প্ৰত্যাশিতভাৱেই আজি লোকসভাৰ সদস্য পদ হেৰুৱাবলগীয়া হ’ব কংগ্ৰেছৰ শীৰ্ষস্থানীয় নেতা ৰাহুল গান্ধীয়ে। চাৰি বছৰ পুৰণি মানহানিৰ গোচৰত বৃহস্পতিবাৰে কংগ্ৰেছ নেতাগৰাকীক গুজৰাটৰ চুৰাট আদালতে দোষী সাব্যস্ত কৰি দুবছৰৰ কাৰাদণ্ডৰে দণ্ডিত কৰাৰ এদিন পিছতে আজি গান্ধীক লোকসভাৰ সাংসদ হিচাপে অযোগ্য ঘোষণা কৰা হৈছে।
এক জাননী জাৰি কৰি লোকসভাত ৱায়ানাডৰ সাংসদ ৰাহুল গান্ধীক সাংসদ পদৰ বাবে অযোগ্য ঘোষণা কৰা হয়। জাননীখনত গান্ধীক কালি আদালতে শাস্তি ঘোষণা কৰা সময়ৰ পৰাই ভাৰতীয় অনুচ্ছেদ ১০২ (১) (E) ৰ লগতে জনপ্ৰতিনিধি আইন, ১৯৫১ ৰ ধাৰা ৮ ৰ বিধান অনুসৰি লোকসভাৰ সদস্য পদৰ বাবে অযোগ্য ঘোষণা কৰা হৈছে বুলি উল্লেখ কৰা হৈছে।
ইফালে গান্ধীৰ সাংসদ পদৰ অযোগ্যতা সন্দৰ্ভত প্ৰতিক্ৰিয়া ব্যক্ত কৰি কংগ্ৰেছে এয়া অপমানজনক আৰু সত্যৰ জয় হ’ব বুলি মন্তব্য কৰিছে। গান্ধীৰ শাস্তিৰ বিৰোধিতাৰে আজি দেশজুৰি প্ৰতিবাদ সাব্যস্ত কৰিছে কংগ্ৰেছে। দলৰ সভাপতি মল্লিকাৰ্জুন খৰ্গেই যুটীয়া সংসদীয় সমিতিৰ দাবীত কংগ্ৰেছে প্ৰতিবাদ সাব্যস্ত কৰা হৈছে বুলি সংবাদ মাধ্যমৰ আগত মন্তব্য কৰে।
“আমি ইয়াত যুটীয়া সংসদীয় সমিতিৰ দাবীত প্ৰতিবাদ সাব্যস্ত কৰিছো। প্ৰধানমন্ত্ৰী মোদীয়ে মানুহৰ পৰা কিবা লুকুৱাব বিচাৰে। ললিত মোডী, নীৰৱ মোডী আৰু মেহুল চোকচিয়ে চৰকাৰৰ পৰা কোটি কোটি টকা লুটি লৈ এই দেশৰ পৰা পলাই যায় আৰু প্ৰধানমন্ত্ৰী মোদীয়ে তেওঁলোকৰ বিষয়ে কোনো কথাই নকয়”– খৰ্গেই লগতে কয়।
উল্লেখ্য যে, ২০১৯ চনৰ লোকসভা নিৰ্বাচনৰ পূৰ্বে কৰ্ণাটকৰ কোলাৰত এক সভাত নিজ বক্তব্যত ৰাহুল গান্ধীয়ে ‘সকলো চোৰৰ উপাধি মোদী কিয় হয়’ বুলি মন্তব্য কৰিছিল। ইয়াৰ পিছতে বিজেপিৰ বিধায়ক তথা গুজৰাটৰ প্ৰাক্তন মন্ত্ৰী পূৰ্ণেশ মোদীয়ে দাখিল কৰা এজাহাৰৰ ভিত্তিত ৰাহুল গান্ধীৰ বিৰুদ্ধে গোচৰ ৰুজু কৰা হৈছিল।
বৃহস্পতিবাৰে এই গোচৰৰ ৰায়দান কৰি চুৰাট আদালতে ৰাহুল গান্ধীক দোষী সাব্যস্ত কৰে আৰু তেওঁক দুবছৰৰ কাৰাদণ্ডৰ শাস্তিৰে দণ্ডিত কৰে। অৱশ্যে আদালতে কংগ্ৰেছ নেতাগৰাকীক জামিন মঞ্জুৰ কৰি ৩০ দিনৰ বাবে শাস্তি স্থগিত ৰাখে আৰু এই ৰায়ৰ বিৰুদ্ধে আপীল কৰিবলৈ অনুমতি দিয়ে।
