সোমবাৰে দিল্লীৰ বায়ুৰ গুণাগুণ পুনৰ ‘অত্যন্ত বেয়া’ স্তৰত উপনীত হয়। মঙলবাৰেও ধোঁৱাৰ পৰা কোনো সকাহ পোৱা নাই। কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ তথ্য অনুসৰি আজি দিল্লীত বতাহ উশাহ লোৱা দিনটোত সাতটাতকৈ অধিক চিগাৰেট খোৱাৰ ফলত হাওঁফাওঁৰ ক্ষতিৰ দৰেই হ’ব পাৰে।
আনহাতে, উচ্চতম ন্যায়ালয়ত দিল্লী প্ৰদূষণ গোচৰৰ শুনানিৰ সময়ত পোহৰলৈ আহিছে যে দীপাৱলীত দিল্লীৰ প্ৰদূষণৰ সঠিক তথ্য প্ৰশাসনৰ হাতত নাই! দেশ-বিদেশত প্ৰশ্নৰ সন্মুখীন হোৱা বিজেপি চৰকাৰৰ অস্বস্তি আৰু অধিক বৃদ্ধি কৰিছে ৰাহুল গান্ধীয়ে।
সোমবাৰে কংগ্ৰেছ নেতাগৰাকীয়ে ছ’চিয়েল মিডিয়া পোষ্টত অভিযোগ কৰি কয় যে, “দিল্লীৰ প্ৰদূষণ প্ৰতি বছৰে একেই থাকে, কেৱল বিজেপিয়েহে অজুহাত সলনি কৰে।” অৱশ্যে গেৰুৱা শিবিৰে দোষ কংগ্ৰেছ আৰু আপৰ ওপৰত জাপি দিলে।
মঙলবাৰে লোকসভাৰ বিৰোধী দলপতিগৰাকীয়ে এক্স হেণ্ডেলৰ পোষ্টত পোনপটীয়াকৈ আক্ৰমণ কৰি কয়, “দিল্লীৰ বায়ু প্ৰতি বছৰে অধিক বিষাক্ত হৈ আহিছে, আৰু বিজেপি চৰকাৰে অজুহাত সলনি কৰি আছে। বৰ্তমান যেতিয়া বিজেপিয়ে কেন্দ্ৰ আৰু দিল্লী দুয়ো স্থানতে শাসন চলাইছে, তেতিয়া অজুহাতে কাম নিদিয়ে। মানুহে প্ৰতিশ্ৰুতি নিবিচাৰে, তেওঁলোকে প্ৰদূষণমুক্ত বায়ু বিচাৰে।”
এই বক্তব্যৰ সৈতে ৰাহুল গান্ধীয়ে এটা ভিডিঅ’ পোষ্ট কৰিছে। ইয়াত তেওঁ এজন পৰিৱেশবিদৰ সৈতে দিল্লীৰ বিষাক্ত বায়ুৰ বিষয়ে কথা পতা দেখা গৈছে।
আনহাতে, ৰাজধানী চহৰত প্ৰদূষণৰ বাবে কংগ্ৰেছ আৰু আপক দোষাৰোপ কৰিছে গেৰুৱা শিবিৰে। বিজেপি নেতা মঞ্জিন্দৰ সিং ছিৰছাই ছ’চিয়েল মিডিয়াত পোষ্ট কৰি কয় যে দিল্লীৰ প্ৰদূষণৰ পৰিস্থিতিৰ বাবে ১৫ বছৰীয়া কংগ্ৰেছ চৰকাৰ আৰু ১০ বছৰীয়া আপ চৰকাৰ দায়ী। আনকি তেওঁ দাবী কৰে যে, “বিগত ১০ বছৰৰ ভিতৰত বিজেপি চৰকাৰৰ অধীনতে এই বছৰ বায়ুৰ সৰ্বোত্তম মান ৰেকৰ্ড কৰা হৈছে।”
দিল্লীৰ প্ৰদূষণক লৈ বিভিন্ন দলৰ নেতাসকলে ৰাজনীতি কৰি থকাৰ সময়তে কেন্দ্ৰীয় প্ৰদূষণ নিয়ন্ত্ৰণ ব’ৰ্ডৰ ৱেবছাইটে প্ৰদান কৰা তথ্য অনুসৰি মঙলবাৰে পুৱা ৭ বজাত ৰাজধানীখনৰ গড় বায়ুৰ গুণাগুণ সূচকাংক (একিউআই) আছিল ৩০৯, অৰ্থাৎ ‘অতি বেয়া’।
আনকি আলিপুৰ, আনন্দ বিহাৰ, বুৰাৰী আৰু ৱাজিৰপুৰ অঞ্চলত বায়ুৰ মানদণ্ড ৪০০ অতিক্ৰম কৰিছে। যিটো ‘ভয়ংকৰ’ পৰ্যায়ত আছে। ইটোৱে সিটোক দোষাৰোপ কৰিলে সমস্যাৰ সমাধান নহ’ব বুলি সকীয়াই দিছে পৰিৱেশবিদসকলে। বৰঞ্চ জৰুৰীভাৱে ব্যৱস্থা ল’ব লাগিব।
