পঞ্জাৱৰ পাঠানকোটত আৰক্ষীয়ে গ্ৰেপ্তাৰ কৰিছে এটা বৃহৎ চোৰাংচোৱা চক্ৰ। পাকিস্তানলৈ সেনা আৰু অৰ্ধসামৰিক বাহিনীৰ চলাচলৰ তথ্য সৰবৰাহৰ অভিযোগত এজন ব্যক্তিক গ্ৰেপ্তাৰ কৰা হৈছে। ধৃত ব্যক্তিজনৰ নাম বলজিৎ সিং ওৰফে বিট্টু। তেওঁ পাঠানকোটৰ চক ধৰিৱাল গাঁৱৰ বাসিন্দা।
পাঠানকোট-জম্মু ৰাষ্ট্ৰীয় ঘাইপথ ৪৪ৰ এখন দলঙৰ সমীপৰ এখন দোকানত ইণ্টাৰনেট ভিত্তিক চিচিটিভি কেমেৰা স্থাপন কৰা হৈছিল। সেই কেমেৰাৰ জৰিয়তে ভাৰতীয় সেনা আৰু অৰ্ধসামৰিক বাহিনীৰ গতিবিধি অবিৰতভাৱে নিৰীক্ষণ কৰা হৈছিল বুলি অভিযোগ উঠিছে। এই ফুটেজসমূহ পাকিস্তান আৰু বিদেশৰ হেণ্ডলাৰলৈ ইলেক্ট্ৰনিকভাৱে প্ৰেৰণ কৰা হৈছিল।
আৰক্ষীৰ জেৰাৰ সময়ত বলজিতে স্বীকাৰ কৰে যে চলিত বৰ্ষৰ জানুৱাৰী মাহত তেওঁ সুজানপুৰৰ সমীপৰ ৰাষ্ট্ৰীয় ঘাইপথৰ কাষৰ এখন দোকানত কেমেৰা স্থাপন কৰিছিল। তদন্তকাৰীয়ে জনোৱা মতে, ডুবাইৰ এজন অচিনাকি ব্যক্তিৰ পৰাও তেওঁ এই কামৰ নিৰ্দেশনা লাভ কৰিছিল। এই কামৰ বাবে তেওঁক ৪০ হাজাৰ টকা দিয়া বুলিও দাবী কৰা হৈছে।
চোৰাংচোৱাৰ সূত্ৰৰ পৰা সন্দেহজনক গতিবিধিৰ তথ্য লাভ কৰি তদন্ত আৰম্ভ কৰা হয়। ধৃত ব্যক্তিজনৰ পৰা আৰক্ষীয়ে এটা চিচিটিভি কেমেৰা আৰু ইণ্টাৰনেট ৱাই-ফাই ৰাউটাৰ জব্দ কৰে। ইয়াৰ পিছতে চাৰিজন লোকৰ বিৰুদ্ধে সুজানপুৰ থানাত গোচৰ ৰুজু হয়।
বলজিতৰ উপৰিও অভিযুক্তৰ তালিকাত বিক্ৰমজিৎ সিং ওৰফে বিক্কা, বলৱিন্দৰ সিং ওৰফে বিকি আৰু তৰণপ্ৰীত সিং ওৰফে তন্নু আছে। আৰক্ষীয়ে দাবী কৰিছে যে তেওঁলোক ৰাষ্ট্ৰ বিৰোধী আৰু অপৰাধমূলক কাম-কাজত জড়িত।
ইতিমধ্যে সমগ্ৰ ঘটনাৰ প্ৰতিবেদন উৰ্ধতন কৰ্তৃপক্ষলৈ প্ৰেৰণ কৰা হৈছে। তদন্তকাৰীয়ে এতিয়া সীমাৰ সিপাৰৰৰ সৈতে যোগসূত্ৰ আৰু ধনৰ উৎসৰ তদন্ত আৰম্ভ কৰিছে। বাকী অভিযুক্তক গ্ৰেপ্তাৰ কৰিবলৈ কেইবাটাও স্থানত তালাচী অব্যাহত আছে।
উল্লেখযোগ্য যে যোৱা মাহতো পঞ্জাৱ আৰক্ষীয়ে পাকিস্তানৰ আই এছ আইৰ সমৰ্থিত দুটা চোৰাংচোৱা চক্ৰ উৎখাত কৰিছিল। তাৰ পাছত তদন্তত প্ৰকাশ পায় যে চীনত নিৰ্মিত সৌৰশক্তিচালিত চিচিটিভি কেমেৰা ব্যৱহাৰ কৰি সেনা ঘাটি আৰু গুৰুত্বপূৰ্ণ সামৰিক স্থানৰ লাইভ ফুটেজ পাকিস্তানলৈ প্ৰেৰণ কৰা হৈছে।
জলন্ধৰৰ চোৰাংচোৱা বিৰোধী শাখাই অভিযান চলাই গ্ৰেপ্তাৰ কৰে এজন অভিযুক্তক। তেওঁৰ পৰা চীনত নিৰ্মিত চিচিটিভি কেমেৰা, ইউএছবি সংযুক্ত সৌৰ পেনেল আৰু ৪জি সংযোগী যন্ত্ৰ উদ্ধাৰ কৰা হয়।
আনহাতে, কেন্দ্ৰীয় সংস্থাৰ সৈতে যৌথ অভিযানত কাপুৰথালা আৰক্ষীয়ে আন এটা মডিউল ভাঙি পেলায়। তাত দুজন লোকক গ্ৰেপ্তাৰ কৰা হয়। উদ্ধাৰ হৈছে ৪টা মোবাইল ফোন, চিম ভিত্তিক চিচিটিভি কেমেৰা আৰু ৱাই-ফাই চেট।
পঞ্জাৱ আৰক্ষীৰ ডিজিপি গৌৰৱ যাদৱে কৈছিল যে এই গেংসমূহে সেনাৰ সৈতে জড়িত গুৰুত্বপূৰ্ণ অঞ্চলসমূহৰ আশে-পাশে কৌশলগতভাৱে সৌৰ আৰু চিম ভিত্তিক কেমেৰা স্থাপন কৰি আছে। এটা মোবাইল এপৰ জৰিয়তে পাকিস্তানী হেণ্ডলাৰলৈ প্ৰেৰণ কৰা হৈছে এই লাইভ ফুটেজ।
তদন্তত পাকিস্তানত বাস কৰা ‘ফৌজী’ নামৰ এজন হেণ্ডলাৰে অভিযুক্তক কেমেৰা লগোৱাৰ বাবে ৩৫ হাজাৰ টকা দিয়াৰ কথাও পোহৰলৈ আহিছে। একে সময়তে আৰক্ষীয়ে ড্ৰাগছ সৰবৰাহৰ লগতো তেওঁলোক জড়িত বুলি অভিযোগ উত্থাপন কৰিছে।
