শ্ৰীমন্ত শংকৰদেৱ কলাক্ষেত্ৰত উপস্থিত হৈ প্ৰয়াত প্ৰাক্তন মুখ্যমন্ত্ৰী তৰুণ গগৈক শ্ৰদ্ধাঞ্জলি জনায় কংগ্ৰেছৰ প্ৰাক্তন সভাপতি ৰাহুল গান্ধীয়ে।
ৰাতিপুৱা ৯:৪০ বজাত নতুন দিল্লীৰ পৰা গুৱাহাটী বৰঝাৰ বিমান বন্দৰত উপস্থিত হৈ পোনে পোনে শংকৰদেৱ কলাক্ষেত্ৰত উপস্থিত হয় ৰাহুল গান্ধী।
কলাক্ষেত্ৰত উপস্থিত হৈয়ে ৰাহুল গান্ধীয়ে প্ৰাক্তন মুখ্য মন্ত্ৰী গগৈৰ নশ্বৰ দেহত মাল্যপন কৰাৰ লগতে অশ্ৰুসিক্ত শ্ৰদ্ধাঞ্জলি জনায়।
তাৰ পাছতে শোক প্ৰকাশ কৰি গান্ধীয়ে কয় “গগৈ মোৰ গুৰু আছিল। তেওঁৰ শিষ্য মই। তেওঁৰ সৈতে মোৰ বহুবাৰ সাক্ষাৎ হৈছে আৰু বহু কথা পাতিছো। তেওঁ কেৱল ব্যক্তি নহয়, তেওঁ মানেই অসম।”
তৰুণ গগৈয়ে মৃত্যুৰ পূৰ্বে বহু শিষ্যক ৰাজনীতি শিকাই গৈছে গতিকে অসমত কংগ্ৰেছৰ কেতিয়াও বেয়া দিন নহয় বুলিও ৰাহুল গান্ধীয়ে লগতে কয়।
ইয়াৰ পাছতে তৰুণ গগৈয়ে পোনে পোনে তৰুণ গগৈৰ চৰকাৰী বাসগৃহলৈ ৰাওনা হয়।
‘‘তৰুণ গগৈৰ সৈতে কথা পাতিলে তেওঁ কেবল অসমৰ কথাকে কৈছিল……তেওঁৰ সৈতে কথা পাতিলে অসমত থকা যেন লাগে,’’ ৰাহুল গান্ধীয়ে লগতে কয়।
আনহাতে, গুৱাহাটীত প্ৰায় দুঘণ্টা সময় অতিবাহিত কৰি ৰাহুল গান্ধীয়ে তৰুণ গগৈৰ চৰকাৰী বাসভৱনৰ পৰা পোনে পোনে নতুন দিল্লীলৈ উভতি যাব।