প্ৰধানমন্ত্ৰী নৰেন্দ্ৰ মোদীয়ে বিচাৰে যে দেশৰ যুৱ প্ৰজন্মই কেৱল ছচিয়েল মিডিয়াত ৰিল বনাওক আৰু পকৰি ভাজক। চিবিএছই পৰীক্ষাৰ উত্তৰ বহী সলনি হোৱাক লৈ এই বিস্ফোৰক মন্তব্য কৰিছে লোকসভাৰ বিৰোধী দলপতি ৰাহুল গান্ধীয়ে। শেহতীয়াকৈ কংগ্ৰেছ নেতাগৰাকীয়ে সাৰ্থক নামৰ এজন ছাত্ৰক সাক্ষাৎ কৰিছিল। চিবিএছইৰ পোৰ্টেলৰ সমস্যা সমাধানৰ ক্ষেত্ৰত সাৰ্থক আৰু তেওঁৰ সহপাঠী নিসৰ্গই এক গুৰুত্বপূৰ্ণ ভূমিকা পালন কৰিছিল। তেওঁলোকৰ এই প্ৰচেষ্টাক ৰাহুল গান্ধীয়ে ভূয়সী প্ৰশংসা কৰে।
সাৰ্থকৰ সৈতে হোৱা এই সাক্ষাৎকাৰৰ এটা ভিডিঅ’ কংগ্ৰেছ সাংসদগৰাকীয়ে নিজৰ এক্স একাউণ্টত পোষ্ট কৰিছে। তেওঁ কয় যে মাত্ৰ ১৮ বছৰ বয়স হ’লেও সাৰ্থকৰ সাহস আৰু নৈতিকতা কাৰোতকৈ কম নহয়। এই কিশোৰদ্বয়ে এনে এটা কাম কৰি দেখুৱালে যিটো দেশৰ আগশাৰীৰ সংবাদ মাধ্যমেও কৰিব পৰা নাছিল। ৰাহুল গান্ধীৰ মতে, প্ৰধানমন্ত্ৰী মোদীয়ে বিচাৰে যে দেশৰ যুৱ প্ৰজন্মই কোনো প্ৰশ্ন নকৰি কেৱল ৰিল বনাওক আৰু পকৰি ভাজক। কিন্তু এই যুৱককেইজনে চকু মেলি চৰকাৰক প্ৰশ্ন কৰিছে আৰু চিবিআইকো হাৰ মান খুৱাইছে। যুৱ প্ৰজন্মৰ এই সাফল্যই আচলতে চৰকাৰৰ ব্যৰ্থতাকে প্ৰমাণ কৰে।
দেশৰ যুৱ সমাজৰ প্ৰশংসাত পঞ্চমুখ হৈ ৰাহুল গান্ধীয়ে কয় যে ভাৰতৰ যুৱক-যুৱতীসকলৰ মনত প্ৰশ্ন আছে। তেওঁলোক যথেষ্ট সচেতন আৰু জ্ঞানী, যিটো তেওঁলোকৰ আটাইতকৈ ডাঙৰ শক্তি। দেশৰ ভৱিষ্যত প্ৰজন্মই কোনো ধৰণৰ প্ৰতাৰণাৰ ফান্দত ভৰি নিদিয়ে বুলিও তেওঁ মন্তব্য কৰে। উল্লেখযোগ্য যে নিট আৰু চিবিএছইকে ধৰি বিভিন্ন পৰীক্ষাৰ খেলিমেলিৰ বিৰুদ্ধে ৰাহুল গান্ধীয়ে আৰম্ভণিৰে পৰাই সৰৱ ভূমিকা পালন কৰি আহিছে আৰু এইবাৰো তেওঁ এই ইছ্যুটো লৈ প্ৰধানমন্ত্ৰীক আক্ৰমণৰ লক্ষ্য কৰি লৈছে।
মন কৰিবলগীয়া যে চিবিএছইৰ নতুন অনস্ক্ৰিন মাৰ্কিং চিষ্টেমক লৈ ছাত্ৰ-ছাত্ৰীসকলে বহুতো অভিযোগ উত্থাপন কৰিছিল। কোনোবাই কম নম্বৰ পোৱাৰ অভিযোগ কৰিছে, আকৌ কোনোবাই আনৰ উত্তৰ বহী পোৱা বুলি দাবী কৰিছে। বহু ছাত্ৰ-ছাত্ৰীয়ে আনকি তেওঁলোকৰ উত্তৰ বহীৰ কিছুমান পৃষ্ঠা নিৰুদ্দেশ হোৱাৰো অভিযোগ তুলিছে। বহু অভিভাৱক আৰু শিক্ষাৰ্থীৰ মতে স্কেন কৰা উত্তৰ বহীবোৰ অতি ধুঁৱলী কুঁৱলী আছিল। আনকি কিছুমান ঠাইত নম্বৰ গণনা ভুল হোৱাৰ লগতে পুনৰ মূল্যায়নৰ প্ৰক্ৰিয়াত ছাৰ্ভাৰ আৰু পেমেন্ট গেটৱেৰ সমস্যাও দেখা গৈছিল।
