গুজৰাটৰ ৰাজকোট জিলাত সংঘটিত হোৱা এক অতি ভয়ংকৰ আৰু অমানৱীয় কাণ্ডৰ বিচাৰ প্ৰক্ৰিয়া মাত্ৰ ডেৰ মাহৰ ভিতৰত সম্পূৰ্ণ কৰি আদালতে এক ঐতিহাসিক ৰায়দান কৰিছে। এজনী ৬ বছৰীয়া কনমানি ছোৱালীক ধৰ্ষণ কৰাৰ লগতে তাইৰ ওপৰত চলোৱা পাশৱিক অত্যাচাৰৰ বাবে দোষী সাব্যস্ত হোৱা তিনিটা সন্তানৰ পিতৃ ৰামসিং দুদৱাক মৃত্যুদণ্ডৰ শাস্তি দিয়া হৈছে। এই ঘটনাই সমগ্ৰ দেশ কঁপাই যোৱাৰ লগতে ন্যায়পালিকাই ক্ষিপ্ৰতাৰে লোৱা এই পদক্ষেপক সকলোৱে প্ৰশংসা কৰিছে।
যোৱা ৪ ডিচেম্বৰত ৰাজকোটত এই জঘন্য ঘটনাটো সংঘটিত হৈছিল। জানিব পৰা মতে কনমানি ছোৱালীজনীয়ে নিজৰ ঘৰৰ ওচৰৰ ৰাস্তাত খেলি থকা অৱস্থাত ৰামসিং নামৰ লোকজনে তাইক জোৰকৈ টানি নিচেই কাষতে থকা এখন হাবিলৈ লৈ গৈছিল। তাতে তাইক ধৰ্ষণ কৰাৰ উপৰিও যন্ত্ৰণাত কান্দি থকা অৱস্থাত অভিযুক্তই শিশুজনীৰ যৌনাংগত এডাল লোৰ ৰড ভৰাই দিছিল। ইয়াৰ ফলত শিশুটি গুৰুতৰভাৱে আঘাতপ্ৰাপ্ত আৰু ৰক্তাক্ত হৈ পৰিছিল। অপৰাধ কৰাৰ পিছত লোকজনে শিশুটিক তেনে অসহায় অৱস্থাতে হাবিৰ মাজত পেলাই থৈ পলাই গৈছিল।
পৰিয়ালৰ অভিযোগৰ ভিত্তিত আৰক্ষীয়ে ক্ষিপ্ৰতাৰে তদন্ত আৰম্ভ কৰিছিল আৰু ঘটনাৰ চাৰিদিনৰ ভিতৰতে অভিযুক্ত ৰামসিংক গ্ৰেপ্তাৰ কৰিছিল। আৰক্ষীয়ে গোচৰটোৰ গুৰুত্ব বুজি মাত্ৰ ১১ দিনৰ ভিতৰত আদালতত চাৰ্জশ্বীট দাখিল কৰিছিল। ইয়াৰ মাজতে ভুক্তভোগী শিশুটিৰ পিতৃয়ে আদালতলৈ এখন পত্ৰ লিখি অতি সোনকালে বিচাৰ প্ৰক্ৰিয়া শেষ কৰি দোষীক উচিত শাস্তি দিবলৈ আহ্বান জনাইছিল। আদালতৰ পৰাও গোচৰটো অতি গুৰুত্বসহকাৰে লোৱা হৈছিল আৰু প্ৰতিদিনে এই গোচৰৰ শুনানি চলিছিল।
গুজৰাট চৰকাৰে এই সন্দৰ্ভত এক কঠোৰ স্থিতি গ্ৰহণ কৰা দেখা গৈছে। ৰাজ্যখনৰ উপ-মুখ্যমন্ত্ৰী হৰ্ষ চাংভীয়ে ছচিয়েল মিডিয়াৰ জৰিয়তে জনাইছে যে কনমানি ছোৱালী বা মহিলাৰ ওপৰত যিকোনো ধৰণৰ অত্যাচাৰ সহ্য কৰা নহ‘ব। তেওঁ স্পষ্টকৈ কৈছে যে ৰাজ্যখনত নাৰী নিৰ্যাতনৰ ক্ষেত্ৰত চৰকাৰে সদায় শূন্য সহনশীলতা নীতি অৱলম্বন কৰিব। এই গোচৰটোৰ জৰিয়তে অপৰাধীসকললৈ এক কঠোৰ বাৰ্তা প্ৰেৰণ কৰা হৈছে যে এনে ঘৃণনীয় কাম কৰিলে তেওঁলোকৰ জীৱন শেষ হৈ যাব।
এফআইআৰ দাখিল কৰাৰ মাত্ৰ ৪০ দিনৰ ভিতৰতে পকসো আইনৰ অধীনত আদালতত দোষী সাব্যস্ত হোৱাৰ পাছত শনিবাৰে ৰামসিংক ফাঁচীৰ ৰায় শুনোৱা হয়। সমাজৰ বাবে এক কুপথ প্ৰদৰ্শক হিচাপে পৰিগণিত হোৱা এনে ঘটনাৰ বিৰুদ্ধে ন্যায়ালয়ৰ এই ক্ষিপ্ৰ আৰু কঠোৰ পদক্ষেপে ভুক্তভোগী পৰিয়ালটোক ন্যায় প্ৰদান কৰাৰ লগতে সমাজত এক সুস্থ নিদৰ্শন দাঙি ধৰিছে।
