২০১৯ চনত পুলৱামা আৰু ২০২২ চনত গোৰখপুৰ মন্দিৰত সংঘটিত সন্ত্ৰাসবাদী আক্ৰমণকে ধৰি ভাৰতৰ মাটিত হোৱা কেইবাটাও সন্ত্ৰাসবাদী আক্ৰমণত ব্যৱহৃত বিস্ফোৰক সামগ্ৰী ক্ৰয় কৰা হৈছিল অনলাইন বাণিজ্যিক পৰ্টেল এমাজনৰ পৰা।
ভাৰতৰ মাটিত একাধিক সন্ত্ৰাসবাদী আক্ৰমণত ই-কমাৰ্চ কোম্পানী আমাজনৰ পৰা বিস্ফোৰক ক্ৰয় কৰিছিল সন্ত্ৰাসবাদীয়ে। শেহতীয়াকৈ আন্তঃৰাষ্ট্ৰীয় সংস্থা ফাইনেন্সিয়েল একচন টাস্ক ফ’ৰ্চ চমুকৈ ফাটাই এনে চাঞ্চল্যকৰ তথ্য ৰাজহুৱা কৰিছে।
ফাটাৰ প্ৰতিবেদনত কোৱা হৈছে, ‘ইতিমধ্যে এই আক্ৰমণত পাকিস্তানী সন্ত্ৰাসবাদী সংগঠন জইছ-ই-মহম্মদ জড়িত বুলি জানিব পৰা গৈছে। তদন্তত পোহৰলৈ আহিছে যে সীমান্তৰ সিপাৰৰ পৰা ভাৰতলৈ বৃহৎ সংখ্যক আই ই ডি বিস্ফোৰক সৰবৰাহ কৰা হৈছিল। এলুমিনিয়ামৰ পাউদাৰে এই বোমাবোৰক আৰু অধিক মাৰাত্মক কৰি তোলে। সন্ত্ৰাসবাদীয়ে সেই পাউদাৰ ই-কমাৰ্চ কোম্পানী আমাজনৰ পৰা কিনিছিল।‘
কেৱল সেয়াই নহয়, গোৰখপুৰ মন্দিৰত সন্ত্ৰাসবাদী আক্ৰমণত ব্যৱহৃত বিস্ফোৰক সামগ্ৰীও এই ই-কমাৰ্চ চাইটৰ পৰা ক্ৰয় কৰা হৈছিল।
সংস্থাটোৱে দাবী কৰিছে যে সন্ত্ৰাসবাদীয়ে নিজৰ নাম আৰু ঠিকনা লুকুৱাই ৰাখি অনলাইন অৰ্ডাৰ দিবলৈ ভিপিএন ব্যৱহাৰ কৰিছিল। ইয়াত পেইপিএলৰ জৰিয়তে পেমেণ্ট কৰা হৈছিল। এই পেমেণ্ট মোডত বিদেশী একাউণ্টৰ পৰা প্ৰায় ৬ লাখ ৭০ হাজাৰ টকা প্ৰেৰণ কৰা হৈছিল।
তদন্তত দাবী কৰা হৈছে যে ভিপিএন সেৱা ক্ৰয়ৰ বাবে মুঠ ৪৪টা আন্তঃৰাষ্ট্ৰীয় লেনদেন কৰা হৈছিল। বিদেশী একাউণ্টৰ পৰা এই সন্দেহজনক লেনদেনৰ বাবে পেইপিএল একাউণ্টো স্থগিত ৰখা হৈছিল।
প্ৰতিবেদনত লগতে কোৱা হৈছে যে কিছুমান দেশৰ চৰকাৰে আৰ্থিকভাৱে, প্ৰশিক্ষণৰ জৰিয়তে আৰু ব্যৱসায়িকভাৱে সন্ত্ৰাসবাদী সংগঠনক সহায় কৰিছে। যেনে, কোনো এখন দেশৰ পৰা তেল পঠোৱা হৈছে, আন এখন দেশত সোণলৈ ৰূপান্তৰ কৰা হৈছে, আন এখন দেশত নগদ ধনলৈ ৰূপান্তৰ কৰা হৈছে। তেনেদৰে সন্ত্ৰাসবাদী সংগঠনৰ ওচৰলৈ সাহায্য পঠোৱা হৈছে।
সন্ত্ৰাসবাদক লৈ উদ্বেগ প্ৰকাশ কৰি ফাটাই কয় যে চিন্তনীয় কথাটো হ’ল এতিয়া সন্ত্ৰাসবাদী সংগঠনসমূহে আগৰ দৰে কাম কৰা নাই। তেওঁলোকৰ পদ্ধতি সলনি হৈছে। সৰু সৰু গোটত বিভক্ত হৈ নিজৰ নিজৰ অঞ্চলত কাম কৰি আছে। উদাহৰণস্বৰূপে, আগতে আল কায়দাই তেওঁলোকৰ সকলো সিদ্ধান্ত কেন্দ্ৰীয় সমিতি ‘মজলিছ আল শ্বুৰা’ৰ জৰিয়তে লৈছিল যদিও এতিয়া তেওঁলোকে বিভিন্ন অঞ্চলৰ গোটক দায়িত্ব দিছে। ভাৰতত সন্ত্ৰাসবাদ বিয়পোৱাৰ বাবে কাম কৰা তেওঁলোকৰ গোটটোৰ নাম ‘ভাৰতীয় উপমহাদেশৰ আল কায়দা’ (AQIS) বুলি জানিব পৰা গৈছে।
