ৰাছিয়া-ইউক্ৰেইন যুদ্ধই নতুন পাক লৈছে। ৰাছিয়াৰ ৰাষ্ট্ৰপতি ভ্লাডিমিৰ পুটিনৰ চকু এতিয়া ডনেটস্কৰ ওচৰৰ এখন প্ৰায় নিৰ্জন চহৰৰ ওপৰত। পক্ৰ‘ভস্ক (Pokrovsk) নামৰ এই চহৰখনত তিনিবছৰীয়া যুদ্ধ তথা অহৰহ বোমাবৰ্ষণৰ ফলত জনসংখ্যা ৬০ হাজাৰৰ পৰা এতিয়া ১৫০০ লৈ হ্ৰাস পাইছে। ধ্বংসস্তূপেৰে ভৰ্তি চহৰখনত প্ৰায় নাগৰিক শূন্য অৱস্থা, অট্টালিকা, পথ, শিক্ষা প্ৰতিষ্ঠান— সকলোতে যুদ্ধৰ প্ৰভাৱ স্পষ্ট। তথাপিও ৰাছিয়াই এই চহৰখন দখল কৰিবলৈ প্ৰায় ১ লাখ সৈনিক মোতায়েন কৰিছে। প্ৰশ্ন উত্থাপন হৈছে যে এই প্ৰায় নিৰ্জন চহৰখনত কি আছে যাৰ বাবে পুটিন যিকোনো মূল্যত ইয়াক দখল কৰিবলৈ উদ্ধত হৈছে?
সংবাদ সংস্থা ৰয়টাৰ্ছৰ তথ্য অনুসৰি, পক্ৰ’ভস্ক হৈছে পূব ইউক্ৰেইনৰ ডনেটস্ক অঞ্চলৰ এক গুৰুত্বপূৰ্ণ পথ তথা ৰে’ল সংযোগস্থল। এই এলেকা ৰাছিয়াৰ বাবে কৌশলগতভাৱে অত্যন্ত গুৰুত্বপূৰ্ণ। ৰাছিয়াই বৰ্তমান ডনেটস্ক আৰু লুহানস্ক মিলি গঠিত ডনবাছ অঞ্চল সম্পূৰ্ণৰূপে নিয়ন্ত্ৰণ কৰাৰ লক্ষ্য কৰি লৈছে, আৰু পক্ৰ’ভস্কক সেই দিশত প্ৰৱেশদ্বাৰ বুলি গণ্য কৰা হয়।
যদিহে ৰাছিয়াই পক্ৰ‘ভস্ক দখল কৰিবলৈ সক্ষম হয়, তেন্তে ই ক্ৰাইমাটৰ্ছক আৰু স্লোভিয়ানস্কৰ দৰে বৃহৎ চহৰৰ দিশে আগবাঢ়িব পাৰে। সামৰিক বিশ্লেষকসকলৰ মতে, ই হ’ব ২০২৪ চনৰ ফেব্ৰুৱাৰীত আভডিভকাৰ পতনৰ পিছত ৰাছিয়াৰ সৰ্বাধিক ডাঙৰ সামৰিক সফলতা।
উল্লেখযোগ্য যে চহৰখনৰ কৌশলগত গুৰুত্বৰ লগতে ইয়াৰ অৰ্থনৈতিক দিশতো গুৰুত্বপূৰ্ণ ভূমিকা আছে। পক্ৰ‘ভস্কত অৱস্থিত ইউক্ৰেইনৰ একমাত্ৰ কয়লা খনি, যিটো দেশখনৰ তীখা উদ্যোগৰ মেৰুদণ্ড। ৰাছিয়াই এই খনিটোৰ নিয়ন্ত্ৰণ লাভ কৰি ইউক্ৰেইনৰ অৰ্থনীতি আৰু উদ্যোগিক সামৰ্থ্য দুৰ্বল কৰিব বিচাৰিছে। যদিও জানুৱাৰীত ইউক্ৰেইনীয় সংস্থা Metinvest-এ খনন বন্ধ কৰিছিল, তথাপিও ৰাছিয়াই অঞ্চলটোত পুনৰ প্ৰৱেশৰ চেষ্টা আৰম্ভ কৰিছে।
এইবাৰ ৰাছিয়াই পূৰ্বৰ দৰে প্ৰত্যক্ষ যুদ্ধৰ পথ অৱলম্বন কৰা নাই। সৰু সৰু ইউনিট আৰু ড্ৰোন ব্যৱহাৰ কৰি ইউক্ৰেইনৰ যোগান লাইন বিচ্ছিন্ন কৰিছে। ৰাছিয়াৰ পক্ষৰ পৰা দাবী কৰা হৈছে যে তেওঁলোকে নিজৰ সৈন্যৰ লোকচান কমাই আনিছে, যদিও ইউক্ৰেইনৰ দাবী অনুসৰি, চহৰখনৰ বহু অংশ এতিয়াও তেওঁলোকৰ নিয়ন্ত্ৰণত আছে।
কিয়েভৰ মতে, ৰাছিয়াৰ বাহিনীয়ে চহৰখনৰ কিছু অংশত অগ্ৰগতি সাধন কৰিছে যদিও সম্পূৰ্ণ নিয়ন্ত্ৰণ লাভ কৰিব পৰা নাই। ৰাছিয়াৰ প্ৰচণ্ড আক্ৰমণ সত্ত্বেও ইউক্ৰেইনৰ সেনাই প্ৰতিৰোধ অব্যাহত ৰাখিছে।
