগৰৰ ৰাজপথত ৰাইজ
তপনক পূৰ্বৰ দৰে সুস্থ কৰি তুলিবলৈ আৰু অধিক টকাৰ প্ৰয়োজন। সেয়ে আৰ্থিক সাহায্য আগবঢ়াই তপনক সুস্থ কৰি তুলিবলৈ বীৰ লাচিত সেনা আৰু জুবিন ফেন ক্লাৱে সকলোকে অনুৰোধ জনাইছে। তপনৰ প্ৰতি শিৱসাগৰবাসীয়ে যি মানবীয়তাৰ পৰিচয় দিলে তাৰ বাবে সমগ্ৰ শিৱসাগৰবাসীক ধন্যবাদ জনায় সংগঠন দুটাই।
ইয়াৰ উপৰি সংগঠন দুটাই এই দুৰ্ভগীয়া পৰিয়ালটোক চৰকাৰী নিয়ম অনুযায়ী সহায় কৰিবলৈ অসম চৰকাৰ আৰু স্বাস্থ্য মন্ত্ৰীকো অনুৰোধ জনায়।
তপনক যদি কোনো সদাশয় ব্যক্তিয়ে আৰ্থিক সহায় কৰিব বিচাৰে তেন্তে তলৰ বেংক একাউণ্টত নিজ ইচ্ছানুসৰি আৰ্থিক সহায় আগবঢ়াব পাৰে।