ডেনমাৰ্কৰ ৰাণী মাৰ্গাৰেট দ্বিতীয়ই নতুন বছৰত পদত্যাগ কৰাৰ কথা ঘোষণা কৰিছে। তেওঁ কয় যে তেওঁৰ পিছত তেওঁৰ পুত্ৰ ৰাজকুমাৰ ফ্ৰেডেৰিক আহিব। দেওবাৰে নৱবৰ্ষৰ পূৰ্বে ডেনমাৰ্কৰ এটা চেনেলত এক অনুষ্ঠানত অংশগ্ৰহণ কৰে মাৰ্গাৰেটে। তাতেই ৮৩ বছৰীয়া মাৰ্গাৰেটে ৰাণী পদৰ পৰা পদত্যাগ কৰাৰ ইচ্ছা প্ৰকাশ কৰিছিল।
অহা ১৪ জানুৱাৰীত তেওঁৰ পুত্ৰ ৰাজকুমাৰ ফ্ৰেডেৰিকক দায়িত্ব অৰ্পণ কৰি মাৰ্গাৰেটে (দ্বিতীয় মাৰ্গাৰেট) পদত্যাগ কৰাৰ কথা ঘোষণা কৰে। আনহাতে, ফ্ৰেডেৰিকৰ পত্নী হিচাপে মেৰীয়ে পৰৱৰ্তী ৰাণী হিচাপে দায়িত্ব গ্ৰহণ কৰিব।
অষ্ট্ৰেলিয়াত জন্মগ্ৰহণ কৰা মেৰীক প্ৰায়ে বিশ্বৰ অন্যতম ৰজাঘৰীয়া হিচাপে গণ্য কৰা হয় আৰু তেওঁৰ শৈলী আৰু আড়ম্বৰৰ বাবে প্ৰশংসা কৰা হয়। ২০০০ চনত গ্ৰীষ্মকালীন অলিম্পিকৰ সময়ত ছিডনীৰ স্লিপ ইন বাৰত বন্ধু-বান্ধৱীৰ সৈতে সময় কটোৱাৰ ছবি পোহৰলৈ অহাৰ সময়ত অষ্ট্ৰেলিয়াত বিজ্ঞাপন কাৰ্যবাহী হিচাপে কাম কৰি আছিল মেৰী ড’নাল্ডছনে।
লগতে পঢ়কঃ ইজৰাইলৰ উচ্চতম ন্যায়ালয়ে বাতিল কৰিলে নেতানিয়াহুৰ ন্যায়িক সংস্কাৰ
ৰাণী মাৰ্গাৰেটে কয় যে তেওঁ অসুস্থতাৰ বাবে কৰ্তব্যৰ পৰা মুক্তি পাব বিচাৰে। যোৱা বছৰৰ ফেব্ৰুৱাৰী মাহত তেওঁৰ সফল অস্ত্ৰোপচাৰ হৈছিল। এই সন্দৰ্ভত তেওঁ সংবাদ মাধ্যমৰ আগত কয় যে, অস্ত্ৰোপচাৰৰ পিছত তেওঁ ভৱিষ্যতকলৈ চিন্তা ভাৱনা বৃদ্ধি পায়। সেই সময়তে তেওঁ এই দায়িত্ব পৰৱৰ্তী প্ৰজন্মৰ ওপৰত এৰি পদত্যাগ কৰাৰ সিদ্ধান্ত লয়।
উল্লেখ্য যে মাৰ্গাৰেটৰ জন্ম হৈছিল ১৯৪০ চনত। তেওঁৰ পিতৃ আছিল ডেনমাৰ্কৰ প্ৰাক্তন ৰজা নৱম ফ্ৰেডেৰিক। মাতৃৰ নাম আছিল ইংগ্ৰিড। ১৯৭২ চনত পিতৃৰ মৃত্যুৰ সময়ত তেওঁ ৩১ বছৰ বয়সত ডেনমাৰ্কৰ সিংহাসনৰ উত্তৰাধিকাৰী হয়। ডেনমাৰ্কৰ সংবিধান সংশোধন কৰি দ্বিতীয় মাৰ্গাৰেট সিংহাসনত বহে। প্ৰায় ৫২ বছৰ ৰাণী হিচাপে কাৰ্যনিৰ্বাহ কৰাৰ পিছত তেওঁ পদত্যাগ কৰিছে। ইউৰোপৰ আটাইতকৈ দীৰ্ঘদিনীয়া ৰাণীৰ অভিলেখ গঢ়িছে দ্বিতীয় মাৰ্গাৰেট।
মন কৰিবলগীয়া যে ডেনমাৰ্কত সকলো ক্ষমতা নিৰ্বাচিত সংসদ আৰু তেওঁলোকৰ চৰকাৰৰ ওপৰত ন্যস্ত। এজন ৰজা বা ৰাণী দলীয় ৰাজনীতিৰ ওপৰত। ব্ৰিটিছ ৰজা বা ৰাণীৰ দৰে তেওঁৰ অধিকাৰ ডেনমাৰ্কৰ সংবিধানত সুৰক্ষিত।
লগতে পঢ়কঃ `পৰেশ বৰুৱাৰ সৈতে যোগাযোগত আছো যদিও তাৎক্ষণিক আলোচনাৰ সম্ভাৱনা নাই’; মন্তব্য মুখ্যমন্ত্ৰীৰ
ডেনমাৰ্কৰ প্ৰধানমন্ত্ৰী মেট ফ্ৰেড্ৰিক্সনে দ্বিতীয় ৰাণী মাৰ্গাৰেটে পদত্যাগ কৰাৰ সিদ্ধান্তৰ বিষয়ে সদৰী কৰিছে। তেওঁ আজীৱন সেৱাৰ বাবে ৰাণীক ধন্যবাদ জনায়। তেওঁ ৰাণীক ডেনমাৰ্কৰ ব্যক্তিত্ব বুলি অভিহিত কৰে। লগতে প্ৰধানমন্ত্ৰী ফ্ৰেড্ৰিকছনে কয় যে ডেনমাৰ্কে তেওঁৰ জাতি সেৱাত কৰা কামক মনত ৰাখিব।
