ৰাছিয়াই ইয়াৰ মিত্ৰ আৰু চুবুৰীয়া বেলাৰুছত কৌশলগত পাৰমাণৱিক অস্ত্ৰ মোতায়েন কৰিব। ৰাছিয়াৰ ৰাষ্ট্ৰপতি ভ্লাদিমিৰ পুটিনে শনিবাৰে এই কথা ঘোষণা কৰিছে।
ৰাষ্ট্ৰপতি পুটিনে কয় যে আমেৰিকা যুক্তৰাষ্ট্ৰই কেইবা দশক ধৰি এইটো কৰি আহিছে। তেওঁলোকে দীৰ্ঘদিন ধৰি মিত্ৰশক্তিৰ বাবে কৌশলগত পাৰমাণৱিক অস্ত্ৰ মোতায়েন কৰি আহিছে। গতিকে, ইয়াত একো অস্বাভাৱিকতা নাই।
লগতে পঢ়ক: সমষ্টিসমূহৰ সীমা নিৰ্ধাৰণ: আজি অসমলৈ আহিব নিৰ্বাচন আয়োগৰ দল
এই বিষয়টোত তেওঁ বেলাৰুছৰ ৰাষ্ট্ৰপতি আলেকজেণ্ডাৰ লুকাচেঙ্কোৰ সৈতে কথা পাতিছে বুলি জানিবলৈ দি পুটিনে কয়, “আমি সন্মত হৈছো যে দুয়োখন দেশে (আমেৰিকা যুক্তৰাষ্ট্ৰৰ দৰে) একেই কাম কৰিম।”
শেহতীয়াকৈ, ব্ৰিটেইনে ইউক্ৰেইনলৈ ইউৰেনিয়াম সমৃদ্ধ গোলাবাৰুদ প্ৰেৰণ কৰাৰ কথা ঘোষণা কৰিছে। এই সন্দৰ্ভত তীব্ৰ প্ৰতিক্ৰিয়া ব্যক্ত কৰি পুটিনে কয় যে যদি এনে কৰা হয়, তেন্তে ৰাছিয়াই ইয়াৰ প্ৰত্যুত্তৰ দিবলৈ বাধ্য হ’ব। ইয়াৰ ঠিক পিছতে শনিবাৰে তেওঁ বেলাৰুছত কৌশলগত পাৰমাণৱিক অস্ত্ৰ মোতায়েন কৰাৰ কথা ঘোষণা কৰে।
লগতে পঢ়ক: প্ৰকৃতিৰ ৰোষত মিচিচিপি: ধুমুহা-বজ্ৰপাতে প্ৰাণ ল’লে ২৩ গৰাকীৰ, আহত কেইবাগৰাকীও
বেলাৰুছৰ সৈতে ইউক্ৰেইনৰো এক বৃহৎ সীমান্ত আছে। ২০২২ চনৰ ২৪ ফেব্ৰুৱাৰীত ৰাছিয়াই ইউক্ৰেইন আক্ৰমণ কৰে। ইউক্ৰেনেও আক্ৰমণৰ বাবে ৰাছিয়াই বেলাৰুছ ব্যৱহাৰ কৰাৰ অভিযোগ উত্থাপন কৰিছে।
