ধিং এক্সপ্ৰেছলৈ ৪ ছেপ্তেম্বৰত বিশাল ৰাজহুৱা সম্বৰ্ধনা
ধিং এক্সপ্ৰেছ হিমা দাসক ৰাজহুৱা সম্বৰ্ধনাৰ ‘দুঃশ্চিন্তা’ৰ পৰা সুৰক্ষিত কৰিবলৈ গুৱাহাটীত এক কেন্দ্ৰীয় সম্বৰ্ধনাৰ আয়োজন কৰিছে অসম চৰকাৰে।
অসমৰ স্বৰ্ণ কন্যাগৰাকীক আদৰণি জনাবলৈ অসমৰ ক্ৰীড়াপ্ৰেমী ঢাপলি মেলাটো স্বাভাৱিক। যি নহ’লেও হিমাই দেশৰ হৈ আজুৰি আনিছে এটা সোণ আৰু ২টাকৈ ৰূপৰ পদক আৰু এছিয়ান গে’মছ বা আন তেনে আন্তঃৰাষ্ট্ৰীয় প্ৰতিযোগিতাত ইমান পদক জিনা তেৱেঁই হৈছে উত্তৰ-পূৰ্বাঞ্চলৰ প্ৰথমগৰাকী ক্ৰীড়াবিদ।
অসম চৰকাৰৰ এগৰাকী জ্যেষ্ঠ বিষয়াই নৰ্থ ইষ্ট নাও-ক শনিবাৰে জনোৱা মতে নিৰ্ধাৰিত সূচী অনুযায়ী, হিমা অহা ৪ ছেপ্তেম্বৰত গুৱাহাটী পাবহি বুলি আশা কৰা হৈছে, আৰু একেদিনাই তেওঁ নগাঁৱৰ ধিঙৰ পিতৃগৃহত উপস্থিত হোৱাৰ কথা।
‘সৰুসজাই ষ্টেডিয়ামত আমি এক ৰাজহুৱা আদৰণিৰ পৰিকল্পনা কৰিছো,’ এছিয়ান গে’মছৰ ব্যস্ত সূচীৰ পিছত বিভিন্ন সংগঠনৰ অসংখ্য আদৰণিত উপস্থিত থকাটো হিমাৰ বাবে পীড়াদায়ক হ’ব বুলি উল্লেখ কৰি বিষয়াজনৰ মন্তব্য।
বিষয়াগৰাকীয়ে দাবী কৰা মতে অসমৰ মুখ্য মন্ত্ৰী সৰ্বানন্দ সোণোৱালৰ লগতে অন্যান্য মন্ত্ৰী আৰু জ্যেষ্ঠ আমোলাই হিমাৰ ৰাজহুৱা আদৰণিত অংশ গ্ৰহণ কৰিব।
জ্যেষ্ঠ বিষয়াগৰাকীয়ে জনাই যে হিমাক লৈ চৰকাৰ অতিৰিক্তভাৱে সতৰ্ক হ’ব কাৰণ তেওঁ তেওঁৰ অনুশীলনত অধিক মনোযোগ আৰোপ কৰাৰ প্ৰয়োজন আৰু এছিয়ান গে’মছৰ সফলতাৰ সম্বৰ্ধনাৰ নামত তেওঁ উটি যোৱাটো উচিত নহ’ব।
পৰিকল্পনা অনুযায়ী সৰুসজাই ষ্টেডিয়ামত ৪ ছেপ্তেম্বৰৰ সম্বৰ্ধনা অনুষ্ঠানত ভাগ ল’বলৈ সকলো প্ৰধান ক্ৰীড়া সংস্থাক আহ্বান জনোৱা হ’ব। ‘প্ৰত্যেকেই যি যেনেকে ভাল দেখে সম্বৰ্ধনা জনাব,’ বিষয়াগৰাকীয়ে ক’লে।
সাধাৰণ ৰাইজকো অনুষ্ঠানত ভাগ ল’বলৈ অনুমতি দিয়া হ’ব; এছিয়ান গে’মছত হিমাৰ প্ৰদৰ্শনক লৈ অসমৰ প্ৰত্যেকজন লোক গৌৰৱান্বিত বুলি উল্লেখ কৰি বিষয়াগৰাকীৰ দাবী।
অৱশ্যে হিমাৰ ৰাজহুৱা সম্বৰ্ধনাৰ পৰিকল্পনাক লৈ অসম চৰকাৰে কোনো বিভাগীয় ঘোষণা কৰা নাই। তেওঁ অহাৰ দিনটো নিশ্চিত হোৱাৰ পিছত সোমবাৰে চূড়ান্ত ঘোষণা কৰা হ’ব, বিষয়াগৰাকীয়ে জনালে।