ষ্টাৰলিংকক ভাৰতত প্ৰৱেশ কৰিবলৈ দিয়া হোৱা নাই! বিস্ফোৰক অভিযোগ উত্থাপন কৰিছে আমেৰিকাৰ কোটিপতি ইলন মাস্কে। এতিয়া তেওঁ এই প্ৰশ্ন উত্থাপন কৰিছে, ভাৰত দেশখন আম্বানীয়ে চলাইছে নেকি?
মাস্কৰ সেই টুইটৰ প্ৰত্যুত্তৰত লোকসভাৰ বিৰোধী নেতা ৰাহুল গান্ধীয়ে নাম উল্লেখ নকৰাকৈ গৌতম আদানীক টাৰ্গেট কৰিছে। মাস্ক আৰু ৰাহুলৰ এই বাৰ্তালাপক লৈ ইণ্টাৰনেটত তুমুল চৰ্চা চলিছে।
বুধবাৰে মাস্কে নিজৰ এক্স হেণ্ডেলত এটা পোষ্ট পোষ্ট কৰে। তেওঁ লিখিছে, ‘দুৰ্ভাগ্যজনকভাৱে ষ্টাৰলিংকক ভাৰতীয় বজাৰত প্ৰৱেশ কৰাত বাধা দিয়া হৈছে। কাৰণ কিছুমান গোষ্ঠীয়ে সেই দেশত নিজৰ একচেটিয়া অধিকাৰ বজাই ৰাখিব বিচাৰে।’
দ্বিতীয়টো পোষ্টত আমেৰিকাৰ কোটিপতিগৰাকীয়ে কয় যে, ‘ভাৰতৰ যিসকল লোকে উচ্চ মূল্যৰ ইণ্টাৰনেট সেৱাৰ খৰচ বহন কৰিব নোৱাৰে, তেওঁলোকক ষ্টাৰলিংকে দ্ৰুতবেগী আৰু সুলভ মূল্যৰ ইণ্টাৰনেট সংযোগ প্ৰদান কৰিব।’
প্ৰথম কেইটামান পোষ্টত অৱশ্যে টেছলাৰ মুৰব্বীগৰাকীয়ে কোনো গ্ৰুপ বা প্ৰভাৱশালী ব্যক্তিৰ নাম পোনপটীয়াকৈ উল্লেখ কৰা নাছিল।
অৱশ্যে তাৰ পিছত মাস্কে এটা প্ৰতিবেদন ৰিটুইট কৰে। সেই প্ৰতিবেদনৰ বিষয়বস্তু আছিল, ভাৰত চৰকাৰে নাগৰিকতকৈও দুই এজন ব্যৱসায়ীৰ স্বাৰ্থ অধিক সুৰক্ষিত কৰিছে নেকি? ৰিটুইট কৰি মাস্কৰ বক্তব্য, ‘ষ্টাৰলিংকৰ ১৬৫খন দেশত অনুজ্ঞাপত্ৰ আছে। যোৱা পাঁচ বছৰ ধৰি ভাৰত চৰকাৰৰ প্ৰতিটো নিয়ম মানি চলি আহিছে। ইয়াৰ পিছতো আমি কিয় অনুজ্ঞাপত্ৰ নাপালোঁ? তেনেহ’লে আম্বানীয়েই ভাৰতৰ বছ নেকি?’
মাস্কৰ এই টুইটৰ প্ৰতি সঁহাৰি জনাই ৰাহুলে এখন ছবি পোষ্ট কৰে য’ত প্ৰধানমন্ত্ৰী নৰেন্দ্ৰ মোডী আৰু গৌতম আদানীক একেলগে দেখা গৈছে। কাৰো নাম নোলোৱাকৈ ৰাহুলে লিখিছে, ‘এইবাৰ আন আৰু এজনক বিচাৰি পাব’। অৰ্থাৎ তেওঁ ইংগিত দিলে যে ভাৰতৰ ‘বছ’ আদানীও।
তাৎপৰ্যপূৰ্ণভাৱে ৰাহুলৰ এই টুইটৰ উত্তৰ দিয়ে মাস্কে। তেওঁ লিখিছে, “ধন্যবাদ ৰাহুল। এইটো এটা অতি গুৰুতৰ বিষয়।”
উল্লেখ্য যে ভাৰতে মাস্কৰ এই দাবী নাকচ কৰিছে। যোগাযোগ মন্ত্ৰালয়ৰ এক বিবৃতিত কোৱা হৈছে যে উপগ্ৰহ যোগাযোগ সেৱাৰ ক্ষেত্ৰত ভাৰতৰ নিয়ন্ত্ৰণ ব্যৱস্থাৰ নিৰপেক্ষতাক লৈ প্ৰশ্ন উত্থাপন কৰি ছ’চিয়েল মিডিয়াত এটা পোষ্ট ভাইৰেল হৈছে। কিন্তু ভাৰতত উপগ্ৰহ যোগাযোগকে ধৰি সকলো ধৰণৰ দূৰসংযোগ সেৱাৰ বাবে এক ন্যায্য আৰু বৈষম্যহীন আন্তঃগাঁথনি আছে।
